‘ਏ. ਆਈ.’ ਨਾਲ ਅਪਣੀ ਤਸਵੀਰ ਬਣਾ ਕੇ ਟਰੰਪ ਨੇ ਕਿਹਾ ‘ਅਸੀਂ ਦੁਨੀਆਂ ਦੇ ਰਖਵਾਲੇ’

ਵਾਸ਼ਿੰਗਟਨ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਟਰੂਥ ਸੋਸ਼ਲ ’ਤੇ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (ਏਆਈ) ਨਾਲ ਤਿਆਰ ਕੀਤੀਆਂ ਕਈ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਇਨ੍ਹਾਂ ਤਸਵੀਰਾਂ ਵਿੱਚ ਅਮਰੀਕੀ ਫੌਜ ਨੂੰ ਈਰਾਨ ਖ਼ਿਲਾਫ਼ ਕਾਰਵਾਈ ਕਰਦੇ ਹੋਏ ਦਿਖਾਇਆ ਗਿਆ ਹੈ। ਟਰੰਪ ਖੁਦ ਵੀ ਇਨ੍ਹਾਂ ਤਸਵੀਰਾਂ ਵਿੱਚ ਕਿਤੇ ਈਰਾਨ ਦੇ ਤੇਲ ਟੈਂਕਰ ਨੂੰ ਜ਼ਬਤ ਕਰਦੇ ਅਤੇ ਕਿਤੇ ਈਰਾਨੀ ਟਾਪੂਆਂ ’ਤੇ ਬੰਬਾਰੀ ਕਰਦੇ ਨਜ਼ਰ ਆ ਰਹੇ ਹਨ।

ਹਾਲਾਂਕਿ, ਇਨ੍ਹਾਂ ਤਸਵੀਰਾਂ ਨੇ ਅਮਰੀਕਾ ਦੇ ਸੰਭਾਵੀ ਸਖ਼ਤ ਸੈਨਿਕ ਰੁਖ ਨੂੰ ਲੈ ਕੇ ਨਵੀਆਂ ਚਰਚਾਵਾਂ ਛੇੜ ਦਿੱਤੀਆਂ ਹਨ। ਇੱਕ ਤਸਵੀਰ ਵਿੱਚ ਟਰੰਪ ਅਮਰੀਕੀ ਝੰਡੇ ਨਾਲ ਇੱਕ ਤੇਲ ਟੈਂਕਰ ’ਤੇ ਖੜ੍ਹੇ ਦਿਖਾਈ ਦੇ ਰਹੇ ਹਨ, ਜਦਕਿ ਦੂਜੀ ਵਿੱਚ ਲੜਾਕੂ ਜਹਾਜ਼ ਈਰਾਨ ਦੇ ਖਾਰਗ ਤੇਲ ਟਰਮੀਨਲ ’ਤੇ ਬੰਬਾਰੀ ਕਰਦੇ ਨਜ਼ਰ ਆ ਰਹੇ ਹਨ। ਇੱਕ ਪੋਸਟ ਵਿੱਚ ਟਰੰਪ ਨੇ ਆਪਣੇ ਆਪ ਨੂੰ ‘ਦੁਨੀਆਂ ਦਾ ਰੱਖਿਅਕ’ ਵੀ ਦੱਸਿਆ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਏਆਈ ਨਾਲ ਤਿਆਰ ਕੀਤੀਆਂ ਤਸਵੀਰਾਂ ਈਰਾਨ ਦੇ ਤੇਲ ਵਪਾਰ ’ਤੇ ਅਮਰੀਕੀ ਦਬਾਅ ਬਣਾਈ ਰੱਖਣ ਦਾ ਇੱਕ ਸਿਆਸੀ ਸੰਦੇਸ਼ ਹੋ ਸਕਦੀਆਂ ਹਨ। ਉਨ੍ਹਾਂ ਦੇ ਅਨੁਸਾਰ, ਅਜਿਹੀਆਂ ਪੋਸਟਾਂ ਖੇਤਰ ਵਿੱਚ ਤਣਾਅ ਨੂੰ ਹੋਰ ਵਧਾ ਸਕਦੀਆਂ ਹਨ ਅਤੇ ਕੂਟਨੀਤਕ ਹੱਲ ਦੀਆਂ ਕੋਸ਼ਿਸ਼ਾਂ ’ਤੇ ਵੀ ਅਸਰ ਪਾ ਸਕਦੀਆਂ ਹਨ।