ਫਰਾਂਸ ‘ਚ ਪਹਿਲੀ ਵਾਰ ਦਿਖਿਆ ‘ਅੱਗ ਦਾ ਬੱਦਲ’, ਜੰਗਲੀ ਅੱਗ ਨੇ ਮਚਾਈ ਤਬਾਹੀ

ਪੈਰਿਸ : ਫਰਾਂਸ ਅਤੇ ਸਪੇਨ ਵਿੱਚ ਭਿਆਨਕ ਜੰਗਲੀ ਅੱਗ ਦੌਰਾਨ ਪਹਿਲੀ ਵਾਰ ਪਾਇਰੋਕੁਮੁਲੋਨਿੰਬਸ ਜਾਂ ‘ਅੱਗ ਦਾ ਬੱਦਲ’ ਬਣਨ ਦੀ ਘਟਨਾ ਸਾਹਮਣੇ ਆਈ ਹੈ। ਮਾਹਿਰਾਂ ਅਨੁਸਾਰ ਇਹ ਬੱਦਲ ਜੰਗਲੀ ਅੱਗ ਜਾਂ ਜਵਾਲਾਮੁਖੀ ਤੋਂ ਨਿਕਲਣ ਵਾਲੀ ਬੇਹੱਦ ਗਰਮੀ ਕਾਰਨ ਬਣਦੇ ਹਨ ਅਤੇ ਬਿਜਲੀ, ਤੇਜ਼ ਹਵਾਵਾਂ ਤੇ ਬਲਦੇ ਅੰਗਿਆਰੇ ਪੈਦਾ ਕਰਕੇ ਅੱਗ ਨੂੰ ਹੋਰ ਭਿਆਨਕ ਬਣਾ ਸਕਦੇ ਹਨ।

ਗਿਰੋਂਡੇ ਖੇਤਰ ਦੇ ਫਾਇਰ ਐਂਡ ਐਮਰਜੈਂਸੀ ਸਰਵਿਸਜ਼ ਦੇ ਡਾਇਰੈਕਟਰ ਮਾਰਕ ਵਰਮੂਲੇਨ ਨੇ ਦੱਸਿਆ ਕਿ ਇਸ ਅੱਗ ਦੇ ਬੱਦਲ ਕਾਰਨ ਕਈ ਨਵੀਆਂ ਅੱਗਾਂ ਭੜਕ ਗਈਆਂ। ਫਰਾਂਸ ਦੇ ਨੈਸ਼ਨਲ ਫਾਇਰਫਾਈਟਰਜ਼ ਫੈਡਰੇਸ਼ਨ ਦੇ ਬੁਲਾਰੇ ਲੈਫਟੀਨੈਂਟ ਕਰਨਲ ਏਰਿਕ ਬ੍ਰੋਕਾਰਡੀ ਨੇ ਕਿਹਾ ਕਿ ਕੈਨੇਡਾ ਅਤੇ ਆਸਟ੍ਰੇਲੀਆ ਵਿੱਚ ਅਜਿਹੀਆਂ ਘਟਨਾਵਾਂ ਪਹਿਲਾਂ ਵੀ ਹੋਈਆਂ ਹਨ, ਪਰ ਫਰਾਂਸ ਵਿੱਚ ਇਹ ਪਹਿਲਾ ਮਾਮਲਾ ਹੈ।

ਨਾਸਾ ਦੇ ਅਨੁਸਾਰ, ਅੱਗ ਦੇ ਇਹ ਬੱਦਲ ਅੱਗ ਬੁਝਾਉਣ ਵਾਲੀਆਂ ਟੀਮਾਂ ਲਈ ਵੱਡੀ ਚੁਣੌਤੀ ਬਣਦੇ ਹਨ, ਕਿਉਂਕਿ ਇਹ ਤੇਜ਼ ਅਤੇ ਅਣਪਛਾਤੀਆਂ ਹਵਾਵਾਂ ਪੈਦਾ ਕਰਦੇ ਹਨ, ਜੋ ਅੱਗ ਨੂੰ ਹੋਰ ਫੈਲਾਉਂਦੀਆਂ ਹਨ ਅਤੇ ਰਾਹਤ ਕਾਰਜਾਂ ਵਿੱਚ ਰੁਕਾਵਟ ਪਾਉਂਦੀਆਂ ਹਨ। ਫਰਾਂਸ ਅਤੇ ਸਪੇਨ ਵਿੱਚ ਅੱਗ ਬੁਝਾਉਣ ਵਾਲੀਆਂ ਟੀਮਾਂ ਸੋਮਵਾਰ ਨੂੰ ਮੌਸਮ ਵਿੱਚ ਆਏ ਸੁਧਾਰ ਦਾ ਲਾਭ ਚੁੱਕਦਿਆਂ ਅੱਗ ’ਤੇ ਕਾਬੂ ਪਾਉਣ ਲਈ ਜੁਟੀਆਂ ਰਹੀਆਂ।

ਆਉਣ ਵਾਲੇ ਦਿਨ ਹੋਰ ਵੀ ਮੁਸ਼ਕਲ : ਮੈਕਰੋਨ

ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਨੇ ਕਿਹਾ ਕਿ ਆਉਣ ਵਾਲੇ ਦਿਨ ਹੋਰ ਵੀ ਮੁਸ਼ਕਲ ਹੋ ਸਕਦੇ ਹਨ। ਉਨ੍ਹਾਂ ਨੇ ਅੱਗ ਬੁਝਾਉਣ ਵਾਲੇ ਕਰਮਚਾਰੀਆਂ ਦਾ ਹੌਸਲਾ ਵਧਾਉਂਦਿਆਂ ਕਿਹਾ, ‘ਸਾਨੂੰ ਡਟ ਕੇ ਖੜ੍ਹੇ ਰਹਿਣਾ ਹੋਵੇਗਾ। ਇਕੱਠੇ ਹੋ ਕੇ ਅਸੀਂ ਇਹ ਲੜਾਈ ਜਿੱਤਾਂਗੇ। ਪੂਰਾ ਦੇਸ਼ ਤੁਹਾਡੇ ਨਾਲ ਖੜ੍ਹਾ ਹੈ।’ ਇਸ ਦੌਰਾਨ ਯੂਰਪੀ ਦੇਸ਼ ਵੀ ਮਦਦ ਲਈ ਅੱਗੇ ਆਏ ਹਨ। ਪੁਰਤਗਾਲ ਦੀਆਂ ਟੀਮਾਂ ਸਪੇਨ ਵਿੱਚ ਰਾਹਤ ਕਾਰਜਾਂ ਵਿੱਚ ਸ਼ਾਮਲ ਹੋ ਗਈਆਂ ਹਨ, ਜਦਕਿ ਤੁਰਕੀ, ਇਟਲੀ ਅਤੇ ਗ੍ਰੀਸ ਨੇ ਅੱਗ ਬੁਝਾਉਣ ਵਾਲੇ ਜਹਾਜ਼ ਭੇਜੇ ਹਨ। ਫਰਾਂਸ ਦੀ ਬੇਨਤੀ ’ਤੇ ਸਵਿਟਜ਼ਰਲੈਂਡ ਦੋ ਸੁਪਰ ਪੂਮਾ ਹੈਲੀਕਾਪਟਰ ਅਤੇ ਉਨ੍ਹਾਂ ਦੇ ਅਮਲੇ ਵੀ ਭੇਜ ਰਿਹਾ ਹੈ।

ਅਧਿਕਾਰੀਆਂ ਮੁਤਾਬਕ ਫਰਾਂਸ ਵਿੱਚ ਅੱਗ ਨੇ ਪੈਰਿਸ ਤੋਂ ਚਾਰ ਗੁਣਾ ਵੱਡਾ ਖੇਤਰ ਪ੍ਰਭਾਵਿਤ ਕੀਤਾ ਹੈ, ਜਦਕਿ ਸਪੇਨ ਦੇ ਮੈਡ੍ਰਿਡ ਨੇੜੇ ਐਵੀਲਾ ਖੇਤਰ ਵਿੱਚ ਲੱਗੀ ਅੱਗ ਦੇਸ਼ ਦੇ ਇਤਿਹਾਸ ਦੀ ਸਭ ਤੋਂ ਵੱਡੀ ਜੰਗਲੀ ਅੱਗ ਬਣ ਗਈ ਹੈ ਅਤੇ ਇਸ ਦਾ ਪ੍ਰਭਾਵਿਤ ਇਲਾਕਾ ਬਾਰਸੀਲੋਨਾ ਦੇ ਆਕਾਰ ਤੋਂ ਪੰਜ ਗੁਣਾ ਵੱਡਾ ਦੱਸਿਆ ਜਾ ਰਿਹਾ ਹੈ।