ਟਰੰਪ-ਈਰਾਨ ਵਿਚਾਲੇ ਇਤਿਹਾਸਕ ਸ਼ਾਂਤੀ ਸਮਝੌਤਾ, ਵਰਸਾਏ ਪੈਲੇਸ ‘ਚ MoU ‘ਤੇ ਹੋਏ ਦਸਤਖਤ

ਵਾਸ਼ਿੰਗਟਨ/ਫਰਾਂਸ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਈਰਾਨ ਦੇ ਰਾਸ਼ਟਰਪਤੀ ਮਸੂਦ ਪੇਜ਼ੇਸ਼ਕੀਆਨ ਨੇ ਜੀ-7 ਸਿਖਰ ਸੰਮੇਲਨ ਦੌਰਾਨ ਫਰਾਂਸ ਦੇ ਵਰਸਾਏ ਪੈਲੇਸ ਵਿੱਚ ਇੱਕ ਇਤਿਹਾਸਕ ਸਮਝੌਤਾ ਯਾਦਦਾਸ਼ਤ (MoU) ‘ਤੇ ਦਸਤਖਤ ਕਰ ਦਿੱਤੇ। ਦੋਵਾਂ ਦੇਸ਼ਾਂ ਵਿਚਾਲੇ ਲੰਬੇ ਸਮੇਂ ਤੋਂ ਚੱਲ ਰਹੇ ਤਣਾਅ ਨੂੰ ਘਟਾਉਣ ਲਈ ਇਸ ਸਮਝੌਤੇ ਨੂੰ ਅਹਿਮ ਕਦਮ ਮੰਨਿਆ ਜਾ ਰਿਹਾ ਹੈ।

ਵ੍ਹਾਈਟ ਹਾਊਸ ਵੱਲੋਂ ਜਾਰੀ ਵੀਡੀਓ ਵਿੱਚ ਟਰੰਪ ਨੂੰ ਫਰਾਂਸੀਸੀ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਦੀ ਮੌਜੂਦਗੀ ਵਿੱਚ ਸਮਝੌਤੇ ‘ਤੇ ਦਸਤਖਤ ਕਰਦੇ ਹੋਏ ਦੇਖਿਆ ਗਿਆ। ਇਸ ਦੌਰਾਨ ਟਰੰਪ ਨੇ ਕਿਹਾ, “ਇਹ ਆਸਾਨ ਨਹੀਂ ਸੀ, ਪਰ ਸਮਝੌਤੇ ‘ਤੇ ਦਸਤਖਤ ਹੋ ਚੁੱਕੇ ਹਨ।”

ਈਰਾਨ ਦੇ ਵਿਦੇਸ਼ ਮੰਤਰਾਲੇ ਨੇ ਵੀ ਡਿਜੀਟਲ ਦਸਤਖਤਾਂ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਸਮਝੌਤਾ ਅਧਿਕਾਰਤ ਤੌਰ ‘ਤੇ ਲਾਗੂ ਹੋ ਗਿਆ ਹੈ। ਸਮਝੌਤੇ ਅਧੀਨ ਦੋਵਾਂ ਪੱਖਾਂ ਨੇ ਜੰਗੀ ਕਾਰਵਾਈਆਂ ਰੋਕਣ, ਰਣਨੀਤਕ ਮਹੱਤਵ ਵਾਲੇ ਸਟਰੇਟ ਆਫ਼ ਹੋਰਮੂਜ਼ ਨੂੰ ਵਪਾਰਕ ਜਹਾਜ਼ਾਂ ਲਈ ਮੁੜ ਖੋਲ੍ਹਣ ਅਤੇ ਅਗਲੇ 60 ਦਿਨਾਂ ਦੌਰਾਨ ਸਥਾਈ ਸ਼ਾਂਤੀ ਅਤੇ ਪਰਮਾਣੂ ਮੁੱਦਿਆਂ ‘ਤੇ ਵਿਸਥਾਰਪੂਰਵਕ ਗੱਲਬਾਤ ਕਰਨ ‘ਤੇ ਸਹਿਮਤੀ ਜਤਾਈ ਹੈ।

ਇਸ ਤੋਂ ਪਹਿਲਾਂ ਅਮਰੀਕੀ ਉਪ-ਰਾਸ਼ਟਰਪਤੀ ਜੇਡੀ ਵੈਂਸ ਅਤੇ ਈਰਾਨੀ ਸੰਸਦ ਦੇ ਸਪੀਕਰ ਮੁਹੰਮਦ ਬਗੇਰ ਗਾਲੀਬਫ਼ ਵੱਲੋਂ ਸਮਝੌਤੇ ਦੇ ਸ਼ੁਰੂਆਤੀ ਮਸੌਦੇ ‘ਤੇ ਡਿਜੀਟਲ ਦਸਤਖਤ ਕੀਤੇ ਗਏ ਸਨ। ਸਵਿਟਜ਼ਰਲੈਂਡ ਵਿੱਚ ਹੋਣ ਵਾਲਾ ਰਸਮੀ ਦਸਤਖਤ ਸਮਾਰੋਹ ਹੁਣ ਮੁੱਖ ਤੌਰ ‘ਤੇ ਰਸਮੀ ਕਾਰਵਾਈ ਤੱਕ ਸੀਮਿਤ ਰਹਿ ਸਕਦਾ ਹੈ। ਹਾਲਾਂਕਿ, ਸਮਝੌਤੇ ਨੂੰ ਲੈ ਕੇ ਕੁਝ ਅਹਿਮ ਵੇਰਵੇ ਅਜੇ ਵੀ ਜਨਤਕ ਨਹੀਂ ਕੀਤੇ ਗਏ ਹਨ ਅਤੇ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਸਥਾਈ ਸ਼ਾਂਤੀ ਲਈ ਅਗਲੇ ਦੌਰ ਦੀਆਂ ਗੱਲਬਾਤਾਂ ਨਿਰਣਾਇਕ ਸਾਬਤ ਹੋਣਗੀਆਂ।