ਛੱਤੀਸਗੜ੍ਹ ਦੇ ਕਾਂਕੇਰ ਦੇ ‘ਚ ਖੋਜ ਮੁਹਿੰਮ ਦੌਰਾਨ ਆਈ.ਈ.ਡੀ. ਧਮਾਕਾ

3 ਜਵਾਨ ਮੌਕੇ ‘ਤੇ ਸ਼ਹੀਦ, ਚੌਥੇ ਦੀ ਇਲਾਜ ਦੌਰਾਨ ਮੌਤ

ਕਾਂਕੇਰ, 2 ਮਈ (ਨਿਊਜ਼ ਟਾਊਨ ਨੈਟਵਰਕ) : ਛੱਤੀਸਗੜ੍ਹ ਦੇ ਕਾਂਕੇਰ ਜ਼ਿਲ੍ਹੇ ਵਿੱਚ ਸ਼ਨੀਵਾਰ ਨੂੰ ਹੋਏ ਇੱਕ ਆਈਈਡੀ ਧਮਾਕੇ ਵਿੱਚ 4 ਜਵਾਨ ਸ਼ਹੀਦ ਹੋ ਗਏ। ਸ਼ਹੀਦ ਫੌਜੀਆਂ ਵਿੱਚ ਇੰਸਪੈਕਟਰ ਸੁਖਰਾਮ ਵੱਟੀ, ਕਾਂਸਟੇਬਲ ਕ੍ਰਿਸ਼ਨਾ ਕੋਮਾਰਾ, ਸੰਜੇ ਗੜ੍ਹਪਾਲੇ ਅਤੇ ਪਰਮਾਨੰਦ ਕੋਮਾਰਾ ਸ਼ਾਮਲ ਸਨ। ਪੁਲਿਸ ਨੇ ਕਿਹਾ ਕਿ ਆਈਈਡੀ ਪਹਿਲਾਂ ਲਗਾਏ ਗਏ ਸਨ। ਇਹ ਘਟਨਾ ਛੋਟੇਬੇਠੀਆ ਥਾਣਾ ਖੇਤਰ ਦੇ ਸੰਘਣੇ ਜੰਗਲਾਂ ਵਿੱਚ ਵਾਪਰੀ, ਜੋ ਕਿ ਨਾਰਾਇਣਪੁਰ ਜ਼ਿਲ੍ਹੇ ਦੀ ਸਰਹੱਦ ਨਾਲ ਲੱਗਦਾ ਹੈ। ਇੱਕ ਡੀਆਰਜੀ ਟੀਮ ਇਲਾਕੇ ਵਿੱਚ ਇੱਕ ਡੀਮਾਈਨਿੰਗ ਆਪ੍ਰੇਸ਼ਨ ਕਰ ਰਹੀ ਸੀ। ਇਸ ਆਪ੍ਰੇਸ਼ਨ ਦਾ ਉਦੇਸ਼ ਨਕਸਲੀਆਂ ਦੁਆਰਾ ਪਹਿਲਾਂ ਲਗਾਏ ਗਏ ਆਈਈਡੀ ਨੂੰ ਲੱਭਣਾ ਅਤੇ ਅਯੋਗ ਕਰਨਾ ਸੀ। ਇਸ ਆਪ੍ਰੇਸ਼ਨ ਦੌਰਾਨ ਸੈਨਿਕਾਂ ਨੂੰ ਇੱਕ ਲੁਕਿਆ ਹੋਇਆ ਵਿਸਫੋਟਕ ਯੰਤਰ ਮਿਲਿਆ, ਜਿਸ ਨਾਲ ਇੱਕ ਸ਼ਕਤੀਸ਼ਾਲੀ ਧਮਾਕਾ ਹੋਇਆ ਜਿਸ ਵਿਚ 3 ਜਵਾਨ ਮੌਕੇ ‘ਤੇ ਹੀ ਸ਼ਹੀਦ ਹੋ ਗਏ ਜਦਕਿ ਚੌਥੇ ਨੂੰ ਤੁਰੰਤ ਜ਼ਖਮੀ ਹਾਲਤ ਵਿਚ ਨੇੜਲੇ ਸਿਹਤ ਕੇਂਦਰ ਲਿਜਾਇਆ ਗਿਆ, ਜਿੱਥੋਂ ਉਨ੍ਹਾਂ ਨੂੰ ਬਿਹਤਰ ਇਲਾਜ ਲਈ ਉੱਚ ਡਾਕਟਰੀ ਸਹੂਲਤਾਂ ਵਾਲੇ ਹਸਪਤਾਲ ਵਿੱਚ ਲਿਜਾਇਆ ਗਿਆ, ਜਿਥੇ ਇਲਾਜ ਦੌਰਾਨ ਚੌਥੇ ਫ਼ੌਜੀ ਨੇ ਵੀ ਸ਼ਹੀਦੀ ਪ੍ਰਾਪਤ ਕਰ ਲਈ। ਇਸ ਘਟਨਾ ਨੂੰ ਇਸ ਲਈ ਵੀ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ ਕਿਉਂਕਿ 31 ਮਾਰਚ ਨੂੰ ਛੱਤੀਸਗੜ੍ਹ ਨੂੰ ਰਾਜ ਸਰਕਾਰ ਨੇ ਨਕਸਲ ਮੁਕਤ ਘੋਸ਼ਿਤ ਕੀਤਾ ਸੀ। ਉਸ ਤੋਂ ਬਾਅਦ ਨਕਸਲੀ ਗਤੀਵਿਧੀਆਂ ਨਾਲ ਸਬੰਧਤ ਇਹ ਪਹਿਲਾ ਧਮਾਕਾ ਹੈ, ਜਿਸ ਨਾਲ ਸੁਰੱਖਿਆ ਬਾਰੇ ਨਵੀਆਂ ਚਿੰਤਾਵਾਂ ਪੈਦਾ ਹੋ ਰਹੀਆਂ ਹਨ। ਘਟਨਾ ਤੋਂ ਬਾਅਦ ਸੁਰੱਖਿਆ ਬਲਾਂ ਨੇ ਪੂਰੇ ਖੇਤਰ ਨੂੰ ਘੇਰ ਲਿਆ ਹੈ ਅਤੇ ਹੋਰ ਸੰਭਾਵਿਤ ਆਈਈਡੀਜ਼ ਨੂੰ ਲੱਭਣ ਅਤੇ ਨਕਾਰਾ ਕਰਨ ਲਈ ਇੱਕ ਵਿਸ਼ਾਲ ਖੋਜ ਮੁਹਿੰਮ ਸ਼ੁਰੂ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਖੇਤਰ ਵਿੱਚ ਸੰਭਾਵਿਤ ਨਕਸਲੀ ਗਤੀਵਿਧੀਆਂ ਦੇ ਮੱਦੇਨਜ਼ਰ ਚੌਕਸੀ ਵਧਾ ਦਿੱਤੀ ਗਈ ਹੈ।