ਫੀਫਾ : ਪਰਾਗੁਏ ਨੇ ਜਰਮਨੀ ਨੂੰ ਹਰਾ ਕੇ ਬਣਾਈ ਪ੍ਰੀ-ਕੁਆਰਟਰ ਫਾਈਨਲ ‘ਚ ਜਗ੍ਹਾ

ਦਿੱਲੀ : ਫੀਫਾ ਵਰਲਡ ਕੱਪ 2026 ਦੇ ਰਾਊਂਡ ਆਫ਼ 32 ਵਿੱਚ ਪਰਾਗੁਏ ਨੇ ਟੂਰਨਾਮੈਂਟ ਦਾ ਸਭ ਤੋਂ ਵੱਡਾ ਉਲਟਫੇਰ ਕਰਦਿਆਂ ਜਰਮਨੀ ਨੂੰ ਪੈਨਲਟੀ ਸ਼ੂਟਆਊਟ ਵਿੱਚ 4-3 ਨਾਲ ਹਰਾ ਕੇ ਰਾਊਂਡ ਆਫ਼ 16 (ਪ੍ਰੀ-ਕੁਆਰਟਰ ਫਾਈਨਲ) ਵਿੱਚ ਪ੍ਰਵੇਸ਼ ਕਰ ਲਿਆ। ਨਿਰਧਾਰਿਤ 90 ਮਿੰਟਾਂ ਅਤੇ ਵਾਧੂ ਸਮੇਂ ਤੋਂ ਬਾਅਦ ਸਕੋਰ 1-1 ਨਾਲ ਬਰਾਬਰ ਰਿਹਾ, ਜਿਸ ਤੋਂ ਬਾਅਦ ਮੁਕਾਬਲੇ ਦਾ ਫੈਸਲਾ ਪੈਨਲਟੀ ਸ਼ੂਟਆਊਟ ਰਾਹੀਂ ਹੋਇਆ।

ਮੈਚ ਦੇ ਪਹਿਲੇ ਹਾਫ਼ ਦੇ ਆਖਰੀ ਪਲਾਂ ਵਿੱਚ ਜੂਲੀਓ ਐਨਸੀਸੋ ਨੇ ਸ਼ਾਨਦਾਰ ਹੈਡਰ ਰਾਹੀਂ ਪਰਾਗੁਏ ਨੂੰ 1-0 ਦੀ ਬੜ੍ਹਤ ਦਿਵਾਈ। ਹਾਲਾਂਕਿ ਦੂਜੇ ਹਾਫ਼ ਦੇ 52ਵੇਂ ਮਿੰਟ ਵਿੱਚ ਕਾਈ ਹੈਵਰਟਜ਼ ਨੇ ਗੋਲ ਕਰਕੇ ਜਰਮਨੀ ਨੂੰ 1-1 ਦੀ ਬਰਾਬਰੀ ਦਿਵਾ ਦਿੱਤੀ। ਇਸ ਤੋਂ ਬਾਅਦ ਦੋਵਾਂ ਟੀਮਾਂ ਨੇ ਕਈ ਮੌਕੇ ਬਣਾਏ, ਪਰ ਕੋਈ ਵੀ ਫੈਸਲਾਕੁੰਨ ਗੋਲ ਨਹੀਂ ਕਰ ਸਕੀ।

ਪੈਨਲਟੀ ਸ਼ੂਟਆਊਟ ਵਿੱਚ ਪਰਾਗੁਏ ਦੇ ਗੋਲਕੀਪਰ ਓਰਲੈਂਡੋ ਗਿੱਲ ਜਿੱਤ ਦੇ ਹੀਰੋ ਬਣੇ। ਉਨ੍ਹਾਂ ਨੇ ਜਰਮਨੀ ਦੀਆਂ ਦੋ ਅਹਿਮ ਪੈਨਲਟੀਆਂ ਰੋਕ ਕੇ ਆਪਣੀ ਟੀਮ ਨੂੰ ਜਿੱਤ ਦਿਵਾਈ। ਜਰਮਨੀ ਵੱਲੋਂ ਕਾਈ ਹੈਵਰਟਜ਼, ਨਿਕ ਵੋਲਟੇਮਾਡੇ ਅਤੇ ਜੋਨਾਥਨ ਟਾਹ ਆਪਣੀਆਂ ਪੈਨਲਟੀਆਂ ਨੂੰ ਗੋਲ ਵਿੱਚ ਤਬਦੀਲ ਨਹੀਂ ਕਰ ਸਕੇ। ਉੱਥੇ ਹੀ ‘ਸਡਨ ਡੈੱਥ’ ਵਿੱਚ ਜੋਸ ਕੈਨਾਲੇ ਨੇ ਫੈਸਲਾਕੁੰਨ ਪੈਨਲਟੀ ਨੂੰ ਗੋਲ ਵਿੱਚ ਬਦਲ ਕੇ ਪਰਾਗੁਏ ਦੀ ਇਤਿਹਾਸਕ ਜਿੱਤ ਪੱਕੀ ਕਰ ਦਿੱਤੀ।

ਇਸ ਜਿੱਤ ਨਾਲ ਪਰਾਗੁਏ ਨੇ 2010 ਤੋਂ ਬਾਅਦ ਪਹਿਲੀ ਵਾਰ ਫੀਫਾ ਵਰਲਡ ਕੱਪ ਦੇ ਰਾਊਂਡ ਆਫ਼ 16 ਵਿੱਚ ਜਗ੍ਹਾ ਬਣਾਈ ਹੈ, ਜਦਕਿ ਜਰਮਨੀ ਦਾ ਸਫ਼ਰ ਰਾਊਂਡ ਆਫ਼ 32 ਵਿੱਚ ਹੀ ਸਮਾਪਤ ਹੋ ਗਿਆ। ਇਸ ਨੂੰ ਟੂਰਨਾਮੈਂਟ ਦੀ ਹੁਣ ਤੱਕ ਦੀ ਸਭ ਤੋਂ ਵੱਡੀ ਹੈਰਾਨੀਜਨਕ ਹਾਰ ਮੰਨਿਆ ਜਾ ਰਿਹਾ ਹੈ। ਹੁਣ ਰਾਊਂਡ ਆਫ਼ 16 ਵਿੱਚ 4 ਜੁਲਾਈ ਨੂੰ ਫਿਲਾਡੇਲਫੀਆ ਵਿੱਚ ਪਰਾਗੁਏ ਦਾ ਸਾਹਮਣਾ ਫਰਾਂਸ ਅਤੇ ਸਵੀਡਨ ਵਿਚਾਲੇ ਹੋਣ ਵਾਲੇ ਮੁਕਾਬਲੇ ਦੀ ਜੇਤੂ ਟੀਮ ਨਾਲ ਹੋਵੇਗਾ।