ਰਾਮ ਮੰਦਰ ਚੜ੍ਹਾਵਾ ਚੋਰੀ ਮਾਮਲੇ ’ਚ ਬੈਂਕ ਮੁਲਾਜ਼ਮ ਵੀ ਸ਼ਕ ਦੇ ਘੇਰੇ ’ਚ

ਅਯੁੱਧਿਆ : ਅਯੁੱਧਿਆ ਦੇ ਰਾਮ ਮੰਦਰ ਵਿੱਚ ਭੇਟਾਂ ਦੀ ਕਥਿਤ ਚੋਰੀ ਮਾਮਲੇ ਦੀ ਐਸਆਈਟੀ (SIT) ਜਾਂਚ ਦੀ ਅੰਤਿਮ ਰਿਪੋਰਟ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕੀਤਾ ਜਾ ਰਿਹਾ ਹੈ। ਸੂਤਰਾਂ ਮੁਤਾਬਕ, ਰਿਪੋਰਟ ਵਿੱਚ ਕੁਝ ਸਥਾਨਕ ਸਟੇਟ ਬੈਂਕ ਆਫ਼ ਇੰਡੀਆ (SBI) ਕਰਮਚਾਰੀਆਂ ਦੀ ਭੂਮਿਕਾ ਸਪੱਸ਼ਟ ਹੋ ਸਕਦੀ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਖ਼ਿਲਾਫ਼ ਅਨੁਸ਼ਾਸਨੀ ਜਾਂ ਕਾਨੂੰਨੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।

ਜਾਣਕਾਰੀ ਅਨੁਸਾਰ, ਬੈਂਕ ਪ੍ਰਬੰਧਨ ਵੀ ਨਿਯਮਾਂ ਅਨੁਸਾਰ ਕਾਰਵਾਈ ਦੀ ਤਿਆਰੀ ਕਰ ਰਿਹਾ ਹੈ ਅਤੇ ਭੇਟਾਂ ਦੀ ਗਿਣਤੀ ਲਈ ਕਰਮਚਾਰੀ ਮੁਹੱਈਆ ਕਰਵਾਉਣ ਵਾਲੀ ਠੇਕੇਦਾਰ ਫਰਮ ਨਾਲ ਸਮਝੌਤਾ ਖਤਮ ਕਰਨ ‘ਤੇ ਵੀ ਵਿਚਾਰ ਹੋ ਰਿਹਾ ਹੈ। ਦੋਸ਼ ਹੈ ਕਿ ਫਰਮ ਨੇ “ਹਾਊਸਕੀਪਿੰਗ” ਦੇ ਨਾਮ ‘ਤੇ ਭਰਤੀ ਕੀਤੇ ਕਰਮਚਾਰੀਆਂ ਨੂੰ ਨਕਦੀ ਗਿਣਨ ਦਾ ਕੰਮ ਸੌਂਪਿਆ, ਜਿਨ੍ਹਾਂ ਵਿੱਚੋਂ ਕੁਝ ਪਹਿਲਾਂ ਮਕੈਨਿਕ ਜਾਂ ਵਿਆਹ ਸਮਾਗਮਾਂ ਵਿੱਚ ਵੀਡੀਓਗ੍ਰਾਫਰ ਵਜੋਂ ਕੰਮ ਕਰਦੇ ਰਹੇ ਸਨ।

ਰਾਮ ਲੱਲਾ ਦੀ ਪ੍ਰਾਣ ਪ੍ਰਤਿਸ਼ਠਾ ਤੋਂ ਬਾਅਦ ਮੰਦਰ ਵਿੱਚ ਭੇਟਾਂ ਦੀ ਆਮਦ ਕਈ ਗੁਣਾ ਵਧ ਗਈ ਸੀ ਅਤੇ ਮਹਾਕੁੰਭ ਤੋਂ ਪਹਿਲਾਂ ਰੋਜ਼ਾਨਾ ਭੇਟਾਂ ਦੀ ਰਕਮ ਇੱਕ ਕਰੋੜ ਰੁਪਏ ਤੋਂ ਵੀ ਵੱਧ ਪਹੁੰਚ ਗਈ। ਇਸ ਦੌਰਾਨ SBI ਨੇ ਕਰਮਚਾਰੀ ਉਪਲਬਧ ਕਰਵਾਉਣ ਲਈ ‘ਸੈਨਿਕ ਸੁਰੱਖਿਆ ਸੇਵਾਵਾਂ’ ਨਾਲ ਸਮਝੌਤਾ ਕੀਤਾ ਸੀ। ਲਗਭਗ 44 ਕਰਮਚਾਰੀ ਦੋ ਸ਼ਿਫਟਾਂ ਵਿੱਚ ਨਕਦੀ ਦੀ ਗਿਣਤੀ ਕਰਦੇ ਸਨ। ਮਾਮਲੇ ਵਿੱਚ ਗ੍ਰਿਫ਼ਤਾਰ ਅੱਠ ਗਿਣਤੀ ਕਰਮਚਾਰੀਆਂ ਵਿੱਚੋਂ ਛੇ ਇਸ ਫਰਮ ਨਾਲ ਅਤੇ ਦੋ ਟਰੱਸਟ ਨਾਲ ਜੁੜੇ ਹੋਏ ਹਨ।

ਸੂਤਰਾਂ ਅਨੁਸਾਰ, ਐਸਆਈਟੀ ਦੀ ਰਿਪੋਰਟ ਨਾਲ ਇਹ ਵੀ ਸਪੱਸ਼ਟ ਹੋਵੇਗਾ ਕਿ ਇਸ ਮਾਮਲੇ ਵਿੱਚ ਜ਼ਿੰਮੇਵਾਰੀ ਬੈਂਕ ਦੀ ਬਣਦੀ ਹੈ ਜਾਂ ਠੇਕੇਦਾਰ ਫਰਮ ਦੀ। ਇਸੇ ਦੌਰਾਨ ਬੈਂਕ ਨੇ ਨਕਦੀ ਗਿਣਤੀ ਦੀ ਪ੍ਰਕਿਰਿਆ ਵਿੱਚ ਵੀ ਬਦਲਾਅ ਕਰਦੇ ਹੋਏ ਦੋ ਸ਼ਿਫਟਾਂ ਦੀ ਥਾਂ ਨੌਂ ਘੰਟਿਆਂ ਦੀ ਇੱਕ ਸ਼ਿਫਟ ਕਰ ਦਿੱਤੀ ਹੈ ਅਤੇ ਭਵਿੱਖ ਵਿੱਚ ਇਹ ਕੰਮ ਨਿਯਮਤ ਬੈਂਕ ਕਰਮਚਾਰੀਆਂ ਤੋਂ ਕਰਵਾਉਣ ਦੀ ਯੋਜਨਾ ਬਣਾਈ ਜਾ ਰਹੀ ਹੈ। ਹਾਲਾਂਕਿ ਬੈਂਕ ਮੈਨੇਜਰ ਅਨੂਪ ਤਿਵਾੜੀ ਨੇ ਇਸ ਮਾਮਲੇ ‘ਤੇ ਕੋਈ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ।

ਇਸ ਦਰਮਿਆਨ, ਰਾਮ ਮੰਦਰ ਟਰੱਸਟ ਦੇ ਸਾਬਕਾ ਜਨਰਲ ਸਕੱਤਰ ਚੰਪਤ ਰਾਏ ਵੱਲੋਂ ਐਸਆਈਟੀ ਨੂੰ ਭੇਜਿਆ ਗਿਆ ਪੱਤਰ ਵੀ ਜਾਂਚ ਵਿੱਚ ਅਹਿਮ ਮੰਨਿਆ ਜਾ ਰਿਹਾ ਹੈ। ਉਨ੍ਹਾਂ ਆਪਣੇ ਪੱਤਰ ਵਿੱਚ ਕਿਹਾ ਹੈ ਕਿ 9 ਫਰਵਰੀ 2024 ਦੇ ਸਮਝੌਤੇ ਦੇ ਹਰ ਪੰਨੇ ‘ਤੇ ਉਨ੍ਹਾਂ ਨੇ ਦਸਤਖ਼ਤ ਕੀਤੇ ਸਨ ਅਤੇ ਸਮਝੌਤੇ ਵਿੱਚ ਸੁਰੱਖਿਅਤ ਨਕਦੀ ਗਿਣਤੀ ਦੇ ਸਾਰੇ ਪ੍ਰਬੰਧ ਦਰਜ ਸਨ।