ਚੱਲੋ ਅੰਮ੍ਰਿਤਸਰ” ਮੁਹਿੰਮ ਤਹਿਤ ਪੰਜਾਬ ਭਰ ਦੀਆਂ ਮਹਿਲਾਵਾਂ ਇਕੱਠੀਆਂ
ਭਗਤਾਂਵਾਲਾ ਡੰਪ ਹਟਾਉਣ ਅਤੇ ਪਵਿੱਤਰ ਸ਼ਹਿਰ ਦੀ ਸਫ਼ਾਈ ਲਈ ਉਠਾਈ ਆਵਾਜ਼
ਅੰਮ੍ਰਿਤਸਰ ਦੇ 450ਵੇਂ ਸਥਾਪਨਾ ਦਿਵਸ ਸਮਾਗਮਾਂ ਤੋਂ ਪਹਿਲਾਂ ਪੰਜਾਬ ਭਰ ਦੀਆਂ ਮਹਿਲਾਵਾਂ “ਚੱਲੋ ਅੰਮ੍ਰਿਤਸਰ” ਮੁਹਿੰਮ ਹੇਠ ਇਕੱਠੀਆਂ ਹੋ ਕੇ ਪਵਿੱਤਰ ਸ਼ਹਿਰ ਦੇ ਵਾਤਾਵਰਣ ਸੰਰੱਖਣ ਅਤੇ ਟਿਕਾਊ ਸ਼ਹਿਰੀ ਪ੍ਰਬੰਧਨ ਦੀ ਮੰਗ ਲਈ ਅੱਗੇ ਆਈਆਂ ਹਨ। ਸਮਾਗਮ ਦੇ ਮੁੱਖ ਮਹਿਮਾਨ ਜਥੇਦਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਕੁਲਦੀਪ ਸਿੰਘ ਗਰਗੱਜ ਸਨ।
ਵਾਤਰੁਖ ਫਾਊਂਡੇਸ਼ਨ ਦੀ ਸੰਸਥਾਪਕ ਸਮਿਤਾ ਕੌਰ ਦੀ ਅਗਵਾਈ ਹੇਠ ਚੱਲ ਰਹੀ ਇਸ ਮੁਹਿੰਮ ਵਿੱਚ ਇੰਦੂ ਅਰੋੜਾ, ਸਵਰਨਜੀਤ ਕੌਰ, ਡਾ. ਅਮ੍ਰਿਤਾ ਰਾਣਾ, ਡਾ. ਸਿਮਰਪ੍ਰੀਤ ਸੰਧੂ, ਭੂਸ਼ਣ ਮਲਿਕ, ਰਿਤੂ ਮਲਹਾਨ, ਦਮਨਜੀਤ ਕੌਰ ਅਤੇ ਸ਼ਵੇਤਾ ਮਹਿਰਾ ਸਮੇਤ ਕਈ ਸਮਾਜਿਕ ਅਤੇ ਵਾਤਾਵਰਣ ਪ੍ਰੇਮੀ ਸ਼ਖਸੀਅਤਾਂ ਸ਼ਾਮਲ ਹੋਈਆਂ। ਇਸ ਪਹਲ ਨੂੰ ਵੋਇਸ ਆਫ ਅੰਮ੍ਰਿਤਸਰ, ਓਟੀਟੀ ਫਾਊਂਡੇਸ਼ਨ, ਅਰਥੀ ਇੰਸਟਿੰਕਟਸ, ਗ੍ਰੀਨ ਥੰਬ ਅਤੇ ਹੋਰ ਕਈ ਵਾਤਾਵਰਣ ਅਤੇ ਨਾਗਰਿਕ ਸੰਸਥਾਵਾਂ ਦਾ ਸਹਿਯੋਗ ਮਿਲ ਰਿਹਾ ਹੈ।
ਮੁਹਿੰਮ ਦਾ ਮਕਸਦ ਗੁਰੂ ਰਾਮ ਦਾਸ ਜੀ ਵੱਲੋਂ ਵਸਾਏ ਗਏ ਅੰਮ੍ਰਿਤਸਰ ਦੀ ਪੁਰਾਤਨ ਸ਼ਾਨ ਅਤੇ ਪਵਿੱਤਰਤਾ ਨੂੰ ਮੁੜ ਬਹਾਲ ਕਰਨਾ ਹੈ। ਕਦੇ ਝੀਲਾਂ, ਬਾਗਾਂ ਅਤੇ ਕੁਦਰਤੀ ਸੋਭਾ ਲਈ ਮਸ਼ਹੂਰ ਇਹ ਸ਼ਹਿਰ ਅੱਜ ਗੰਭੀਰ ਵਾਤਾਵਰਣਕ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ। ਮੁਹਿੰਮ ਨਾਲ ਜੁੜੇ ਮੈਂਬਰਾਂ ਨੇ ਮੰਗ ਕੀਤੀ ਕਿ 450ਵੇਂ ਸਥਾਪਨਾ ਸਮਾਗਮਾਂ ਤੋਂ ਪਹਿਲਾਂ ਭਗਤਾਂਵਾਲਾ ਡੰਪਿੰਗ ਗਰਾਊਂਡ ਨੂੰ ਹਟਾਇਆ ਜਾਵੇ ਅਤੇ ਅੰਮ੍ਰਿਤਸਰ ਲਈ ਲੰਬੇ ਸਮੇਂ ਲਈ ਟਿਕਾਊ ਕੂੜਾ ਪ੍ਰਬੰਧਨ ਪ੍ਰਣਾਲੀ ਲਾਗੂ ਕੀਤੀ ਜਾਵੇ।
ਉਨ੍ਹਾਂ ਦੀਆਂ ਮੁੱਖ ਮੰਗਾਂ ਵਿੱਚ ਵਿਗਿਆਨਕ ਢੰਗ ਨਾਲ ਠੋਸ ਕੂੜਾ ਪ੍ਰਬੰਧਨ, ਵਾਤਾਵਰਣ ਦੀ ਮੁੜ ਬਹਾਲੀ, ਕੂੜੇ ਦੀ ਲਾਜ਼ਮੀ ਅਲੱਗ-ਅਲੱਗ ਛਾਂਟ ਅਤੇ ਪਵਿੱਤਰ ਸ਼ਹਿਰ ਅਤੇ ਇਸਦੇ ਆਲੇ-ਦੁਆਲੇ ਸਿੰਗਲ ਯੂਜ਼ ਪਲਾਸਟਿਕ ‘ਤੇ ਪੂਰਨ ਪਾਬੰਦੀ ਸ਼ਾਮਲ ਹੈ।
ਇਸ ਮੌਕੇ ਖਾਲਸਾ ਯੂਨੀਵਰਸਿਟੀ ਵਿੱਚ “ਸ਼ਰਧਾ ਅਤੇ ਹਕੀਕਤ ਦੇ ਵਿਚਕਾਰ” ਨਾਮਕ ਡਾਕੂਮੈਂਟਰੀ ਫਿਲਮ ਵੀ ਦਿਖਾਈ ਗਈ। “ਚੱਲੋ ਅੰਮ੍ਰਿਤਸਰ” ਟੀਮ ਵੱਲੋਂ ਸੋਚੀ ਗਈ ਇਸ ਫਿਲਮ ਨੂੰ ਪੱਤਰਕਾਰਤਾ ਅਤੇ ਜਨਸੰਪਰਕ ਵਿਭਾਗ ਦੇ ਵਿਦਿਆਰਥੀਆਂ ਨੇ ਤਿਆਰ ਕੀਤਾ ਹੈ। ਫਿਲਮ ਵਿੱਚ ਅੰਮ੍ਰਿਤਸਰ ਦੇ ਪੁਰਾਣੇ ਸ਼ਹਿਰ ਵਿੱਚ ਵਧ ਰਹੇ ਵਾਤਾਵਰਣਕ ਸੰਕਟ ਅਤੇ ਭਗਤਾਂਵਾਲਾ ਲੈਂਡਫਿਲ ਕਾਰਨ ਸ਼ਹਿਰ ਦੀ ਆਧਿਆਤਮਿਕ ਅਤੇ ਸੱਭਿਆਚਾਰਕ ਪਹਿਚਾਣ ‘ਤੇ ਪੈ ਰਹੇ ਪ੍ਰਭਾਵ ਨੂੰ ਦਰਸਾਇਆ ਗਿਆ ਹੈ
ਸਾਲ 2027 ਵਿੱਚ ਸ੍ਰੀ ਅੰਮ੍ਰਿਤਸਰ ਸਾਹਿਬ ਆਪਣਾ 450ਵਾਂ ਸਥਾਪਨਾ ਵਰ੍ਹਾ ਮਨਾਉਣ ਜਾ ਰਿਹਾ ਹੈ। ਅਜਿਹੇ ਵਿੱਚ 1577 ਵਿੱਚ ਗੁਰੂ ਰਾਮ ਦਾਸ ਜੀ ਵੱਲੋਂ ਵਸਾਏ ਇਸ ਪਵਿੱਤਰ ਸ਼ਹਿਰ ਦੀ ਖਰਾਬ ਹੋ ਰਹੀ ਵਾਤਾਵਰਣਕ ਹਾਲਤ ਨੂੰ ਲੈ ਕੇ ਚਿੰਤਾਵਾਂ ਵੱਧ ਰਹੀਆਂ ਹਨ। ਸ੍ਰੀ ਦਰਬਾਰ ਸਾਹਿਬ (ਸ੍ਰੀ ਹਰਿਮੰਦਰ ਸਾਹਿਬ) ਲਈ ਵਿਸ਼ਵ ਭਰ ਵਿੱਚ ਪ੍ਰਸਿੱਧ ਅੰਮ੍ਰਿਤਸਰ ਅੱਜ ਕੂੜੇ ਅਤੇ ਸਫ਼ਾਈ ਸੰਕਟ ਨਾਲ ਜੂਝ ਰਿਹਾ ਹੈ, ਜੋ ਇਸਦੀ ਵਿਰਾਸਤ ਅਤੇ ਆਧਿਆਤਮਿਕ ਪਵਿੱਤਰਤਾ ਲਈ ਖ਼ਤਰਾ ਬਣਦਾ ਜਾ ਰਿਹਾ ਹੈ।
ਸ਼ਹਿਰ ਦੇ ਅੰਦਰੂਨੀ ਬਾਜ਼ਾਰਾਂ ਅਤੇ ਆਲੇ-ਦੁਆਲੇ ਦੇ ਇਲਾਕਿਆਂ ਵਿੱਚ ਕੂੜੇ ਦੇ ਢੇਰ ਆਮ ਦ੍ਰਿਸ਼ ਬਣ ਚੁੱਕੇ ਹਨ, ਜਦਕਿ ਭਗਤਾਂਵਾਲਾ ਡੰਪਿੰਗ ਗਰਾਊਂਡ ਸ਼ਹਿਰ ਦੇ ਵਾਤਾਵਰਣ, ਲੋਕ ਸਿਹਤ ਅਤੇ ਸੁੰਦਰਤਾ ‘ਤੇ ਗੰਭੀਰ ਅਸਰ ਪਾ ਰਿਹਾ ਹੈ। ਵਾਤਾਵਰਣ ਮਾਹਿਰਾਂ ਅਤੇ ਜਾਗਰੂਕ ਨਾਗਰਿਕਾਂ ਨੇ ਵਾਰ-ਵਾਰ ਚੇਤਾਵਨੀ ਦਿੱਤੀ ਹੈ ਕਿ ਇਸ ਲੈਂਡਫਿਲ ਤੋਂ ਨਿਕਲਣ ਵਾਲੀਆਂ ਜ਼ਹਿਰੀਲੀ ਗੈਸਾਂ ਸ੍ਰੀ ਦਰਬਾਰ ਸਾਹਿਬ ਦੇ ਆਲੇ-ਦੁਆਲੇ ਦੇ ਮਾਹੌਲ ਨੂੰ ਵੀ ਪ੍ਰਭਾਵਿਤ ਕਰ ਰਹੀਆਂ ਹਨ।
ਸਮਾਗਮ ਵਿੱਚ ਹੋਰ ਹਾਜ਼ਰ ਸ਼ਖਸੀਅਤਾਂ ਵਿੱਚ ਪੰਜਾਬ ਪ੍ਰਦੂਸ਼ਣ ਨਿਯੰਤਰਣ ਬੋਰਡ ਦੀ ਚੇਅਰਪਰਸਨ ਰੀਨਾ ਗੁਪਤਾ, ਸਾਬਕਾ ਕੈਬਿਨੇਟ ਮੰਤਰੀ ਬਿਕਰਮਜੀਤ ਸਿੰਘ ਮਜੀਠੀਆ, ਮੇਅਰ ਜਤਿੰਦਰ ਸਿੰਘ ਭਾਟੀਆ, ਐਸਜੀਪੀਸੀ ਦੀ ਸਾਬਕਾ ਜਨਰਲ ਸਕੱਤਰ ਬੀਬੀ ਕਿਰਨਜੋਤ ਕੌਰ, ਖਾਲਸਾ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ. ਮੇਹਲ ਸਿੰਘ, ਵੋਇਸ ਆਫ ਅੰਮ੍ਰਿਤਸਰ ਦੇ ਪ੍ਰਧਾਨ ਸੀਏ ਮਨਦੀਪ ਸਿੰਘ, ਵਾਤਰੁਖ ਫਾਊਂਡੇਸ਼ਨ ਦੀ ਸਮਿਤਾ ਕੌਰ ਅਤੇ ਏਅਰਕੇਅਰ ਸੈਂਟਰ ਤੋਂ ਹਰਵਿੰਦਰ ਸਿੰਘ ਸ਼ਾਮਲ ਸਨ।
