ਜੂਨ ਵਿੱਚ ਭਾਰਤ ਨੇ ਰੂਸ ਤੋਂ ਰਿਕਾਰਡ ਕੱਚਾ ਤੇਲ ਖਰੀਦਿਆ, ਆਯਾਤ ਵਿੱਚ 34 ਫੀਸਦੀ ਦਾ ਵਾਧਾ

ਨਵੀਂ ਦਿੱਲੀ : ਭਾਰਤ ਨੇ ਜੂਨ 2026 ਦੌਰਾਨ ਰੂਸ ਤੋਂ ਰਿਕਾਰਡ ਮਾਤਰਾ ਵਿੱਚ ਕੱਚੇ ਤੇਲ ਦਾ ਆਯਾਤ ਕੀਤਾ, ਜੋ ਮਈ ਦੇ ਮੁਕਾਬਲੇ 34 ਫੀਸਦੀ ਵੱਧ ਰਿਹਾ। ਹਾਲਾਂਕਿ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਤੇਲ ਦੀਆਂ ਕੀਮਤਾਂ ਵਿੱਚ ਨਰਮੀ ਕਾਰਨ ਰੂਸ ਦੀ ਤੇਲ ਨਿਰਯਾਤ ਤੋਂ ਹੋਣ ਵਾਲੀ ਆਮਦਨ ਵਿੱਚ ਕਮੀ ਦਰਜ ਕੀਤੀ ਗਈ ਹੈ। ਸੈਂਟਰ ਫਾਰ ਰਿਸਰਚ ਆਨ ਐਨਰਜੀ ਐਂਡ ਕਲੀਨ ਏਅਰ (CREA) ਦੀ ਰਿਪੋਰਟ ਅਨੁਸਾਰ, ਜੂਨ ਵਿੱਚ ਭਾਰਤ ਨੇ ਰੂਸ ਤੋਂ 5.5 ਅਰਬ ਯੂਰੋ ਦੇ ਜੀਵਾਸ਼ਮ ਈਂਧਨ ਦਾ ਆਯਾਤ ਕੀਤਾ, ਜਿਸ ਵਿੱਚੋਂ 4.5 ਅਰਬ ਯੂਰੋ ਦਾ ਹਿੱਸਾ ਸਿਰਫ਼ ਕੱਚੇ ਤੇਲ ਦਾ ਸੀ।

ਇਹ ਰੂਸ ਤੋਂ ਭਾਰਤ ਦੇ ਕੁੱਲ ਜੀਵਾਸ਼ਮ ਈਂਧਨ ਆਯਾਤ ਦਾ 83 ਫੀਸਦੀ ਬਣਦਾ ਹੈ। ਇਸ ਮਾਮਲੇ ਵਿੱਚ ਚੀਨ ਤੋਂ ਬਾਅਦ ਭਾਰਤ ਰੂਸ ਦਾ ਦੂਜਾ ਸਭ ਤੋਂ ਵੱਡਾ ਖਰੀਦਦਾਰ ਰਿਹਾ। ਰਿਪੋਰਟ ਮੁਤਾਬਕ, ਜੂਨ ਵਿੱਚ ਭਾਰਤ ਦੇ ਕੁੱਲ ਕੱਚੇ ਤੇਲ ਦੇ ਆਯਾਤ ਵਿੱਚ ਮਹੀਨਾਵਾਰ ਆਧਾਰ ‘ਤੇ 5.4 ਫੀਸਦੀ ਦਾ ਵਾਧਾ ਹੋਇਆ। ਇਸ ਦੌਰਾਨ ਰੂਸੀ ਤੇਲ ਦੀ ਸਪਲਾਈ ਭਾਰਤੀ ਰਿਫਾਈਨਰੀਆਂ ਵਿੱਚ ਕਾਫ਼ੀ ਵਧੀ।

ਰਿਲਾਇੰਸ ਇੰਡਸਟਰੀਜ਼ ਦੀ ਜਾਮਨਗਰ ਰਿਫਾਈਨਰੀ ਵਿੱਚ ਰੂਸੀ ਤੇਲ ਦੀ ਸਪਲਾਈ 150 ਫੀਸਦੀ, ਇੰਡੀਅਨ ਆਇਲ ਕਾਰਪੋਰੇਸ਼ਨ ਦੀ ਪਾਰਾਦੀਪ ਰਿਫਾਈਨਰੀ ਵਿੱਚ 126 ਫੀਸਦੀ, ਭਾਰਤ ਪੈਟਰੋਲੀਅਮ ਦੀ ਕੋਚੀ ਰਿਫਾਈਨਰੀ ਵਿੱਚ 83 ਫੀਸਦੀ ਅਤੇ ਨਾਇਰਾ ਐਨਰਜੀ ਦੀ ਵਾਡੀਨਾਰ ਰਿਫਾਈਨਰੀ ਵਿੱਚ 45 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ।

ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਰੂਸੀ ਕੱਚੇ ਤੇਲ ਤੋਂ ਤਿਆਰ ਕੀਤੇ ਗਏ ਰਿਫਾਈਨਡ ਈਂਧਨ ਦੇ ਵਿਸ਼ਵ ਵਪਾਰ ਵਿੱਚ ਵੀ ਭਾਰਤ ਦੀ ਮਹੱਤਵਪੂਰਨ ਭੂਮਿਕਾ ਹੈ। ਜੂਨ ਮਹੀਨੇ ਦੌਰਾਨ ਭਾਰਤ, ਤੁਰਕੀਏ, ਬਰੂਨੇਈ ਅਤੇ ਜਾਰਜੀਆ ਦੀਆਂ ਰਿਫਾਈਨਰੀਆਂ ਨੇ ਯੂਰਪੀ ਸੰਘ, ਅਮਰੀਕਾ ਅਤੇ ਆਸਟ੍ਰੇਲੀਆ ਵਰਗੇ ਰੂਸ ‘ਤੇ ਪਾਬੰਦੀਆਂ ਲਗਾਉਣ ਵਾਲੇ ਦੇਸ਼ਾਂ ਨੂੰ 81.4 ਕਰੋੜ ਯੂਰੋ ਮੁੱਲ ਦੇ ਪੈਟਰੋਲੀਅਮ ਉਤਪਾਦ ਨਿਰਯਾਤ ਕੀਤੇ, ਜਿਨ੍ਹਾਂ ਵਿੱਚੋਂ ਲਗਭਗ 36.9 ਕਰੋੜ ਯੂਰੋ ਦੇ ਉਤਪਾਦ ਰੂਸੀ ਕੱਚੇ ਤੇਲ ਤੋਂ ਤਿਆਰ ਕੀਤੇ ਗਏ ਸਨ।

ਰਿਪੋਰਟ ਮੁਤਾਬਕ, ਜੂਨ ਵਿੱਚ 7.3 ਅਰਬ ਯੂਰੋ ਦੇ ਆਯਾਤ ਨਾਲ ਚੀਨ ਰੂਸ ਦੇ ਜੀਵਾਸ਼ਮ ਈਂਧਨ ਦਾ ਸਭ ਤੋਂ ਵੱਡਾ ਖਰੀਦਦਾਰ ਰਿਹਾ, ਜਦਕਿ 5.5 ਅਰਬ ਯੂਰੋ ਦੇ ਆਯਾਤ ਨਾਲ ਭਾਰਤ ਦੂਜੇ ਸਥਾਨ ‘ਤੇ ਰਿਹਾ।