ਪੰਜਾਬ ‘ਚ ਸੰਵਿਧਾਨ ਨਹੀਂ, ਕੇਜਰੀਵਾਲ ਦੀ ਤਾਨਾਸ਼ਾਹੀ ਚੱਲ ਰਹੀ ਹੈ : ਤਰੁਣ ਚੁੱਘ

ਕਿਹਾ, ਕੇਜਰੀਵਾਲ ਦੀ ਦੋਹਰੀ ਨੀਤੀ ਨੇ ਪੰਜਾਬ ਨੂੰ ਪੁਲਿਸ ਰਾਜ ਵਿਚ ਬਦਲਿਆ

(ਦੁਰਗੇਸ਼ ਗਾਜਰੀ)
ਚੰਡੀਗੜ੍ਹ, 26 ਜੂਨ : ਭਾਰਤੀ ਜਨਤਾ ਪਾਰਟੀ ਦੇ ਰਾਸ਼ਟਰੀ ਜਨਰਲ ਸਕੱਤਰ ਤਰੁਣ ਚੁੱਘ ਨੇ ਸ਼੍ਰੋਮਣੀ ਅਕਾਲੀ ਦਲ ਦੇ ਨੇਤਾ ਬਿਕਰਮ ਸਿੰਘ ਮਜੀਠੀਆ ਦੀ ਗ੍ਰਿਫ਼ਤਾਰੀ ਨੂੰ ਆਮ ਆਦਮੀ ਪਾਰਟੀ ਸਰਕਾਰ ਦੀ “ਸਿਆਸੀ ਰੰਜਿਸ਼” ਕਰਾਰ ਦਿੰਦੇ ਹੋਏ ਅਰਵਿੰਦ ਕੇਜਰੀਵਾਲ ਅਤੇ ਮੁੱਖ ਮੰਤਰੀ ਭਗਵੰਤ ਮਾਨ ‘ਤੇ ਤਿੱਖੇ ਹਮਲੇ ਕੀਤੇ। ਚੁੱਘ ਨੇ ਕਿਹਾ, “ਜੇ ਮਜੀਠੀਆ ਸੱਚਮੁੱਚ ਦੋਸ਼ੀ ਸਨ ਤਾਂ ਕੇਜਰੀਵਾਲ ਨੇ 2018 ਵਿਚ ਉਨ੍ਹਾਂ ਤੋਂ ਮਾਫ਼ੀ ਕਿਉਂ ਮੰਗੀ? ਅਤੇ ਜੇ ਉਹ ਮਾਫ਼ੀ ਸਹੀ ਸੀ ਤਾਂ ਇਹ ਗ੍ਰਿਫ਼ਤਾਰੀ ਕਿਵੇਂ ਜਾਇਜ਼ ਹੈ? ਦੋਵੇਂ ਗੱਲਾਂ ਇਕੱਠੀਆਂ ਸੱਚ ਨਹੀਂ ਹੋ ਸਕਦੀਆਂ—ਇਹੀ ਕੇਜਰੀਵਾਲ ਦਾ ਅਸਲੀ ਚਿਹਰਾ ਤੇ ਪੱਖੰਡ ਹੈ।” ਉਨ੍ਹਾਂ ਕਿਹਾ ਕਿ ਪੰਜਾਬ ਤੇਜ਼ੀ ਨਾਲ “ਪੁਲਿਸ ਰਾਜ” ਵੱਲ ਵਧ ਰਿਹਾ ਹੈ। ਇੰਦਰਾ ਗਾਂਧੀ ਵਲੋਂ ਥੋਪੇ ਗਏ, ਐਮਰਜੈਂਸੀ ਦੇ ਪੰਜਾਹ ਸਾਲ ਪੂਰੇ ਹੋਣ ‘ਤੇ “ਕੇਜਰੀਵਾਲ ਨੇ ਉਸੇ ਤਾਨਾਸ਼ਾਹੀ ਸੋਚ ਨੂੰ ਪੰਜਾਬ ਵਿਚ ਮੁੜ ਜ਼ਿੰਦਾ ਕਰ ਦਿਤਾ ਹੈ, ਜਿਥੇ ਸਰਕਾਰ ਦੇ ਹੁਕਮ ‘ਤੇ ਵਿਰੋਧੀ ਆਵਾਜ਼ਾਂ ਨੂੰ ਕੁਚਲਿਆ ਜਾਂਦਾ ਸੀ।”

ਚੁੱਘ ਨੇ ਕਿਹਾ “ਯੁੱਧ ਨਸ਼ਿਆਂ ਵਿਰੁਧ” ਮੁਹਿੰਮ ਸਿਰਫ਼ ਇਕ ਪੀ.ਆਰ. ਸਟੰਟ ਸਾਬਤ ਹੋਈ ਹੈ ਜਿਸ ਦਾ ਅਸਲ ਮਕਸਦ ਨਸ਼ਿਆਂ ਖਿਲਾਫ਼ ਲੜਾਈ ਨਹੀਂ, ਸਗੋਂ ਵਿਰੋਧੀ ਆਗੂਆਂ ਨੂੰ ਡਰਾ ਕੇ ਚੁੱਪ ਕਰਵਾਉਣਾ ਹੈ। ਜੇ ਮਜੀਠੀਆ ਖ਼ਿਲਾਫ਼ ਕੋਈ ਸਬੂਤ ਹੈ ਤਾਂ ਉਸ ਨੂੰ ਜਨਤਕ ਕੀਤਾ ਜਾਵੇ, ਜਾਂਚ ਨਿਰਪੱਖ ਅਤੇ ਪਾਰਦਰਸ਼ੀ ਹੋਵੇ ਅਤੇ ਇਨਸਾਫ਼ ਜ਼ਰੂਰ ਮਿਲੇ ਪਰ ਸਰਕਾਰ ਬਦਲੇ ਦੀ ਭਾਵਨਾ ਨਾਲ ਕਾਰਵਾਈ ਕਰਕੇ ਰਾਜ ਪ੍ਰਬੰਧਨ ਦਾ ਦੁਰਉਪਯੋਗ ਨਾ ਕਰੇ। ਚੁੱਘ ਨੇ ਪੰਜਾਬ ਦੇ ਸਾਰੇ ਵਿਰੋਧੀ ਧਿਰਾਂ ਨੂੰ ਅਪੀਲ ਕੀਤੀ ਕਿ ਉਹ ਇਸ ਦਬਾਉ ਵਾਲੀ ਮਾਨਸਿਕਤਾ ਅਤੇ ਤਾਨਾਸ਼ਾਹੀ ਰਾਜਖੰਡ ਵਿਰੁਧ ਇਕੱਠੇ ਹੋ ਕੇ ਆਵਾਜ਼ ਬੁਲੰਦ ਕਰਨ। ਨਾਲ ਹੀ ਉਨ੍ਹਾਂ ਨੇ ਪੰਜਾਬ ਦੀ ਜਨਤਾ ਨੂੰ ਵੀ ਅਪੀਲ ਕੀਤੀ ਕਿ ਉਹ ਇਸ ਸੰਵਿਧਾਨ ਵਿਰੋਧੀ ਗ਼ੈਰ ਲੋਕਰਾਜੀ ਸਰਕਾਰ ਨੂੰ ਲੋਕਤਾਂਤਰਿਕ ਢੰਗ ਨਾਲ ਉਖਾੜਨ ਲਈ ਅੱਗੇ ਆਉਣ। ਉਨ੍ਹਾਂ ਕਿਹਾ, “ਜਿਸ ਪੰਜਾਬ ਨੇ ਇੰਦਰਾ ਗਾਂਧੀ ਦੀ ਐਮਰਜੈਂਸੀ ਨੂੰ ਚੁਣੌਤੀ ਦਿਤੀ ਸੀ, ਅੱਜ ਉਸੇ ਜੁਝਾਰੂਪਣ ਦੀ ਫਿਰ ਲੋੜ ਹੈ।”