78 ਸਾਲਾ ਕਰੋੜਪਤੀ ਬਿਰਧ ਔਰਤ ਨੂੰ ਧੋਖੇ ਨਾਲ ਇਕਲੌਤੇ ਪੁੱਤਰ ਨੇ ਘਰੋਂ ਕੱਢਿਆ
(ਲਖਵੀਰ ਸਿੰਘ)
ਮੋਹਾਲੀ, 25 ਜੁਲਾਈ : ਮੋਹਾਲੀ ਦੇ ਖਰੜ ਸ਼ਹਿਰ ਵਿਚ ਰਿਸ਼ਤਿਆਂ ਨੂੰ ਤਾਰ-ਤਾਰ ਕਰਨ ਵਾਲੀ ਇਕ ਘਟਨਾ ਸਾਹਮਣੇ ਆਈ ਹੈ। 78 ਸਾਲਾ ਬਿਰਧ ਮਾਂ ਜੋ ਕਿ ਕਰੋੜਾਂ ਦੀ ਮਾਲਕ ਹੈ, ਨੇ ਅਪਣੇ ਇਕਲੌਤੇ ਪੁੱਤ ਉਤੇ ਬੜੇ ਸੰਗੀਨ ਇਲਜ਼ਾਮ ਲਗਾਏ ਹਨ। ਕਿ ਜਾਇਦਾਦ ਹਥਿਆਉਣ ਪਿੱਛੇ ਸਕੇ ਪੁੱਤ ਵਲੋਂ ਉਸ ਨੂੰ ਘਨੂੰ ਘਰੋਂ ਬਾਹਰ ਕੱਢ ਦਿਤਾ, ਜਿਸ ਕਾਰਨ ਮਾਂ ਹੁਣ ਦਰ-ਦਰ ਦੀਆਂ ਠੋਕਰਾਂ ਖਾਣ ਲਈ ਮਜਬੂਰ ਹੈ। ਮਾਂ ਵਲੋਂ ਇਨਸਾਫ਼ ਲਈ ਸਰਕਾਰੇ-ਦਰਬਾਰੇ ਪਹੁੰਚ ਕਰਨ ਦੇ ਬਾਵਜੂਦ ਵੀ ਕੋਈ ਉਸ ਦੀ ਗੱਲ ਸੁਣਨ ਲਈ ਤਿਆਰ ਨਹੀਂ ਹੈ। ਇਥੇ ਮੋਹਾਲੀ ਪ੍ਰੈਸ ਕਲੱਬ ਵਿਖੇ ਇਕ ਪ੍ਰੈਸ ਕਾਨਫ਼ਰੰਸ ਦੌਰਾਨ ਅਪਣੀ ਹੱਡਬੀਤੀ ਸੁਣਾਉਂਦਿਆਂ ਪੀੜਤ ਮਹਿਲਾ ਸ੍ਰੀਮਤੀ ਪਰਮਜੀਤ ਕੌਰ ਗਰੇਵਾਲ ਪਤਨੀ ਸਾਬਕਾ ਸੀਨੀਅਰ ਅਫ਼ਸਰ ਸਵ: ਚਰਨਜੀਤ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਅਸੀਂ ਅਪਣੇ ਪੁੱਤਰ ਨੂੰ ਪੜ੍ਹਾ ਲਿਖਾ ਕੇ ਇੰਜੀਨੀਅਰ ਬਣਾਇਆ ਅਤੇ ਅਪਣੀ ਕਰੋੜਾਂ ਰੁਪਿਆਂ ਦੀ ਜਾਇਦਾਦ ਵੇਚ ਕੇ ਖਰੜ ਵਿਚ ਹੀ ਉਸ ਨੂੰ ਇਕ ਨਿੱਜੀ ਸਕੂਲ ਖੋਲ੍ਹ ਕੇ ਪੈਰਾਂ ਉਤੇ ਖੜਾ ਕੀਤਾ। ਉਨ੍ਹਾਂ ਦੱਸਿਆ ਕਿ ਮੈਂ ਅਤੇ ਮੇਰਾ ਪੁੱਤਰ ਸਿਮਰਨਪ੍ਰੀਤ ਸਿੰਘ ਗਰੇਵਾਲ, ਪਤੀ ਦੇ ਦੇਹਾਂਤ ਤੋਂ ਬਾਅਦ ਪਰਿਵਾਰ ਦੀ 50-50 ਫ਼ੀ ਸਦੀ ਜਾਇਦਾਦ ਦੇ ਮਾਲਕ ਸਨ ਜਦਕਿ ਮੇਰਾ ਪੁੱਤਰ ਸਿਮਰਨਪ੍ਰੀਤ ਸਿੰਘ ਗਰੇਵਾਲ ਬੀਤੇ 10-12 ਸਾਲਾਂ ਤੋਂ ਸਾਰੀ ਜਾਇਦਾਦ ਆਪਣੇ ਨਾਮ ਕਰਨ ਲਈ ਮੈਨੂੰ ਤੰਗ-ਪ੍ਰੇਸ਼ਾਨ ਕਰ ਰਿਹਾ ਸੀ। ਮੇਰੇ ਵਲੋਂ ਨਾਂਹ ਕਰਨ ਉਤੇ, ਉਸ ਨੇ ਸਕੂਲ ਨੂੱ ਅੱਪਗ੍ਰੇਡ ਕਰਨ ਦੇ ਬਹਾਨੇ, ਮੈਨੂੰ ਮਜ਼ਬੂਰ ਕਰਦਿਆਂ ਜ਼ਬਰਦਸਤੀ ਸਾਈਨ ਕਰਵਾ ਕੇ ਮੇਰੇ ਹਿੱਸੇ ਦੀ ਜਾਇਦਾਦ 30 ਸਾਲਾਂ ਲਈ ਲੀਜ਼, ਪੰਜਾਹ ਹਜ਼ਾਰ ਰੁਪਏ ਸਲਾਨਾ ਕਿਰਾਏ ਉਤੇ ਅਪਣੇ ਨਾਮ ਕਰਵਾ ਲਈ ਅਤੇ ਦੋਵੇਂ ਪਤੀ-ਪਤਨੀ ਆਪ ਮਾਲਕ ਬਣ ਗਏ। ਉਹਨਾਂ ਦੱਸਿਆ ਕਿ ਇਸ ਤੋਂ ਬਾਅਦ, ਉਹ ਅਪਣੀ ਬੇਟੀ ਨੂੰ ਮਿਲਣ ਲਈ ਵਿਦੇਸ਼ ਚਲੇ ਗਈ ਤਾਂ ਜਦੋਂ ਉਹ ਵਾਪਸ ਪਰਤੀ ਤਾਂ ਘਰ ਅੱਗੇ ਖੜ੍ਹੇ ਸਕਿਊਰਿਟੀ ਗਾਰਡ ਨੇ, ਮੇਰੇ ਪੁੱਤ-ਨੂੰਹ ਦੇ ਕਹਿਣ ਉਤੇ ਘਰ ਅੰਦਰ ਦਾਖਲ ਨਹੀਂ ਹੋਣ ਦਿਤਾ। ਇਥੋਂ ਤਕ ਕਿ ਘਰ ਦੀ ਤਾਲੇ ਆਦਿ ਵੀ ਬਦਲ ਦਿਤੇ। ਉਹਨਾਂ ਅਪਣਾ ਦੁੱਖ ਸਾਂਝਾ ਕਰਦਿਆਂ ਦੱਸਿਆ ਕਿ ਸਕੂਲ ਦੀ ਆਮਦਨ ਵਿਚੋਂ ਇਕ ਵੀ ਪੈਸਾ ਨਹੀਂ ਦਿਤਾ ਅਤੇ ਮੈਨੂੰ ਆਪਣਾ ਗੁਜ਼ਾਰਾ ਕਰਨਾ ਵੀ ਔਖਾ ਹੈ। ਉਹਨਾਂ ਕਿਹਾ ਕਿ ਆਖਰ ਬੇਟੀਆਂ ਹੀ ਮਾਂ ਬਾਪ ਦਾ ਸਹਾਰਾ ਬਣਦੀਆਂ ਹਨ ਅਤੇ ਉਹ ਉਸ ਕੋਲ ਚਲੇ ਗਈ। ਉਹਨਾਂ ਅੱਗੇ ਦੱਸਿਆ ਕਿ ਉਹ ਅਤੇ ਉਸਦੀ ਬੇਟੀ ਪਿਛਲੇ ਚਾਰ ਮਹੀਨਿਆਂ ਤੋਂ ਇਨਸਾਫ ਲੈਣ ਲਈ ਐਸ.ਡੀ.ਐਮ. ਖਰੜ, ਪੰਜਾਬ ਮਹਿਲਾ ਕਮਿਸ਼ਨ ਅਤੇ ਉੱਪ ਪੁਲਿਸ ਕਪਤਾਨ ਖਰੜ ਨੂੰ ਲਿਖਤੀ ਅਪੀਲਾਂ ਕੀਤੀਆਂ ਹਨ, ਪਰ ਕਈ ਮਹੀਨੇ ਬੀਤ ਜਾਣ ਦੇ ਬਾਵਜੂਦ ਅਜੇ ਤਕ ਸਾਨੂੰ ਇਨਸਾਫ ਨਹੀਂ ਮਿਲਿਆ। ਉਹਨਾਂ ਕਿਹਾ ਕਿ ਆਖਰ ਉਸ ਕੋਲ ਪ੍ਰੈਸ ਸਾਹਮਣੇ ਆ ਕੇ ਆਪਣਾ ਦੁੱਖ-ਦਰਦ ਜਨਤਕ ਕਰਨ ਤੋਂ ਬਿਨਾਂ ਕੋਈ ਚਾਰਾ ਨਹੀਂ ਸੀ ਬਚਿਆ। ਉਹਨਾਂ ਪੰਜਾਬ ਦੇ ਮੁੱਖ ਮੰਤਰੀ ਸ. ਭਗਵੰਤ ਸਿੰਘ ਮਾਨ, ਡੀਜੀਪੀ ਪੰਜਾਬ ਅਤੇ ਡੀਸੀ ਮੋਹਾਲੀ ਨੂੰ ਅਪੀਲ ਕੀਤੀ ਹੈ ਕਿ ਉਸਨੂੰ ਇਨਸਾਫ ਦਿਵਾਉਂਦਿਆਂ ਆਪਣੇ ਘਰ ਦਾ ਕਬਜ਼ਾ ਦਿੱਤਾ ਜਾਵੇ। ਜਦੋਂ ਪਰਮਜੀਤ ਕੌਰ ਗਰੇਵਾਲ ਦੇ ਪੁੱਤਰ ਸਿਮਰਨਪ੍ਰੀਤ ਸਿੰਘ ਗਰੇਵਾਲ ਨਾਲ ਗੱਲਬਾਤ ਕੀਤੀ ਤਾਂ ਉਹਨਾਂ ਅਪਣਾ ਪੱਖ ਦੱਸਦਿਆਂ ਕਿਹਾ ਕਿ ਮਾਤਾ ਆਪਣੀ ਮਰਜ਼ੀ ਨਾਲ ਘਰ ਛੱਡ ਕੇ ਗਈ ਹੈ ਕਿਉਂਕਿ ਉਹਨਾਂ ਦੀ ਇਕੋ ਇਕ ਭੈਣ ਦੀ ਉਹਨਾਂ ਦੇ ਪਰਿਵਾਰ ਵਿਚ ਨਜਾਇਜ਼ ਦਖਲਅੰਦਾਜ਼ੀ ਹੈ, ਜਿਸ ਕਾਰਨ ਰਿਸ਼ਤਿਆਂ ਵਿਚ ਦਰਾਰ ਪੈਦਾ ਹੋਈ ਹੈ। ਉਹਨਾਂ ਆਪਣੀ ਭੈਣ ਉਤੇ ਦੋਸ਼ ਲਗਾਉਂਦਿਆਂ ਕਿਹਾ ਕਿ ਉਹ ਅਪਣੀ ਮਾਤਾ ਨੂੰ ਅਪਣੇ ਹੱਕ ਵਿਚ ਕਰਕੇ ਬੇਗੋਵਾਲ ਪਿੰਡ ਵਿਚ 10 ਕਿੱਲੇ ਖੇਤੀਬਾੜੀਯੋਗ ਜ਼ਮੀਨ ਅਤੇ ਚੰਡੀਗੜ੍ਹ ਵਿਚ ਇਕ ਫਲੈਟ ਪਹਿਲਾਂ ਹੀ ਹਥਿਆ ਚੁੱਕੀ ਹੈ ਅਤੇ ਹੁਣ ਉਸਦੀ ਨਜ਼ਰ ਸਾਡੇ ਰਿਹਾਇਸ਼ੀ ਘਰ ਅਤੇ ਸਕੂਲ ਨੂੰ ਹਥਿਆਉਣ ਦੀ ਹੈ। ਉਹਨਾਂ ਸਾਫ ਕਿਹਾ ਕਿ ਨਾ ਹੀ ਉਸਨੇ ਆਪਣੀ ਮਾਂ ਨੂੰ ਘਰੋਂ ਬਾਹਰ ਕੱਢਿਆ ਹੈ ਅਤੇ ਨਾ ਹੀ ਘਰ ਵਿਚ ਦਾਖਲ ਹੋਣ ਤੋਂ ਰੋਕਿਆ। ਉਹ ਜਦੋਂ ਮਰਜ਼ੀ ਘਰ ਆ ਸਕਦੇ ਹਨ ਪਰੰਤੂ ਉਹਨਾਂ ਆਪਣੀ ਭੈਣ ਨੂੰ ਘਰ ਵਿਚ ਦਾਖਲ ਹੋਣ ਰੋਕਿਆ ਹੈ।
