ਮੁੱਖ ਮੰਤਰੀ ਦੇ ਕਾਫ਼ਲੇ ਦੀਆਂ 19 ਗੱਡੀਆਂ ‘ਚ ਡੀਜ਼ਲ ਦੀ ਥਾਂ ਭਰਿਆ ਪਾਣੀ
(ਨਿਊਜ਼ ਟਾਊਨ ਨੈਟਵਰਕ)
ਰਤਲਾਮ, 27 ਜੂਨ : ਮੱਧ-ਪ੍ਰਦੇਸ਼ ਦੇ ਰਤਲਾਮ ਵਿਚ ਅੱਜ ‘ਐਮਪੀ ਰਾਈਜ਼-2025’ ਸਮਾਗਮ ਕੀਤਾ ਜਾਣਾ ਹੈ। ਮੁੱਖ ਮੰਤਰੀ ਮੋਹਨ ਯਾਦਵ ਨੇ ਵੀ ਇਸ ਸਮਾਗਮ ਵਿਚ ਸ਼ਾਮਲ ਹੋਣਾ ਸੀ। ਪ੍ਰਸ਼ਾਸਨਿਕ ਅਧਿਕਾਰੀ ਉਨ੍ਹਾਂ ਦੇ ਪ੍ਰੋਗਰਾਮ ਦੀਆਂ ਤਿਆਰੀਆਂ ਵਿਚ ਰੁੱਝੇ ਹੋਏ ਸਨ ਪਰ ਉਨ੍ਹਾਂ ਦੇ ਆਉਣ ਤੋਂ ਪਹਿਲਾਂ ਹੀ ਇਕ ਵੱਡੀ ਕੁਤਾਹੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸੀ.ਐਮ. ਕਾਫ਼ਲੇ ਦੀਆਂ ਗੱਡੀਆਂ ਰਸਤੇ ‘ਚ ਡੀਜ਼ਲ ਭਰਵਾਉਣ ਲਈ ਇਕ ਪੰਪ ‘ਤੇ ਰੁਕੀਆਂ। ਡੀਜ਼ਲ ਭਰਵਾਉਣ ਤੋਂ ਬਾਅਦ ਇਹ ਗੱਡੀਆਂ ਥੋੜੀ ਦੂਰੀ ‘ਤੇ ਗਈਆਂ ਸਨ ਕਿ ਕਾਫ਼ਲੇ ਵਿਚ ਮੌਜੂਦ ਸਾਰੇ ਵਾਹਨ ਇਕ-ਇਕ ਕਰਕੇ ਰੁਕਦੇ ਗਏ।
ਇਹ ਘਟਨਾ ਰਾਤ 10 ਵਜੇ ਦੇ ਕਰੀਬ ਵਾਪਰੀ। ਮਾਮਲੇ ਦੀ ਜਾਂਚ ਕਰਨ ਤੋਂ ਬਾਅਦ ਪਤਾ ਲੱਗਾ ਕਿ ਇਸ ਡੀਜ਼ਲ ਵਿਚ ਪਾਣੀ ਮਿਲਾਇਆ ਗਿਆ ਸੀ, ਕਾਫ਼ਲੇ ਦੇ ਲਗਭਗ 19 ਵਾਹਨ ਸ਼ਾਮਲ ਸਨ। ਮਾਮਲੇ ਦੀ ਸੂਚਨਾ ਮਿਲਦੇ ਹੀ ਨਾਇਬ ਤਹਿਸੀਲਦਾਰ ਆਸ਼ੀਸ਼ ਉਪਾਧਿਆਏ ਅਤੇ ਖੁਰਾਕ ਅਤੇ ਸਪਲਾਈ ਅਧਿਕਾਰੀ ਸਮੇਤ ਕਈ ਅਧਿਕਾਰੀ ਮੌਕੇ ‘ਤੇ ਪਹੁੰਚ ਗਏ। ਇਸ ਤੋਂ ਬਾਅਦ ਵਾਹਨਾਂ ਦੇ ਡੀਜ਼ਲ ਟੈਂਕ ਖੋਲ੍ਹ ਕੇ ਜਾਂਚ ਕੀਤੀ ਗਈ। 20 ਲੀਟਰ ਡੀਜ਼ਲ ਵਿਚੋਂ ਲਗਭਗ 10 ਲੀਟਰ ਪਾਣੀ ਮਿਲਿਆ। ਫਿਲਹਾਲ ਪੈਟਰੋਲ ਪੰਪ ਨੂੰ ਸੀਲ ਕਰ ਦਿਤਾ ਗਿਆ ਹੈ। ਮੁੱਖ ਮੰਤਰੀ ਦੇ ਕਾਫਲੇ ਲਈ ਇੰਦੌਰ ਤੋਂ ਹੋਰ ਵਾਹਨਾਂ ਦਾ ਪ੍ਰਬੰਧ ਕੀਤਾ ਗਿਆ।
ਇਸ ਦੌਰਾਨ ਇਕ ਟਰੱਕ ਡਰਾਈਵਰ ਨੇ ਵੀ ਲਗਭਗ 200 ਲੀਟਰ ਡੀਜ਼ਲ ਭਰਵਾਇਆ ਸੀ, ਜੋ ਕੁਝ ਦੇਰ ਚੱਲਣ ਤੋਂ ਬਾਅਦ ਰੁਕ ਗਿਆ। ਫਿਰ ਅਧਿਕਾਰੀਆਂ ਨੇ ਭਾਰਤ ਪੈਟਰੋਲੀਅਮ ਦੇ ਖੇਤਰੀ ਮੈਨੇਜਰ ਸ਼੍ਰੀਧਰ ਨੂੰ ਬੁਲਾਇਆ। ਉਨ੍ਹਾਂ ਦੇ ਸਾਹਮਣੇ ਪੈਟਰੋਲ ਪੰਪ ਦੇ ਕਰਮਚਾਰੀ ਮੀਂਹ ਕਾਰਨ ਡੀਜ਼ਲ ਟੈਂਕ ਵਿਚ ਪਾਣੀ ਦੇ ਲੀਕ ਹੋਣ ਬਾਰੇ ਗੱਲ ਕਰ ਰਹੇ ਸਨ।
