ਟਰੰਪ ਨੇ ਭਾਰਤ ਨੂੰ ਛੱਡ ਕੇ 14 ਦੇਸ਼ਾਂ ‘ਤੇ ਲਗਾਇਆ 40% ਟੈਕਸ
ਵਾਸ਼ਿੰਗਟਨ, 8 ਜੁਲਾਈ (ਨਿਊਜ਼ ਟਾਊਨ ਨੈਟਵਰਕ) : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸੋਮਵਾਰ 8 ਜੁਲਾਈ 2025 ਨੂੰ 14 ਦੇਸ਼ਾਂ ‘ਤੇ ਨਵੇਂ ਵਪਾਰ ਟੈਕਸ (ਟੈਰਿਫ਼) ਲਗਾਉਣ ਦਾ ਐਲਾਨ ਕੀਤਾ। ਸਭ ਤੋਂ ਵੱਧ 40 ਫ਼ੀ ਸਦ ਚਾਰਜ ਮਿਆਂਮਾਰ ਅਤੇ ਲਾਓਸ ‘ਤੇ ਲਗਾਇਆ ਗਿਆ ਹੈ। ਇਹ ਨਵੇਂ ਨਿਯਮ 1 ਅਗਸਤ ਤੋਂ ਲਾਗੂ ਹੋਣਗੇ। ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਟਰੂਥ ਸੋਸ਼ਲ ‘ਤੇ ਇਨ੍ਹਾਂ ਟੈਰਿਫਾਂ ਬਾਰੇ ਜਾਣਕਾਰੀ ਦਿਤੀ। ਉਨ੍ਹਾਂ ਕਿਹਾ ਕਿ ਇਸ ਫੈਸਲੇ ਨਾਲ ਸਬੰਧਤ ਅਧਿਕਾਰਤ ਪੱਤਰ ਸਾਰੇ ਦੇਸ਼ਾਂ ਦੇ ਨੇਤਾਵਾਂ ਨੂੰ ਭੇਜੇ ਗਏ ਹਨ। ਟਰੰਪ ਨੇ ਇਸਨੂੰ ਟੈਰਿਫ਼ ਪੱਤਰਾਂ ਦੀ ਇਕ ਨਵੀਂ ਲਹਿਰ ਦੱਸਿਆ।
ਟਰੰਪ ਨੇ ਜਿਨ੍ਹਾਂ 14 ਦੇਸ਼ਾਂ ‘ਤੇ ਟੈਕਸ ਲਗਾਇਆ ਹੈ, ਉਨ੍ਹਾਂ ‘ਚ ਮਿਆਂਮਾਰ ‘ਤੇ 40%, ਲਾਓ ਪੀਪਲਜ਼ ਡੈਮੋਕ੍ਰੇਟਿਕ ਰੀਪਬਲਿਕ (ਲਾਓਸ)- 40%, ਕੰਬੋਡੀਆ- 36%, ਥਾਈਲੈਂਡ- 36%, ਬੰਗਲਾਦੇਸ਼- 35%, ਸਰਬੀਆ- 35%, ਇੰਡੋਨੇਸ਼ੀਆ- 32%, ਦੱਖਣੀ ਅਫਰੀਕਾ- 30%, ਬੋਸਨੀਆ ਅਤੇ ਹਰਜ਼ੇਗੋਵਿਨਾ- 30%, ਜਪਾਨ- 25%, ਕਜ਼ਾਕਿਸਤਾਨ- 25%, ਮਲੇਸ਼ੀਆ- 25%, ਦੱਖਣੀ ਕੋਰੀਆ- 25%, ਟਿਊਨੀਸ਼ੀਆ- 25% ਸ਼ਾਮਲ ਹਨ।
ਟਰੰਪ ਨੇ 14 ਦੇਸ਼ਾਂ ਨੂੰ ਭੇਜੇ ਗਏ ਅਧਿਕਾਰਤ ਪੱਤਰਾਂ ਵਿਚ ਸਖ਼ਤ ਸੁਰ ਵਿਚ ਚੇਤਾਵਨੀ ਦਿਤੀ ਹੈ ਕਿ ਜੇਕਰ ਉਹ ਬਦਲੇ ਦੀ ਕਾਰਵਾਈ ਵਜੋਂ ਅਮਰੀਕਾ ‘ਤੇ ਟੈਰਿਫ਼ ਵਧਾਉਂਦੇ ਹਨ ਤਾਂ ਅਮਰੀਕਾ ਵੀ ਓਨੀ ਹੀ ਮਾਤਰਾ ਵਿਚ ਟੈਕਸ ਅਤੇ ਹੋਰ ਵੀ ਜੋੜ ਦੇਵੇਗਾ। ਉਨ੍ਹਾਂ ਸਪੱਸ਼ਟ ਤੌਰ ‘ਤੇ ਲਿਖਿਆ, “ਜੇਕਰ ਤੁਸੀਂ ਕਿਸੇ ਵੀ ਕਾਰਨ ਕਰਕੇ ਆਪਣੇ ਟੈਰਿਫ਼ ਵਧਾਉਂਦੇ ਹੋ ਤਾਂ ਅਸੀਂ ਉਸ ਫ਼ੀ ਸਦ ਦੇ ਹਿਸਾਬ ਨਾਲ ਉਸ ‘ਤੇ ਓਨੀ ਹੀ ਮਾਤਰਾ ਵਿਚ ਵਾਧੂ ਟੈਕਸ ਲਗਾਵਾਂਗੇ ਜੋ ਤੁਸੀਂ ਵਧਾਇਆ ਹੈ।”
ਟਰੰਪ ਨੇ ਕਿਹਾ ਕਿ ਇਹ ਨਵੇਂ ਟੈਰਿਫ਼ ਸਾਲਾਂ ਪੁਰਾਣੀਆਂ ਗਲਤ ਨੀਤੀਆਂ ਨੂੰ ਠੀਕ ਕਰਨ ਲਈ ਜ਼ਰੂਰੀ ਹਨ, ਜਿਨ੍ਹਾਂ ਨੇ ਅਮਰੀਕਾ ‘ਤੇ ਵੱਡਾ ਵਪਾਰ ਘਾਟਾ ਪਾਇਆ। ਟਰੰਪ ਦੇ ਅਨੁਸਾਰ ਇਨ੍ਹਾਂ ਨੀਤੀਆਂ ਵਿਚ ਟੈਰਿਫ਼ ਅਤੇ ਗੈਰ-ਟੈਰਿਫ਼ ਦੋਵੇਂ ਰੁਕਾਵਟਾਂ ਸ਼ਾਮਲ ਹਨ। ਟਰੰਪ ਨੇ ਕਿਹਾ, ‘ਅਮਰੀਕਾ ‘ਤੇ ਇਹ ਵਪਾਰ ਘਾਟਾ ਨਾ ਸਿਰਫ਼ ਸਾਡੀ ਆਰਥਿਕਤਾ ਲਈ ਸਗੋਂ ਰਾਸ਼ਟਰੀ ਸੁਰੱਖਿਆ ਲਈ ਵੀ ਇਕ ਵੱਡਾ ਖ਼ਤਰਾ ਹੈ।‘
ਜਦੋਂ ਵ੍ਹਾਈਟ ਹਾਊਸ ਦੀ ਪ੍ਰੈਸ ਸਕੱਤਰ ਕੈਰੋਲੀਨ ਲੇਵਿਟ ਤੋਂ ਪੁੱਛਿਆ ਗਿਆ ਕਿ ਜਾਪਾਨ ਅਤੇ ਦੱਖਣੀ ਕੋਰੀਆ ਨੂੰ ਸਭ ਤੋਂ ਪਹਿਲਾਂ ਕਿਉਂ ਚੁਣਿਆ ਗਿਆ ਤਾਂ ਉਨ੍ਹਾਂ ਕਿਹਾ, “ਇਹ ਰਾਸ਼ਟਰਪਤੀ ਦਾ ਵਿਸ਼ੇਸ਼ ਅਧਿਕਾਰ ਹੈ। ਉਨ੍ਹਾਂ ਨੇ ਸਿਰਫ਼ ਉਨ੍ਹਾਂ ਦੇਸ਼ਾਂ ਨੂੰ ਚੁਣਿਆ ਜਿਨ੍ਹਾਂ ਨੂੰ ਉਹ ਢੁਕਵਾਂ ਸਮਝਦੇ ਹਨ, ਇਸ ਦੇ ਨਾਲ ਹੀ ਟਰੰਪ ਪ੍ਰਸ਼ਾਸਨ ਕਈ ਹੋਰ ਵਪਾਰਕ ਭਾਈਵਾਲਾਂ ਨਾਲ ਸਮਝੌਤੇ ਨੂੰ ਅੰਤਿਮ ਰੂਪ ਦੇਣ ਦੇ ਨੇੜੇ ਹੈ। ਰਾਸ਼ਟਰਪਤੀ ਚਾਹੁੰਦੇ ਹਨ ਕਿ ਇਹ ਸੌਦੇ ਅਮਰੀਕਾ ਲਈ ਸਭ ਤੋਂ ਵਧੀਆ ਸਾਬਤ ਹੋਣ।”
