ਟੀ-ਸੀਰੀਜ਼ ਕੰਪਨੀ ਨੇ ਦਿਲਜੀਤ ਦੋਸਾਂਝ ‘ਤੇ ਲਾਈ ਪਾਬੰਦੀ

ਦਿਲਜੀਤ ਨੂੰ ਪਾਕਿ ਅਦਾਕਾਰਾ ਨਾਲ ਕੰਮ ਕਰਨ ‘ਤੇ ਮਿਲੀ ਸਜ਼ਾ

ਚੰਡੀਗੜ੍ਹ/ਨਵੀਂ ਦਿੱਲੀ/ਮੁੰਬਈ, 5 ਜੁਲਾਈ (ਨਿਊਜ਼ ਟਾਊਨ ਨੈਟਵਰਕ) : ਫ਼ਿਲਮ ‘ਬਾਰਡਰ 2’ ਨੂੰ ਲੈ ਕੇ ਹੋਏ ਵਿਵਾਦ ਮਗਰੋਂ ਦਿ ਫ਼ੈਡਰੇਸ਼ਨ ਆਫ਼ ਵੈਸਟਰਨ ਇੰਡੀਆ ਸਿਨੇ ਇੰਪਲਾਈਜ਼ (ਐਫ਼ਡਬਲਿਊਆਈਸੀਈ) ਨੇ ਦਿਲਜੀਤ ਦੋਸਾਂਝ ਦੀ ਕਾਸਟਿੰਗ ਨੂੰ ਲੈ ਕੇ ਫ਼ਿਲਮ ਦੇ ਨਿਰਮਾਤਾਵਾਂ ਨੂੰ ਇਕ ਪੱਤਰ ਭੇਜਿਆ ਹੈ। ਜਿਸ ’ਚ ਉਨ੍ਹਾਂ ਨੇ ਮੰਗ ਕੀਤੀ ਸੀ ਕਿ ਦਿਲਜੀਤ ਦੋਸਾਂਝ ਨੂੰ ਫ਼ਿਲਮ ਤੋਂ ਹਟਾਇਆ ਜਾਵੇ ਅਤੇ ਉਨ੍ਹਾਂ ਦੇ ਦ੍ਰਿਸ਼ ਕਿਸੇ ਹੋਰ ਅਦਾਕਾਰ ਨੂੰ ਰੱਖ ਕੇ ਦੁਬਾਰਾ ਸ਼ੂਟ ਕੀਤੇ ਜਾਣੇ ਚਾਹੀਦੇ ਹਨ।

ਦਰਅਸਲ ਇਹ ਸਾਰਾ ਮਾਮਲਾ ਦਿਲਜੀਤ ਦੇ ਪਾਕਿਸਤਾਨੀ ਅਦਾਕਾਰਾ ਹਨੀਆ ਆਮਿਰ ਨਾਲ ‘ਸਰਦਾਰਜੀ 3’ ਵਿਚ ਕੰਮ ਕਰਨ ਤੋਂ ਬਾਅਦ ਸ਼ੁਰੂ ਹੋਇਆ ਸੀ। ਭਾਰਤ ਵਿਚ ਫ਼ਿਲਮ ਦੀ ਰਿਲੀਜ਼ ਰੋਕ ਦਿਤੀ ਗਈ ਹੈ। ਰਿਪੋਰਟਾਂ ਵਿਚ ਇਹ ਵੀ ਦਾਅਵਾ ਕੀਤਾ ਜਾ ਰਿਹਾ ਸੀ ਕਿ ਭੂਸ਼ਣ ਕੁਮਾਰ ਦਿਲਜੀਤ ਨੂੰ ‘ਬਾਰਡਰ 2’ ਤੋਂ ਬਾਹਰ ਕਰ ਦੇਣਗੇ। ਪਰ 2 ਜੁਲਾਈ ਨੂੰ ਦਿਲਜੀਤ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਫ਼ਿਲਮ ਨਾਲ ਸਬੰਧਤ ਇਕ ਵੀਡੀਓ ਸਾਂਝਾ ਕੀਤਾ ਅਤੇ ਆਪਣੀ ਮੌਜੂਦਗੀ ਦੀ ਪੁਸ਼ਟੀ ਕੀਤੀ।

ਹਾਲ ਹੀ ਵਿਚ (ਐਫ਼ਡਬਲਿਊਆਈਸੀਈ) ਨੇਤਾ ਬੀਐਨ ਤਿਵਾੜੀ ਨੇ ਇਸ ਮਾਮਲੇ ‘ਤੇ ਕੁਝ ਅਪਡੇਟਸ ਦਿਤੇ ਹਨ। ਉਨ੍ਹਾਂ ਕਿਹਾ – ਅਸੀਂ ਭੂਸ਼ਣ ਕੁਮਾਰ ਨੂੰ ਕਈ ਵਾਰ ਮਿਲੇ ਹਾਂ। ਉਨ੍ਹਾਂ ਨੇ ਸਾਨੂੰ ਦੱਸਿਆ ਕਿ ਫ਼ਿਲਮ ਦੀ ਸ਼ੂਟਿੰਗ ਲਗਭਗ ਪੂਰੀ ਹੋ ਗਈ ਹੈ। ਇਕ ਛੋਟਾ ਜਿਹਾ ਹਿੱਸਾ ਬਾਕੀ ਹੈ, ਜਿਸ ਵਿਚ ਗੀਤ ਦੀ ਸ਼ੂਟਿੰਗ ਬਾਕੀ ਹੈ। ਉਨ੍ਹਾਂ ਨੇ ਸਾਨੂੰ ਦੱਸਿਆ ਕਿ ਜੇਕਰ ਦਿਲਜੀਤ ਨੂੰ ਇਸ ਸਮੇਂ ਫ਼ਿਲਮ ਤੋਂ ਹਟਾ ਦਿਤਾ ਜਾਂਦਾ ਹੈ ਤਾਂ ਫ਼ਿਲਮ ਨਿਰਮਾਣ ਨੂੰ ਬਹੁਤ ਨੁਕਸਾਨ ਹੋਵੇਗਾ। ਇਸ ਲਈ ਅਸੀਂ ਵੀ ਸੋਚਿਆ ਕਿ ਉਹ ਸਹੀ ਹਨ, ਅਸੀਂ ‘ਬਾਰਡਰ 2’ ‘ਤੇ ਲੱਗੀ ਪਾਬੰਦੀ ਹਟਾ ਦਿਤੀ ਹੈ।

ਅਦਾਕਾਰ, ਦਿ ਫੈਡਰੇਸ਼ਨ ਆਫ ਵੈਸਟਰਨ ਇੰਡੀਆ ਸਿਨੇ ਇੰਪਲਾਈਜ਼ ਕਮੇਟੀ ਦੇ ਸਲਾਹਕਾਰ ਅਸ਼ੋਕ ਪੰਡਿਤ ਨੇ ਇਹ ਵੀ ਦੱਸਿਆ ਹੈ ਕਿ ਭੂਸ਼ਣ ਕੁਮਾਰ ਨੇ ਲਿਖਤੀ ਰੂਪ ਵਿਚ ਦਿਤਾ ਹੈ ਕਿ ਉਹ ਕਦੇ ਵੀ ਦਿਲਜੀਤ ਦੋਸਾਂਝ ਨੂੰ ਆਪਣੇ ਪ੍ਰੋਡਕਸ਼ਨ ਅਧੀਨ ਕਿਸੇ ਵੀ ਫ਼ਿਲਮ ਲਈ ਕਾਸਟ ਨਹੀਂ ਕਰਨਗੇ। ਅਸ਼ੋਕ ਨੇ ਕਿਹਾ ਕਿ ਫ਼ਿਲਮ ਦੀ 80-85 ਫੀਸਦ ਸ਼ੂਟਿੰਗ ਹੋ ਚੁੱਕੀ ਹੈ। ਦਿਲਜੀਤ ਦਾ ਕੰਮ ਲਗਭਗ ਪੂਰਾ ਹੋ ਗਿਆ ਹੈ। ਭੂਸ਼ਣ ਕੁਮਾਰ ਨੇ ਫੈਡਰੇਸ਼ਨ ਤੋਂ ਫ਼ਿਲਮ ਨੂੰ ਪੂਰਾ ਕਰਨ ਦੀ ਇਜਾਜ਼ਤ ਮੰਗੀ ਹੈ ਅਤੇ ਉਹ ਭਵਿੱਖ ਵਿਚ ਕਦੇ ਵੀ ਦਿਲਜੀਤ ਨੂੰ ਕਾਸਟ ਨਹੀਂ ਕਰਨਗੇ। ਉਹ ਇਸ ਬਾਰੇ ਫੈਡਰੇਸ਼ਨ ਨੂੰ ਜਲਦੀ ਹੀ ਇਕ ਪੱਤਰ ਦੇਣ ਜਾ ਰਹੇ ਹਨ।

ਅਸ਼ੋਕ ਨੇ ਅੱਗੇ ਕਿਹਾ ਕਿ ਅਸੀਂ ਨਹੀਂ ਚਾਹੁੰਦੇ ਕਿ ਇੰਡਸਟਰੀ ਦੇ ਨਿਰਮਾਤਾਵਾਂ ਨੂੰ ਵਿੱਤੀ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪਵੇ। ਬਾਕੀ ਫ਼ਿਲਮ ਨਿਰਮਾਤਾਵਾਂ ਨੂੰ ਦਿਲਜੀਤ ਨਾਲ ਕੰਮ ਕਰਨ ਦੀ ਇਜਾਜ਼ਤ ਨਹੀਂ ਦਿਤੀ ਜਾਵੇਗੀ। ਭਵਿੱਖ ਵਿਚ ਜੋ ਵੀ ਸਾਡੇ ਤੋਂ ਉੱਪਰ ਦਿਲਜੀਤ ਨਾਲ ਕੰਮ ਕਰੇਗਾ ਉਸਨੂੰ ਵਿੱਤੀ ਨੁਕਸਾਨ ਹੋਵੇਗਾ ਅਤੇ ਇਸ ਵਿਚ ਫੈਡਰੇਸ਼ਨ ਦੀ ਕੋਈ ਗਲਤੀ ਨਹੀਂ ਹੋਵੇਗੀ। ਫਿਲਹਾਲ ਅਸੀਂ ਇਸ ਸਥਿਤੀ ਵਿਚ ਨਿਰਮਾਤਾ ਦਾ ਸਮਰਥਨ ਕਰਨ ਦਾ ਫੈਸਲਾ ਕੀਤਾ ਹੈ।

ਬੀਐਨ ਤਿਵਾੜੀ ਨੇ ਕਿਹਾ ਕਿ ਅਸੀਂ ਨਹੀਂ ਚਾਹੁੰਦੇ ਕਿ ਪੂਰੀ ਟੀਮ ਇਕ ਵਿਅਕਤੀ ਕਾਰਨ ਦੁਖੀ ਹੋਵੇ। ਫ਼ਿਲਮ ਵਿਚ ਸੰਨੀ ਦਿਓਲ, ਵਰੁਣ ਧਵਨ ਅਤੇ ਅਹਾਨ ਸ਼ੈੱਟੀ ਹਨ। ਅਸੀਂ ਉਨ੍ਹਾਂ ਦਾ ਪੂਰਾ ਸਮਰਥਨ ਕਰਦੇ ਹਾਂ। ਫ਼ਿਲਮ ਵਿਚ ਉਨ੍ਹਾਂ ਦੀ ਵੱਡੀ ਭੂਮਿਕਾ ਹੈ। ਸਾਡੇ ਸ਼ੁਰੂ ਤੋਂ ਹੀ ਪ੍ਰੋਡਕਸ਼ਨ ਨਾਲ ਚੰਗੇ ਸਬੰਧ ਰਹੇ ਹਨ। ਇਸ ਲਈ ਅਸੀਂ ਪਾਬੰਦੀ ਹਟਾਉਣ ਬਾਰੇ ਸੋਚਿਆ। ਇਸ ਤੋਂ ਇਲਾਵਾ ਫ਼ਿਲਮ ਵਿਚ ਕੋਈ ਪਾਕਿਸਤਾਨੀ ਕਲਾਕਾਰ ਨਹੀਂ ਹੈ। ਇਹ ਫ਼ਿਲਮ ਸਾਡੀ ਫ਼ੌਜ ਅਤੇ ਰਾਸ਼ਟਰੀ ਮੁੱਦਿਆਂ ‘ਤੇ ਅਧਾਰਤ ਹੈ। ਇਸ ਲਈ ਅਸੀਂ ਭੂਸ਼ਣ ਕੁਮਾਰ ਦੀ ਬੇਨਤੀ ਨੂੰ ਸਵੀਕਾਰ ਕਰ ਲਿਆ ਹੈ ਅਤੇ ਟੀਮ ਦਿਲਜੀਤ ਨਾਲ ਕੰਮ ਕਰਨ ਲਈ ਸਹਿਮਤ ਹੋ ਗਈ ਹੈ।