ਲਖਨਊ ‘ਚ 2000 ਲੋਕਾਂ ਨੇ ਇਜ਼ਰਾਈਲ ਵਿਰੁੱਧ ਕੀਤਾ ਪ੍ਰਦਰਸ਼ਨ
(ਨਿਊਜ਼ ਟਾਊਨ ਨੈਟਵਰਕ)
ਲਖਨਊ, 23 ਜੂਨ : ਲਖਨਊ ‘ਚ ਐਤਵਾਰ ਅੱਧੀ ਰਾਤ ਨੂੰ ਲਗਭਗ 2,000 ਲੋਕਾਂ ਨੇ ਇਜ਼ਰਾਈਲ ਵਿਰੁੱਧ ਪ੍ਰਦਰਸ਼ਨ ਕਰਦੇ ਦੇਖਿਆ ਗਿਆ। ਦਰਗਾਹ ਹਜ਼ਰਤ ਅੱਬਾਸ ਵਿਖੇ ਇਕੱਠੇ ਹੋਏ ਸ਼ੀਆ ਭਾਈਚਾਰੇ ਦੇ ਲੋਕਾਂ ਨੇ ‘ਇਜ਼ਰਾਈਲ ਮੁਰਦਾਬਾਦ’ ਅਤੇ ‘ਨੇਤਨਯਾਹੂ ਮੁਰਦਾਬਾਦ’ ਦੇ ਜ਼ੋਰਦਾਰ ਨਾਹਰੇ ਲਗਾਏ। ਇਹ ਲੋਕ ਆਲ ਇੰਡੀਆ ਸੈਂਟਰ ਬੋਰਡ ਆਫ਼ ਅਜ਼ਾਦਰੀ ਇਜਲਾਸ 2025 ‘ਚ ਸ਼ਾਮਲ ਹੋਣ ਲਈ ਆਏ ਸਨ।
ਲਗਭਗ 80 ਸੰਗਠਨਾਂ ਦੇ ਪ੍ਰਤੀਨਿਧੀ ਮੁਹੱਰਮ ਦੀਆਂ ਤਿਆਰੀਆਂ ‘ਤੇ ਵੀ ਚਰਚਾ ਕਰ ਰਹੇ ਸਨ। ਇਸ ਦੌਰਾਨ ਮੌਲਾਨਾਵਾਂ ਨੇ ਸਟੇਜ ਤੋਂ ‘ਇਰਾਨ ਜ਼ਿੰਦਾਬਾਦ’ ਦੇ ਨਾਹਰੇ ਲਗਾਏ ਤੇ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਵਿਰੁੱਧ ਸਖ਼ਤ ਵਿਰੋਧ ਪ੍ਰਗਟ ਕੀਤਾ।
ਦਰਗਾਹ ਹਜ਼ਰਤ ਅੱਬਾਸ ਦੇ ਮੁਤਵੱਲੀ ਮਿਸਮ ਰਿਜ਼ਵੀ ਨੇ ਕਿਹਾ ਕਿ ਹਰ ਸਾਲ ਮੁਹੱਰਮ ਤੋਂ ਪਹਿਲਾਂ ਇਹ ਸੰਗਠਨਾਂ ਦਾ ਸਾਲਾਨਾ ਸਮਾਗਮ ਹੁੰਦਾ ਹੈ, ਜਿਸ ‘ਚ ਮੁਹੱਰਮ ਦੀਆਂ ਤਿਆਰੀਆਂ ਦਾ ਵਿਸਤ੍ਰਿਤ ਖਰੜਾ ਤਿਆਰ ਕੀਤਾ ਜਾਂਦਾ ਹੈ। ਇਸ ਸਾਲ ਨਾ ਸਿਰਫ਼ ਮੁਹੱਰਮ ਦੀ ਯੋਜਨਾ ਬਣਾਈ ਗਈ ਸੀ, ਸਗੋਂ ਇਰਾਨ ਅਤੇ ਇਜ਼ਰਾਈਲ ਵਿਚਕਾਰ ਚੱਲ ਰਹੇ ਟਕਰਾਅ ‘ਤੇ ਵੀ ਚਰਚਾ ਕੀਤੀ ਗਈ। ਇਸ ਮੌਕੇ ਵੱਡੀ ਗਿਣਤੀ ‘ਚ ਲੋਕ ਇਜ਼ਰਾਈਲ ਦੇ ਵਿਰੋਧ ‘ਚ ਅਤੇ ਇਰਾਨ ਦੇ ਸਮਰਥਨ ‘ਚ ਖੜ੍ਹੇ ਦੇਖੇ ਗਏ। ਉਨ੍ਹਾਂ ਨੇ ਇਰਾਨ ਦੇ ਸਰਵਉੱਚ ਨੇਤਾ ਅਯਾਤੁੱਲਾ ਅਲੀ ਖਮੇਨੀ ਲਈ ਵੀ ਪ੍ਰਾਰਥਨਾ ਕੀਤੀ।
ਮਿਸਮ ਰਿਜ਼ਵੀ ਨੇ ਕਿਹਾ ਕਿ ਅਮਰੀਕਾ ਅਤੇ ਇਜ਼ਰਾਈਲ ਦੋਵੇਂ ਅੱਤਵਾਦੀ ਦੇਸ਼ ਹਨ। ਜਦੋਂ ਇਜ਼ਰਾਈਲ ਨੂੰ ਹਾਰ ਦਾ ਡਰ ਸਤਾਉਣ ਲੱਗਾ ਤਾਂ ਉਸਨੂੰ ਅਮਰੀਕਾ ਅੱਗੇ ਗੋਡੇ ਟੇਕਣ ਲਈ ਮਜਬੂਰ ਹੋਣਾ ਪਿਆ। ਉਹ ਅਮਰੀਕਾ ਦੁਆਰਾ ਇਰਾਨ ‘ਤੇ ਹਮਲੇ ਨੂੰ ਇਸ ਗੱਲ ਦਾ ਸਬੂਤ ਮੰਨਦੇ ਹਨ ਕਿ ਇਜ਼ਰਾਈਲ ਯੁੱਧ ‘ਚ ਕਮਜ਼ੋਰ ਪੈ ਰਿਹਾ ਹੈ। ਹਾਰ ਦਾ ਪਰਛਾਵਾਂ ਨੇਤਨਯਾਹੂ ‘ਤੇ ਮੰਡਰਾ ਰਿਹਾ ਹੈ ਤੇ ਉਹ ਇਕੱਲੇ ਇਰਾਨ ਦਾ ਸਾਹਮਣਾ ਕਰਨ ਦੇ ਯੋਗ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਇਜ਼ਰਾਈਲ ਨੇ ਫਲਸਤੀਨ ਅਤੇ ਗਾਜ਼ਾ ‘ਚ ਬੇਕਸੂਰ ਲੋਕਾਂ, ਖਾਸ ਕਰਕੇ ਬੱਚਿਆਂ ਅਤੇ ਔਰਤਾਂ ਨੂੰ ਬੇਰਹਿਮੀ ਨਾਲ ਮਾਰਿਆ ਹੈ। ਇਰਾਨ ਇਸ ਹਿੰਸਾ ਦਾ ਬਦਲਾ ਲੈ ਰਿਹਾ ਹੈ। ਇਜ਼ਰਾਈਲ ਚਾਹੁੰਦਾ ਹੈ ਕਿ ਇਰਾਨ ਦੂਜੇ ਦੇਸ਼ਾਂ ਵਾਂਗ ਆਪਣਾ ਸਰਪ੍ਰਸਤ ਬਣੇ ਪਰ ਇਰਾਨ ਝੁਕਣ ਲਈ ਤਿਆਰ ਨਹੀਂ ਹੈ। ਇਸ ਲਈ ਘਬਰਾਹਟ ‘ਚ ਆਇਆ ਇਜ਼ਰਾਈਲ ਆਪਣੇ ਅਪਰਾਧਾਂ ਦੀ ਕੀਮਤ ਚੁਕਾ ਰਿਹਾ ਹੈ।
ਮਿਸਮ ਰਿਜ਼ਵੀ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੀ ਮੁੱਖ ਕੋਸ਼ਿਸ਼ ਮੁਹੱਰਮ ਸਮਾਗਮ ਨੂੰ ਸੁਚਾਰੂ ਢੰਗ ਨਾਲ ਕਰਵਾਉਣਾ ਹੈ। ਪ੍ਰਸ਼ਾਸਨ ਅਤੇ ਸਰਕਾਰ ਦੇ ਸਹਿਯੋਗ ਨਾਲ ਸਾਰੇ ਸੰਗਠਨਾਂ ਨਾਲ ਗੱਲਬਾਤ ਚੱਲ ਰਹੀ ਹੈ ਤਾਂ ਜੋ ਜਲੂਸ, ਮਜਲਿਸ ਅਤੇ ਸੋਗ ਵਰਗੇ ਰਵਾਇਤੀ ਪ੍ਰੋਗਰਾਮਾਂ ਨੂੰ ਬਿਨਾਂ ਕਿਸੇ ਰੁਕਾਵਟ ਦੇ ਚਲਾਇਆ ਜਾ ਸਕੇ ਤਾਂ ਜੋ ਕੋਈ ਸਮੱਸਿਆ ਨਾ ਆਵੇ।
