ਉਪ ਚੋਣ ‘ਚ ਕਾਂਗਰਸ ਨਹੀਂ, ਕਿਸੇ ਦਾ ਹੰਕਾਰ ਹਾਰ ਗਿਆ : ਬੈਂਸ

ਕਿਹਾ, ਆਸ਼ੂ ਆਜ਼ਾਦ ਚੋਣ ਜਿੱਤ ਕੇ ਵਿਖਾਵੇ

(ਕਮਲ ਕਪੂਰ)
ਲੁਧਿਆਣਾ, 26 ਜੂਨ : ਲੁਧਿਆਣਾ ਪੱਛਮੀ ਦੀ ਉਪ ਚੋਣ ਵਿਚ ਕਾਂਗਰਸ ਦੀ ਕਰਾਰੀ ਹਾਰ ਤੋਂ ਬਾਅਦ ਪਾਰਟੀ ਦੀ ਅੰਦਰੂਨੀ ਧੜੇਬੰਦੀ ਖੁੱਲ੍ਹ ਕੇ ਸਾਹਮਣੇ ਆ ਰਹੀ ਹੈ। ਉਪ ਚੋਣ ਵਿਚ ਪਾਰਟੀ ਦੇ ਉਮੀਦਵਾਰ ਰਹੇ ਭਾਰਤ ਭੂਸ਼ਣ ਆਸ਼ੂ ਦੇ ਬਿਆਨ ਤੋਂ ਬਾਅਦ, ਹੁਣ ਸਾਬਕਾ ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਨੇ ਹਮਲਾ ਕੀਤਾ ਹੈ। ਉਨ੍ਹਾਂ ਨੇ ਆਸ਼ੂ ਨੂੰ ਆਜ਼ਾਦ ਤੌਰ ‘ਤੇ ਚੋਣ ਲੜਨ ਦੀ ਚੁਣੌਤੀ ਦਿਤੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਰਾਹੁਲ ਗਾਂਧੀ ਦੇ ਲੰਗੜੇ ਘੋੜੇ ਵਾਲਾ ਬਿਆਨ ਵੀ ਉਠਾਇਆ ਹੈ। ਆਸ਼ੂ ਨੇ ਇਕ ਇੰਟਰਵਿਊ ਵਿਚ ਕਿਹਾ ਸੀ ਕਿ ਚੋਣ ਪ੍ਰਚਾਰ ਸਾਰੇ ਕਾਂਗਰਸੀਆਂ ਦੀ ਜ਼ਿੰਮੇਵਾਰੀ ਸੀ ਅਤੇ ਇਹ ਕੋਈ ਵਿਆਹ ਸਮਾਗਮ ਨਹੀਂ ਸੀ ਜਿਸ ਵਿਚ ਸੱਦਾ-ਪੱਤਰ ਦੇਣੇ ਪੈਣ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਹ ਅਜੇ ਤਕ ਸਿਮਰਜੀਤ ਸਿੰਘ ਬੈਂਸ ਨੂੰ ਕਾਂਗਰਸੀ ਆਗੂ ਵਜੋਂ ਸਵੀਕਾਰ ਨਹੀਂ ਕਰਦੇ। ਇਸ ਬਿਆਨ ਦਾ ਜਵਾਬ ਦਿੰਦੇ ਹੋਏ ਬੈਂਸ ਨੇ ਕਿਹਾ ਕਿ ਉਪ ਚੋਣ ਵਿਚ ਕਾਂਗਰਸ ਨਹੀਂ, ਸਗੋਂ ਹੰਕਾਰ ਹਾਰ ਗਿਆ ਹੈ ਅਤੇ ਨਿਮਰਤਾ ਜਿੱਤ ਗਈ ਹੈ। ਉਨ੍ਹਾਂ ਆਸ਼ੂ ਨੂੰ ਚੁਣੌਤੀ ਦਿੰਦੇ ਹੋਏ ਕਿਹਾ ਕਿ ਜੇ ਆਸ਼ੂ ਆਜ਼ਾਦ ਤੌਰ ‘ਤੇ ਚੋਣ ਜਿਤਦੇ ਹਨ ਤਾਂ ਉਹ ਕਦੇ ਵੀ ਚੋਣ ਨਹੀਂ ਲੜਨਗੇ ਅਤੇ ਇਕ ਵਰਕਰ ਵਜੋਂ ਕਾਂਗਰਸ ਦੀ ਸੇਵਾ ਕਰਦੇ ਰਹਿਣਗੇ। ਬੈਂਸ ਨੇ ਯਾਦ ਦਿਵਾਇਆ ਕਿ ਉਹ ਖ਼ੁਦ ਇਕ ਆਜ਼ਾਦ ਵਿਧਾਇਕ ਰਹੇ ਹਨ।