ਹੈਦਰਾਬਾਦ, 11 ਸਤੰਬਰ (ਨਿਊਜ਼ ਟਾਊਨ ਨੈੱਟਵਰਕ) :

ਇੱਕ 10 ਸਾਲ ਦੀ ਕੁੜੀ ‘ਤੇ 21 ਵਾਰ ਚਾਕੂ ਨਾਲ ਵਾਰ ਕੀਤੇ ਗਏ! ਕਾਰਨ? ਸਿਰਫ਼ ਕ੍ਰਿਕਟ ਬੈਟ ਚੋਰੀ ਕਰਨ ਦੀ ਇੱਛਾ। ਹੈਦਰਾਬਾਦ ਤੋਂ ਇਹ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਸਹਸਰਾ ਨਾਮ ਦੀ ਇਹ ਕੁੜੀ ਛੇਵੀਂ ਜਮਾਤ ਦੀ ਵਿਦਿਆਰਥਣ ਸੀ। ਉਸ ਦਾ ਪਿਤਾ ਇੱਕ ਬਾਈਕ ਮਕੈਨਿਕ ਸੀ ਉਸ ਦੀ ਮਾਂ ਇੱਕ ਲੈਬ ਟੈਕਨੀਸ਼ੀਅਨ ਸੀ ਇੱਕ ਸਾਦਾ ਮੱਧ ਵਰਗੀ ਜੀਵਨ ਬਤੀਤ ਕਰਦੀ ਸੀ। ਸੋਮਵਾਰ ਦਾ ਦਿਨ ਸੀ ਉਸ ਦਾ ਛੋਟਾ ਭਰਾ ਜੋ ਕਿ ਸਿਰਫ 6 ਸਾਲ ਦਾ ਹੈ ਸਕੂਲ ਗਿਆ ਹੋਇਆ ਸੀ ਅਤੇ ਸਹਸਰਾ ਘਰ ਵਿੱਚ ਇਕੱਲੀ ਸੀ। ਉਸੇ ਸਮੇਂ ਇਹ ਘਟਨਾ ਵਾਪਰੀ।

ਗੁਆਂਢੀ ਮੁੰਡੇ ਦਾ ਭਿਆਨਕ ਕਾਰਨਾਮਾ
ਪੁਲਿਸ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਉਸ ਦੇ ਘਰ ਦੇ ਨਾਲ ਰਹਿਣ ਵਾਲਾ ਇੱਕ 14 ਸਾਲ ਦਾ ਮੁੰਡਾ ਚੋਰੀ-ਛਿਪੇ ਘਰ ਵਿੱਚ ਦਾਖਲ ਹੋ ਗਿਆ। ਹੱਥ ਵਿੱਚ ਚਾਕੂ… ਅਤੇ ਫਿਰ ਜੋ ਹੋਇਆ ਉਹ ਤੁਹਾਡੀ ਰੂਹ ਨੂੰ ਕੰਬਾ ਦੇਵੇਗਾ। ਉਸ ਨੇ ਉਸ ਮਾਸੂਮ ਕੁੜੀ ‘ਤੇ 21 ਵਾਰ ਹਮਲਾ ਕੀਤਾ। ਪੁਲਿਸ ਦੇ ਅਨੁਸਾਰ ਮੁੰਡਾ ਸਹਸਰਾ ਦਾ ਕ੍ਰਿਕਟ ਬੈਟ ਚੋਰੀ ਕਰਨਾ ਚਾਹੁੰਦਾ ਸੀ।

ਜਦੋਂ ਪਿਤਾ ਵਾਪਸ ਆਇਆ ਤਾਂ ਲੱਗਿਆ ਪਤਾ…
ਉਸ ਦੁਪਹਿਰ ਜਦੋਂ ਸਹਸਰਾ ਦਾ ਪਿਤਾ ਘਰ ਵਾਪਸ ਆਇਆ, ਤਾਂ ਉਸ ਨੇ ਇੱਕ ਅਜਿਹਾ ਦ੍ਰਿਸ਼ ਦੇਖਿਆ ਜਿਸਨੇ ਉਸ ਦੀ ਜ਼ਿੰਦਗੀ ਨੂੰ ਉਲਟਾ ਦਿੱਤਾ। ਉਸ ਦੀ ਮਾਸੂਮ ਧੀ ਖੂਨ ਨਾਲ ਲੱਥਪੱਥ ਪਈ ਸੀ। ਉੱਥੋਂ ਮਾਮਲਾ ਪੁਲਿਸ ਤੱਕ ਪਹੁੰਚਿਆ ਅਤੇ ਪੂਰੇ ਇਲਾਕੇ ਵਿੱਚ ਸਨਸਨੀ ਫੈਲ ਗਈ।

ਸਾਈਬਰਾਬਾਦ ਪੁਲਿਸ ਨੇ ਕਈ ਟੀਮਾਂ ਬਣਾਈਆਂ ਅਤੇ ਚਾਰ ਦਿਨਾਂ ਦੀ ਭਾਲ ਤੋਂ ਬਾਅਦ ਗੁਆਂਢੀ ਮੁੰਡੇ ਨੂੰ ਫੜ ਲਿਆ। ਪੁੱਛਗਿੱਛ ਦੌਰਾਨ ਉਸ ਨੇ ਇਹ ਵੀ ਕਬੂਲ ਕੀਤਾ ਕਿ ਉਸ ਨੇ ਸਹਸਰਾ ਨੂੰ ਮਾਰਿਆ ਹੈ। ਪਰ ਪੁਲਿਸ ਲਈ ਵੱਡਾ ਸਵਾਲ ਅਜੇ ਵੀ ਹੈ – ਜੇਕਰ ਉਹ ਸਿਰਫ ਕ੍ਰਿਕਟ ਬੈਟ ਚੋਰੀ ਕਰਨਾ ਚਾਹੁੰਦਾ ਸੀ, ਤਾਂ ਮੁੰਡਾ ਚਾਕੂ ਕਿਉਂ ਲੈ ਕੇ ਆਇਆ?