ਸਾਂਸਦ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਸਿੰਬਲੀ ਡਰੇਨ ਦਾ ਕੀਤਾ ਦੌਰਾ
ਨੈਸ਼ਨਲ ਮਾਰਗ ਹੇਠੋਂ ਲੰਘਦੀ ਸਿੰਬਲੀ ਡਰੇਨ ਦੀ ਰਿਪੋਰਟ ਹਫਤੇ ਵਿਚ ਦੇਣ ਦੀਆਂ ਹਿਦਾਇਤਾਂ
ਨਵਾਂ ਸ਼ਹਿਰ, 4 ਅਗੱਸਤ (ਜਤਿੰਦਰ ਪਾਲ ਸਿੰਘ ਕਲੇਰ) : ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਸਿੰਬਲੀ ਡਰੇਨ ਦਾ ਦੌਰਾ ਕੀਤਾ। ਇਸ ਡਰੇਨ ਰਾਹੀ ਚਿੱਟੀ ਵੇਂਈ ਵਿਚ 200 ਕਿਊਸਿਕ ਪਾਣੀ ਛੱਡਿਆ ਜਾਣਾ ਹੈ ਪਰ ਜਲੰਧਰ-ਨਵਾਂ ਸ਼ਹਿਰ-ਰੋਪੜ ਨੈਸ਼ਨਲ ਹਾਈਵੇਅ ਹੇਠੋਂ ਦੀ ਲੰਘਦੀ ਸਿੰਬਲੀ ਡਰੇਨ ਦਾ ਪੁੱਲ ਸਹੀ ਢੰਗ ਨਾਲ ਨਾ ਬਣਿਆ ਹੋਣ ਕਾਰਣ ਇੱਥੇ ਪਾਣੀ ਰੁਕ ਜਾਂਦਾ ਹੈ। ਜਿਸ ਨਾਲ ਹੜ੍ਹਾਂ ਦੌਰਾਨ ਕਿਸਾਨਾਂ ਦੀਆਂ ਜਿੱਥੇ ਫਸਲਾਂ ਬਰਬਾਦ ਹੁੰਦੀਆਂ ਹਨ ਉਥੇ ਪਾਣੀ ਦੀ ਨਿਕਾਸੀ ਸਹੀ ਢੰਗ ਨਾਲ ਨਹੀ ਹੁੰਦੀ। ਸਮਤ ਸੀਚੇਵਾਲ ਨੇ ਇਸ ਮਾਮਲੇ ਨੂੰ ਸੜਕੀ ਆਵਾਜਾਈ ਬਾਰੇ ਕੇਂਦਰੀ ਮੰਤਰੀ ਸ਼੍ਰੀ ਨਿਤਿਨ ਗਡਕਰੀ ਕੋਲ ਵੀ ਉੇਠਾਇਆ ਸੀ ਤੇ ਉਹਨਾਂ ਦੇ ਵਿਭਾਗ ਨਾਲ ਪੱਤਰ ਵਿਹਾਰ ਕਰਦਿਆ ਇਹ ਮੰਗ ਕੀਤੀ ਸੀ ਕਿ ਇੱਥੇ ਵੱਡਾ ਪੁਲ ਬਣਾਇਆ ਜਾਵੇ। ਰਾਜ ਸਭਾ ਮੈਂਬਰ ਸੰਤ ਸੀਚੇਵਾਲ ਵਲੋਂ ਕੀਤੇ ਗਏ ਇਸ ਦੌਰੇ ਮੌਕੇ ਐਸ.ਡੀ. ਐਮ. ਅਨਮਜੋਤ ਕੌਰ ਤੋਂ ਇਲਾਵਾ ਨੈਸ਼ਨਲ ਹਾਈਵੇਅ ਆਥਰਿਟੀ ਦੇ ਅਧਿਕਾਰੀ, ਡਰੇਨੇਜ਼ ਵਿਭਾਗ ਪੰਜਾਬ ਅਤੇ ਨਹਿਰੀ ਵਿਭਾਗ ਪੰਜਾਬ ਦੇ ਅਧਿਕਾਰੀ ਵੀ ਮੌਜੂਦ ਸਨ। ਸੰਤ ਸੀਚੇਵਾਲ ਨੇ ਇਹਨਾਂ ਅਧਿਕਾਰੀਆਂ ਨੂੰ ਡਰੇਨ ਦੇ ਪਾਣੀ ਦੀ ਨਿਕਾਸੀ ਸਹੀ ਢੰਗ ਨਾਲ ਨਾ ਹੋਣ ਦਾ ਕਾਰਣ ਦੱਸਦਿਆ ਕਿਹਾ ਕਿ ਇਹਦੇ ਹੇਠਾਂ ਜਿਹੜੇ ਪਾਇਪ ਪਾਏ ਹਨ ਉਹ ਬਹੁਤੇ ਉੱਚੇ ਹਨ। ਜਿਸ ਨਾਲ ਡਰੇਨ ਦੇ ਪਾਣੀ ਦੀ ਨਿਕਾਸੀ ਨਹੀ ਹੋ ਰਹੀ। ਇਸ ਮੌਕੇ ਪਹੁੰਚੇ ਨਵਾਂ ਸ਼ਹਿਰ ਦੀ ਐਸ.ਡੀ.ਐਮ ਅਨਮਜੋਤ ਕੌਰ ਨੇ ਨੈਸ਼ਨਲ ਹਾਈਵੇਅ ਦੇ ਅਧਿਕਾਰੀਆਂ ਨੂੰ ਹਿਦਾਇਤ ਕੀਤੀ ਕਿ ਉਹ ਇਕ ਹਫਤੇ ਵਿਚ ਇਸਦੀ ਰਿਪੋਰਟ ਦੇਣ। ਸੰਤ ਸੀਚੇਵਾਲ ਨੇ ਦੱਸਿਆ ਕਿ ਬਿਸਤ ਦੁਆਬ ਨਹਿਰ ਵਿਚੋਂ 200 ਕਿਊਸਿਕ ਪਾਣੀ ਚਿੱਟੀ ਵੇਂਈ ਵਿਚ ਛੱਡਿਆ ਜਾਣਾ ਹੈ। ਇਹ ਪਾਣੀ ਸਿੰਬਲੀ ਡਰੇਨ ਰਾਹੀ ਪਾਣੀ ਚਿੱਟੀ ਵੇਈ ਵਿਚ ਜਾਣਾ ਹੈ। ਇਸ ਲਈ ਇਸ ਡਰੇਨ ਦਾ ਜਿੱਥੇ ਸਾਫ ਹੋਣਾ ਜ਼ਰੂਰੀ ਹੈ ਉੱਥੇ ਹੀ ਇਹ ਪੁਲ ਦਾ ਮੁੜ ਨਿਰਮਾਣ ਕਰਵਾਉਣਾ ਜ਼ਰੂਰੀ ਹੈ ਤਾਂ ਜੋ 200 ਕਿਊਸਿਕ ਤੋਂ ਵੱਧ ਪਾਣੀ ਅਸਾਨੀ ਨਾਲ ਇਸ ਪੁਲ ਹੇਠੋਂ ਲੰਘ ਸਕੇ।
