ਜੈਸ਼-ਏ-ਮੁਹੰਮਦ ਨੇ ਬਣਾਈ ਪਹਿਲੀ ਮਹਿਲਾ ਅੱਤਵਾਦੀ ਯੂਨਿਟ
ਮਸੂਦ ਅਜ਼ਹਰ ਦੀ ਭੈਣ ਸਾਦੀਆ ਸਾਂਭੇਗੀ ਕਮਾਨ, ਆਪ੍ਰੇਸ਼ਨ ਸਿੰਦੂਰ ‘ਚ ਮਾਰਿਆ ਗਿਆ ਸੀ ਪਤੀ
ਜੈਸ਼-ਏ-ਮੁਹੰਮਦ ਅੱਤਵਾਦੀਆਂ ਦੀਆਂ ਪਤਨੀਆਂ ਅਤੇ ਗ਼ਰੀਬ ਔਰਤਾਂ ਨੂੰ ਕਰ ਰਿਹਾ ਸ਼ਾਮਲ
ਇਸਲਾਮਾਬਾਦ, 9 ਅਕਤੂਬਰ (ਨਿਊਜ਼ ਟਾਊਨ ਨੈਟਵਰਕ) : ਪਾਕਿਸਤਾਨ ਦੇ ਅੱਤਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਨੇ ਪਹਿਲੀ ਵਾਰ ਮਹਿਲਾ ਅੱਤਵਾਦੀਆਂ ਦੀ ਇੱਕ ਵੱਖਰੀ ਯੂਨਿਟ ਬਣਾਈ ਹੈ। ਇਸਦਾ ਨਾਮ ‘ਜਮਾਤ-ਉਲ-ਮੋਮੀਨਾਤ’ ਰੱਖਿਆ ਗਿਆ ਹੈ। ਜੈਸ਼ ਹੁਣ ਅੱਤਵਾਦੀਆਂ ਦੀਆਂ ਪਤਨੀਆਂ ਅਤੇ ਗਰੀਬ ਔਰਤਾਂ ਦੀ ਭਰਤੀ ਕਰ ਰਿਹਾ ਹੈ। ਇਹ ਔਰਤਾਂ ਬਹਾਵਲਪੁਰ, ਕਰਾਚੀ, ਮੁਜ਼ੱਫਰਾਬਾਦ, ਕੋਟਲੀ, ਹਰੀਪੁਰ ਅਤੇ ਮਾਨਸੇਹਰਾ ਦੇ ਮਦਰੱਸਿਆਂ ਵਿੱਚ ਪੜ੍ਹਦੀਆਂ ਹਨ। ਮੀਡੀਆ ਰਿਪੋਰਟਾਂ ਅਨੁਸਾਰ ਇਹ ਜਾਣਕਾਰੀ ਗਲੋਬਲ ਅੱਤਵਾਦੀ ਮੌਲਾਨਾ ਮਸੂਦ ਅਜ਼ਹਰ ਦੇ ਨਾਮ ‘ਤੇ ਜਾਰੀ ਇੱਕ ਪੱਤਰ ਰਾਹੀਂ ਸਾਹਮਣੇ ਆਈ ਹੈ। ਪੱਤਰ ਅਨੁਸਾਰ ਇਸ ਨਵੀਂ ਯੂਨਿਟ ਲਈ ਭਰਤੀ ਪ੍ਰਕਿਰਿਆ 8 ਅਕਤੂਬਰ ਨੂੰ ਪਾਕਿਸਤਾਨ ਦੇ ਬਹਾਵਲਪੁਰ ਵਿੱਚ ਮਰਕਜ਼ ਉਸਮਾਨ-ਓ-ਅਲੀ ਵਿਖੇ ਸ਼ੁਰੂ ਹੋ ਗਈ ਹੈ। ਮਸੂਦ ਅਜ਼ਹਰ ਦੀ ਭੈਣ ਸਾਦੀਆ ਅਜ਼ਹਰ ਇਸ ਯੂਨਿਟ ਦੀ ਕਮਾਨ ਸਭਾਂਲੇਗੀ। ਸਾਦੀਆ ਦਾ ਪਤੀ ਯੂਸਫ਼ ਅਜ਼ਹਰ 7 ਮਈ ਨੂੰ ਆਪ੍ਰੇਸ਼ਨ ਸਿੰਦੂਰ ਦੌਰਾਨ ਮਾਰਿਆ ਗਿਆ ਸੀ। ਮੀਡੀਆ ਰਿਪੋਰਟਾਂ ਵਿੱਚ ਖਦਸ਼ਾ ਪ੍ਰਗਟ ਕੀਤਾ ਗਿਆ ਹੈ ਕਿ ਇਨ੍ਹਾਂ ਮਹਿਲਾ ਅੱਤਵਾਦੀਆਂ ਨੂੰ ਆਤਮਘਾਤੀ ਹਮਲਿਆਂ ਵਿੱਚ ਵਰਤਿਆ ਜਾ ਸਕਦਾ ਹੈ। ਸੰਗਠਨ ਪਹਿਲਾਂ ਔਰਤਾਂ ਨੂੰ ਲੜਾਈ ਵਿੱਚ ਸ਼ਾਮਲ ਨਹੀਂ ਕਰਦਾ ਸੀ ਪਰ ਪਹਿਲਗਾਮ ਹਮਲੇ ਅਤੇ ਆਪ੍ਰੇਸ਼ਨ ਸਿੰਦੂਰ ਤੋਂ ਬਾਅਦ ਨਿਯਮਾਂ ਨੂੰ ਬਦਲ ਦਿੱਤਾ ਗਿਆ। ਮਸੂਦ ਅਜ਼ਹਰ ਅਤੇ ਉਸਦੇ ਭਰਾ ਤਲਹਾ ਅਲ-ਸੈਫ ਨੇ ਟੀਮ ਵਿੱਚ ਔਰਤਾਂ ਨੂੰ ਸ਼ਾਮਲ ਕਰਨ ਦਾ ਫੈਸਲਾ ਕੀਤਾ। ਆਈਐਸਆਈਐਸ ਅਤੇ ਬੋਕੋ ਹਰਾਮ ਵਰਗੇ ਸੰਗਠਨ ਆਤਮਘਾਤੀ ਹਮਲਿਆਂ ਵਿੱਚ ਔਰਤਾਂ ਦੀ ਵਰਤੋਂ ਕਰਦੇ ਹਨ, ਪਰ ਜੈਸ਼, ਲਸ਼ਕਰ ਅਤੇ ਹਿਜ਼ਬੁਲ ਮੁਜਾਹਿਦੀਨ ਵਰਗੇ ਸਮੂਹ ਪਹਿਲਾਂ ਅਜਿਹਾ ਨਹੀਂ ਕਰਦੇ ਸਨ। ਦੱਸਣਯੋਗ ਹੈ ਕਿ ਆਪ੍ਰੇਸ਼ਨ ਸਿੰਦੂਰ ਤੋਂ ਬਾਅਦ ਜੈਸ਼-ਏ-ਮੁਹੰਮਦ, ਹਿਜ਼ਬੁਲ ਮੁਜਾਹਿਦੀਨ ਅਤੇ ਲਸ਼ਕਰ-ਏ-ਤਾਇਬਾ ਨੇ ਆਪਣੇ ਕੈਂਪ ਪਾਕਿਸਤਾਨ ਦੇ ਅਸ਼ਾਂਤ ਖੈਬਰ ਪਖਤੂਨਖਵਾ (ਕੇਪੀਕੇ) ਸੂਬੇ ਵਿੱਚ ਤਬਦੀਲ ਕਰ ਦਿੱਤੇ ਹਨ। ਇਹ ਅੱਤਵਾਦੀ ਸੰਗਠਨ ਆਪ੍ਰੇਸ਼ਨ ਸਿੰਦੂਰ ਵਿੱਚ ਤਬਾਹ ਹੋਏ ਅੱਤਵਾਦੀ ਢਾਂਚਿਆਂ ਨੂੰ ਦੁਬਾਰਾ ਬਣਾਉਣ ਲਈ ਜਨਤਾ ਤੋਂ ਦਾਨ ਵੀ ਮੰਗ ਰਹੇ ਹਨ। ਇਸ ਸਾਲ ਅਗਸਤ ਵਿੱਚ ਇਹ ਰਿਪੋਰਟ ਕੀਤੀ ਗਈ ਸੀ ਕਿ ਜੈਸ਼-ਏ-ਮੁਹੰਮਦ ਨੇ ਪਾਕਿਸਤਾਨ ਭਰ ਵਿੱਚ 313 ਨਵੇਂ ਮਰਕਜ਼ (ਕੇਂਦਰ) ਬਣਾਉਣ ਲਈ 3.91 ਬਿਲੀਅਨ ਪਾਕਿਸਤਾਨੀ ਰੁਪਏ ਦੀ ਔਨਲਾਈਨ ਦਾਨ ਮੁਹਿੰਮ ਸ਼ੁਰੂ ਕੀਤੀ ਸੀ। ਜ਼ਿਕਰਯੋਗ ਹੈ ਕਿ ਭਾਰਤ ਨੇ 22 ਅਪ੍ਰੈਲ ਨੂੰ ਪਹਿਲਗਾਮ ਹਮਲੇ ਤੋਂ ਬਾਅਦ 7 ਮਈ ਨੂੰ ਪਾਕਿਸਤਾਨ ਵਿੱਚ ਅੱਤਵਾਦੀਆਂ ਵਿਰੁੱਧ ਆਪ੍ਰੇਸ਼ਨ ਸਿੰਦੂਰ ਸ਼ੁਰੂ ਕੀਤਾ ਸੀ। ਬਹਾਵਲਪੁਰ ‘ਤੇ ਭਾਰਤੀ ਹਮਲੇ ਵਿੱਚ ਮਸੂਦ ਦੇ ਪਰਿਵਾਰ ਦੇ 10 ਮੈਂਬਰ, 4 ਸਾਥੀਆਂ ਸਮੇਤ ਮਾਰੇ ਗਏ ਸਨ। ਮ੍ਰਿਤਕਾਂ ਵਿੱਚ ਮਸੂਦ ਦੀ ਵੱਡੀ ਭੈਣ ਅਤੇ ਉਸਦਾ ਪਤੀ, ਮਸੂਦ ਦਾ ਭਤੀਜਾ ਅਤੇ ਉਸਦੀ ਪਤਨੀ ਅਤੇ ਮਸੂਦ ਦੀ ਇੱਕ ਭਤੀਜੀ ਅਤੇ ਉਸਦੇ 5 ਬੱਚੇ ਸ਼ਾਮਲ ਸਨ। ਮਸੂਦ ਹਮਲੇ ਵਾਲੀ ਥਾਂ ‘ਤੇ ਮੌਜੂਦ ਨਹੀਂ ਸੀ, ਇਸ ਤਰ੍ਹਾਂ ਉਸਦੀ ਜਾਨ ਬਚ ਗਈ। ਰਿਪੋਰਟਾਂ ਦੇ ਅਨੁਸਾਰ ਅੱਤਵਾਦੀ ਮਸੂਦ ਨੇ ਆਪਣੇ ਪਰਿਵਾਰਕ ਮੈਂਬਰਾਂ ਦੀ ਮੌਤ ਤੋਂ ਬਾਅਦ ਇੱਕ ਬਿਆਨ ਵੀ ਜਾਰੀ ਕੀਤਾ। ਇਸ ਵਿੱਚ ਉਸ ਨੇ ਕਿਹਾ ਸੀ ਕਿ ਮੈਂ ਖੁਸ਼ਕਿਸਮਤ ਹੁੰਦਾ ਜੇਕਰ ਮੈਂ ਵੀ ਮਰ ਜਾਂਦਾ।
