ਤਿੰਨੇ ਫ਼ੌਜਾਂ ਲਈ 79,000 ਕਰੋੜ ਦੇ ਹਥਿਆਰ ਖਰੀਦੇਗਾ ਭਾਰਤ
ਐਡਵਾਂਸਡ ਨਾਗ ਮਿਜ਼ਾਈਲ ਸਿਸਟਮ ਅਤੇ ਸੁਪਰ ਰੈਪਿਡ ਗਨ ਸ਼ਾਮਲ
ਨਵੀਂ ਦਿੱਲੀ, 23 ਅਕਤੂਬਰ (ਨਿਊਜ਼ ਟਾਊਨ ਨੈਟਵਰਕ) : ਰੱਖਿਆ ਮੰਤਰਾਲੇ ਨੇ ਵੀਰਵਾਰ ਨੂੰ ਲਗਭਗ ₹79,000 ਕਰੋੜ ਦੇ ਐਡਵਾਂਸਡ ਹਥਿਆਰ ਅਤੇ ਫੌਜੀ ਉਪਕਰਣ ਖਰੀਦਣ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿੱਤੀ। ਇਹ ਫੈਸਲਾ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਈ ਰੱਖਿਆ ਪ੍ਰਾਪਤੀ ਪ੍ਰੀਸ਼ਦ (DAC) ਦੀ ਮੀਟਿੰਗ ਵਿੱਚ ਲਿਆ ਗਿਆ। ਫ਼ੈਸਲੇ ਮੁਤਾਬਕ ਨਾਗ ਮਿਜ਼ਾਈਲਾਂ ਖਰੀਦੀਆਂ ਜਾਣਗੀਆਂ, ਜੋ ਦੁਸ਼ਮਣ ਦੇ ਟੈਂਕਾਂ ਅਤੇ ਬੰਕਰਾਂ ਨੂੰ ਤਬਾਹ ਕਰਨ ਦੇ ਸਮਰੱਥ ਹਨ। ਸਮੁੰਦਰ ਤੋਂ ਜ਼ਮੀਨ ਤੱਕ ਕਾਰਵਾਈਆਂ ਦੀ ਸਹੂਲਤ ਲਈ ਲੈਂਡਿੰਗ ਪਲੇਟਫਾਰਮ ਡੌਕ ਬਣਾਏ ਜਾਣਗੇ। ਸਮੁੰਦਰ ਵਿੱਚ ਪਣਡੁੱਬੀਆਂ ਨੂੰ ਤਬਾਹ ਕਰਨ ਲਈ ਐਡਵਾਂਸਡ ਹਲਕੇ ਟਾਰਪੀਡੋ ਵੀ ਖਰੀਦੇ ਜਾਣਗੇ। ਇਸ ਤੋਂ ਇਲਾਵਾ ਸੁਪਰ ਰੈਪਿਡ ਗਨ ਖਰੀਦੀਆਂ ਜਾਣਗੀਆਂ। ਇਸ ਵਿੱਚ ਜਲ ਸੈਨਾ, ਭਾਰਤੀ ਫੌਜ ਅਤੇ ਹਵਾਈ ਸੈਨਾ ਲਈ ਕਈ ਮਹੱਤਵਪੂਰਨ ਪ੍ਰਣਾਲੀਆਂ ਸ਼ਾਮਲ ਹਨ ਜਿਸਦਾ ਉਦੇਸ਼ ਫੌਜ ਦੀਆਂ ਸਮਰੱਥਾਵਾਂ ਅਤੇ ਤੈਨਾਤੀ ਨੂੰ ਵਧਾਉਣਾ ਹੈ। ਰੱਖਿਆ ਮੰਤਰਾਲੇ ਨੇ ਕਿਹਾ ਹੈ ਕਿ ਇਹ ਨਵੀਆਂ ਖਰੀਦਾਂ ਨਾ ਸਿਰਫ਼ ਹਥਿਆਰਬੰਦ ਸੈਨਾਵਾਂ ਦੀ ਤਾਕਤ ਅਤੇ ਤਿਆਰੀ ਨੂੰ ਵਧਾਉਣਗੀਆਂ ਸਗੋਂ ਰਾਹਤ, ਬਚਾਅ ਅਤੇ ਸ਼ਾਂਤੀ ਰੱਖਿਆ ਮਿਸ਼ਨਾਂ ਵਿੱਚ ਵੀ ਉਪਯੋਗੀ ਹੋਣਗੀਆਂ। ਇਹਨਾਂ ਵਿੱਚੋਂ ਬਹੁਤ ਸਾਰੇ ਪ੍ਰਣਾਲੀਆਂ ਨੂੰ ਸਵਦੇਸ਼ੀ ਤੌਰ ‘ਤੇ ਵਿਕਸਤ ਕੀਤਾ ਗਿਆ ਹੈ, ਜੋ ਦੇਸ਼ ਦੀ ਰੱਖਿਆ ਤਕਨਾਲੋਜੀ ਅਤੇ ਉਤਪਾਦਨ ਨੂੰ ਵੀ ਵਧਾਏਗਾ। ਸਰਕਾਰ ਨੇ ਕਿਹਾ ਕਿ ਇਹ ਫੈਸਲੇ ਹਾਲ ਹੀ ਵਿੱਚ ਸੁਰੱਖਿਆ ਚੁਣੌਤੀਆਂ ਅਤੇ ਫੌਜੀ ਕਾਰਵਾਈਆਂ ਦੇ ਮੱਦੇਨਜ਼ਰ ਲਏ ਗਏ ਹਨ ਤਾਂ ਜੋ ਦੇਸ਼ ਦੀ ਰੱਖਿਆ ਅਤੇ ਤਾਇਨਾਤੀ ਸਮਰੱਥਾਵਾਂ ਨੂੰ ਹੋਰ ਮਜ਼ਬੂਤ ਕੀਤਾ ਜਾ ਸਕੇ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ 5 ਅਗਸਤ ਨੂੰ ਲਗਭਗ 67,000 ਕਰੋੜ ਦੇ ਪ੍ਰਸਤਾਵ ਨੂੰ ਮਨਜ਼ੂਰੀ ਦਿੱਤੀ ਗਈ ਸੀ।
