ਬੰਗਲਾਦੇਸ਼ ‘ਚ ਹਿੰਦੂ ਕਾਰੋਬਾਰੀ ਨੂੰ ਕੰਕਰੀਟ ਦੀ ਸਲੈਬ ਨਾਲ ਕੁੱਟ-ਕੁੱਟ ਕੇ ਮਾਰਿਆ
-ਵਾਇਰਲ ਵੀਡੀਓ ‘ਚ ਲਾਸ਼ ‘ਤੇ ਨੱਚਦੇ ਦਿਖਾਈ ਦਿਤੇ ਹਮਲਾਵਰ, 7 ਗ੍ਰਿਫ਼ਤਾਰ
ਢਾਕਾ, 13 ਜੁਲਾਈ (ਨਿਊਜ਼ ਟਾਊਨ ਨੈਟਵਰਕ) : ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਦੇ ਪੁਰਾਣੇ ਇਲਾਕੇ ਵਿਚ ਇਕ ਹਿੰਦੂ ਕਾਰੋਬਾਰੀ ਲਾਲ ਚੰਦ ਸੋਹਾਗ ਦੀ ਭੀੜ ਨੇ ਕੁੱਟ-ਕੁੱਟ ਕੇ ਹੱਤਿਆ ਕਰ ਦਿਤੀ। ਇਸ ਘਟਨਾ ਦੀ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਦੇਸ਼ ਭਰ ਵਿਚ ਵੱਡੇ ਪੱਧਰ ‘ਤੇ ਵਿਰੋਧ ਪ੍ਰਦਰਸ਼ਨ ਸ਼ੁਰੂ ਹੋ ਗਏ ਹਨ। ਰਾਜਧਾਨੀ ਢਾਕਾ ਦੀ ਪ੍ਰਮੁੱਖ ਯੂਨੀਵਰਸਿਟੀ ਦੇ ਸੈਂਕੜੇ ਵਿਦਿਆਰਥੀ ਸੜਕਾਂ ‘ਤੇ ਉਤਰ ਆਏ ਹਨ ਅਤੇ ਅੰਤਰਿਮ ਸਰਕਾਰ ਦੀ ਨਾਕਾਮੀ ਵਿਰੁਧ ਨਾਅਰੇਬਾਜ਼ੀ ਕਰ ਰਹੇ ਹਨ।
ਨਿਊਜ਼ ਏਜੰਸੀ ਪੀਟੀਆਈ ਦੇ ਅਨੁਸਾਰ ਇਸ ਘਟਨਾ ਦਾ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਵੀਡੀਓ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਹਮਲਾਵਰਾਂ ਨੇ ਸੋਹਾਗ ਨੂੰ ਕੰਕਰੀਟ ਦੀ ਸਲੈਬ ਨਾਲ ਬੁਰੀ ਤਰ੍ਹਾਂ ਕੁੱਟਿਆ ਅਤੇ ਉਸਨੂੰ ਉਦੋਂ ਤਕ ਕੁੱਟਦੇ ਰਹੇ ਜਦੋਂ ਤਕ ਉਹ ਮਰ ਨਹੀਂ ਗਿਆ। ਬੇਰਹਿਮੀ ਦੀ ਹੱਦ ਇੱਥੇ ਹੀ ਨਹੀਂ ਰੁਕੀ, ਹਮਲਾਵਰ ਉਸਦੀ ਲਾਸ਼ ‘ਤੇ ਨੱਚਦੇ ਦਿਖਾਈ ਵੀ ਦਿਤੇ। ਇਹ ਘਟਨਾ ਮਿਟਫੋਰਡ ਹਸਪਤਾਲ ਦੇ ਸਾਹਮਣੇ ਵਾਪਰੀ, ਜਿੱਥੇ ਦਿਨ-ਦਿਹਾੜੇ ਉਸ ‘ਤੇ ਹਮਲਾ ਕੀਤਾ ਗਿਆ। ਕਿਹਾ ਜਾ ਰਿਹਾ ਹੈ ਕਿ ਇਹ ਹਮਲਾਵਰ ਜਬਰੀ ਵਸੂਲੀ ਕਰਨ ਵਾਲੇ ਸਨ।
ਬੰਗਲਾਦੇਸ਼ ਦੇ ਪ੍ਰਥਮ ਆਲੋ ਅਖਬਾਰ ਦੇ ਅਨੁਸਾਰ, ਲਾਲ ਚੰਦ ਦੀ ਭੈਣ ਮੰਜੂਆਰਾ ਬੇਗਮ ਨੇ ਕੋਤਵਾਲੀ ਪੁਲਿਸ ਸਟੇਸ਼ਨ ਵਿਚ ਕਤਲ ਦਾ ਮਾਮਲਾ ਦਰਜ ਕਰਵਾਇਆ ਹੈ, ਜਿਸ ਵਿਚ 19 ਨਾਮਜ਼ਦ ਮੁਲਜ਼ਮਾਂ ਦੇ ਨਾਲ 15-20 ਅਣਪਛਾਤੇ ਲੋਕਾਂ ਨੂੰ ਵੀ ਦੋਸ਼ੀ ਬਣਾਇਆ ਗਿਆ ਹੈ। ਪੁਲਿਸ ਨੇ ਹੁਣ ਤਕ 7 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਵਿਚੋਂ ਦੋ ਨੂੰ ਗੈਰ-ਕਾਨੂੰਨੀ ਹਥਿਆਰਾਂ ਨਾਲ ਬਰਾਮਦ ਕੀਤਾ ਗਿਆ ਹੈ।
ਇਸ ਘਟਨਾ ਤੋਂ ਬਾਅਦ, ਬੀਆਰਏਸੀ ਯੂਨੀਵਰਸਿਟੀ, ਐਨਐਸਯੂ, ਈਸਟ ਵੈਸਟ ਯੂਨੀਵਰਸਿਟੀ ਅਤੇ ਢਾਕਾ ਯੂਨੀਵਰਸਿਟੀ ਸਮੇਤ ਕਈ ਸੰਸਥਾਵਾਂ ਦੇ ਵਿਦਿਆਰਥੀ ਸੜਕਾਂ ‘ਤੇ ਉਤਰ ਆਏ ਅਤੇ ਸਰਕਾਰ ਦੀ ਅਸਫਲਤਾ ਦੇ ਖਿਲਾਫ ਵਿਰੋਧ ਪ੍ਰਦਰਸ਼ਨ ਕੀਤਾ। ਕੈਂਪਸ ‘ਇਨ੍ਹਾਂ ਦਰਿੰਦਿਆਂ ਨੂੰ ਮਾਰਨ ਦਾ ਅਧਿਕਾਰ ਕਿਸਨੇ ਦਿੱਤਾ?’ ਵਰਗੇ ਨਾਅਰਿਆਂ ਨਾਲ ਗੂੰਜ ਉੱਠਿਆ।
ਬੀਡੀਨਿਊਜ਼ 24 ਨੇ ਕਿਹਾ ਕਿ ਸੋਹਾਗ ਦੀ ਕਥਿਤ ਤੌਰ ‘ਤੇ ਸਾਬਕਾ ਪ੍ਰਧਾਨ ਮੰਤਰੀ ਖਾਲਿਦਾ ਜ਼ਿਆ ਦੀ ਬੰਗਲਾਦੇਸ਼ ਨੈਸ਼ਨਲਿਸਟ ਪਾਰਟੀ (ਬੀਐਨਪੀ) ਦੇ ਯੂਥ ਵਿੰਗ ਦੇ ਵਰਕਰਾਂ ਦੇ ਇਕ ਸਮੂਹ ਦੁਆਰਾ ਹੱਤਿਆ ਕੀਤੀ ਗਈ ਹੈ। ਲਾਲ ਚੰਦ ਖੁਦ ਵੀ ਇਕ ਸਾਬਕਾ ਬੀਐਨਪੀ ਵਰਕਰ ਸੀ। ਹਾਲਾਂਕਿ ਪਾਰਟੀ ਨੇ ਕਿਹਾ ਕਿ ਉਸਨੇ ਤੁਰੰਤ ਲਿੰਚਿੰਗ ਦੇ 4 ਦੋਸ਼ੀਆਂ ਨੂੰ ਪਾਰਟੀ ਵਿਚੋਂ ਕੱਢ ਦਿਤਾ ਹੈ।
ਦੱਸਣਯੋਗ ਹੈ ਕਿ ਇਸ ਮਹੀਨੇ ਦੇ ਸ਼ੁਰੂ ਵਿਚ ਇਕ ਹੋਰ ਅਜਿਹੀ ਹੀ ਘਟਨਾ ਵਾਪਰੀ ਸੀ। ਜਿਸ ਵਿਚ ਕੁਮਿਲਾ ਦੇ ਮੁਰਾਦਨਗਰ ਇਲਾਕੇ ਵਿਚ ਇਕ ਔਰਤ ਅਤੇ ਉਸਦੇ ਪੁੱਤਰ-ਧੀ ਨੂੰ ਨਸ਼ੀਲੇ ਪਦਾਰਥਾਂ ਦੇ ਕਾਰੋਬਾਰ ਵਿਚ ਸ਼ਾਮਲ ਹੋਣ ਦੇ ਦੋਸ਼ ਵਿਚ ਕੁੱਟ-ਕੁੱਟ ਕੇ ਮਾਰ ਦਿਤਾ ਗਿਆ।
ਜ਼ਿਕਰਯੋਗ ਹੈ ਕਿ ਲੰਘੇ ਸਾਲ 2024 ਵਿਚ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਦੀ ਸਰਕਾਰ ਵਿਰੁਧ ਹਿੰਸਕ ਅੰਦੋਲਨ ਤੋਂ ਬਾਅਦ ਬੰਗਲਾਦੇਸ਼ ਵਿਚ ਭੀੜ ਹਿੰਸਾ ਦੀਆਂ ਘਟਨਾਵਾਂ ਵਿਚ ਤੇਜ਼ੀ ਨਾਲ ਵਾਧਾ ਹੋਇਆ ਹੈ। ਬੰਗਲਾਦੇਸ਼ ਹਿੰਦੂ-ਬੋਧੀ-ਈਸਾਈ ਏਕਤਾ ਪ੍ਰੀਸ਼ਦ ਨੇ 10 ਜੁਲਾਈ ਨੂੰ ਕਿਹਾ ਕਿ 4 ਅਗਸਤ 2024 ਤੋਂ ਯਾਨੀ ਪਿਛਲੇ 330 ਦਿਨਾਂ ਵਿਚ ਘੱਟ ਗਿਣਤੀਆਂ ਵਿਰੁਧ 2442 ਘਟਨਾਵਾਂ ਵਾਪਰੀਆਂ। ਇਨ੍ਹਾਂ ਵਿਚ ਕਤਲ, ਔਰਤਾਂ ‘ਤੇ ਜਿਨਸੀ ਹਮਲੇ, ਧਾਰਮਿਕ ਸਥਾਨਾਂ ‘ਤੇ ਹਮਲਾ, ਜਾਇਦਾਦਾਂ ‘ਤੇ ਕਬਜ਼ਾ ਕਰਨ ਵਰਗੀਆਂ ਘਟਨਾਵਾਂ ਸ਼ਾਮਲ ਹਨ।
