WSL ਰਿਪੋਰਟ ‘ਚ ਹੈਰਾਨੀਜਨਕ ਦਾਅਵਾ, ਕੈਪਟਨ ਨੇ ਖੁਦ ਫਿਊਲ ਸਪਲਾਈ ਬੰਦ ਕਰਕੇ ਡੇਗਿਆ ਜਹਾਜ਼ !
ਅਹਿਮਦਾਬਾਦ, 17 ਜੁਲਾਈ ( ਨਿਊਜ਼ ਟਾਊਨ ਨੈੱਟਵਰਕ ) 12 ਜੂਨ ਨੂੰ ਅਹਿਮਦਾਬਾਦ ਵਿਚ ਹਾਦਸਾਗ੍ਰਸਤ ਹੋਏ ਏਅਰ ਇੰਡੀਆ ਜਹਾਜ਼ ਦੇ ਦੋ ਪਾਇਲਟਾਂ ਵਿਚਕਾਰ ਹੋਈ ਆਖਰੀ ਗੱਲਬਾਤ ਸਬੰਧੀ ਇਕ ਨਵਾਂ ਦਾਅਵਾ ਸਾਹਮਣੇ ਆਇਆ ਹੈ। ਨਿਊਜ਼ ਏਜੰਸੀ ਰਾਇਟਰਜ਼ ਦੇ ਅਨੁਸਾਰ, ਅਮਰੀਕੀ ਅਖਬਾਰ ਵਾਲ ਸਟਰੀਟ ਜਰਨਲ (WSL) ਨੇ ਰਿਪੋਰਟ ਦਿੱਤੀ ਹੈ ਕਿ ਜਹਾਜ਼ ਦੇ ਕੈਪਟਨ ਸੁਮਿਤ ਸੱਭਰਵਾਲ ਨੇ ਇੰਜਣਾਂ ਨੂੰ ਫਿਊਲ ਦੀ ਸਪਲਾਈ ਬੰਦ ਕਰ ਦਿੱਤੀ ਸੀ।
WSL ਨੇ ਕਿਹਾ ਕਿ ਇਹ ਗੱਲ ਦੋਵਾਂ ਪਾਇਲਟਾਂ ਵਿਚਕਾਰ ਹੋਈ ਗੱਲਬਾਤ ਦੀ ਕਾਕਪਿਟ ਰਿਕਾਰਡਿੰਗ ਤੋਂ ਸਾਹਮਣੇ ਆਈ ਹੈ। ਵੌਇਸ ਰਿਕਾਰਡਿੰਗ ਤੋਂ ਪਤਾ ਲੱਗਾ ਹੈ ਕਿ ਬੋਇੰਗ ਜਹਾਜ਼ ਉਡਾ ਰਹੇ ਸਹਿ-ਪਾਇਲਟ ਕਲਾਈਵ ਕੁੰਦਰ ਨੇ ਕੈਪਟਨ ਸੁਮਿਤ ਸੱਭਰਵਾਲ ਨੂੰ ਪੁੱਛਿਆ, ‘ਤੁਸੀਂ ਤੇਲ ਸਵਿੱਚ ਨੂੰ ‘ਕਟਆਫ’ ਸਥਿਤੀ ਵਿੱਚ ਕਿਉਂ ਰੱਖਿਆ?’
ਸਹਿ-ਪਾਇਲਟ ਸਵਾਲ ਪੁੱਛਦੇ ਹੋਏ ਹੈਰਾਨ ਰਹਿ ਗਿਆ। ਉਸ ਦੀ ਆਵਾਜ਼ ਵਿੱਚ ਘਬਰਾਹਟ ਸੀ, ਜਦੋਂ ਕਿ ਕੈਪਟਨ ਸੁਮਿਤ ਸ਼ਾਂਤ ਜਾਪ ਰਿਹਾ ਸੀ। ਕੈਪਟਨ ਸੁਮਿਤ ਸੱਭਰਵਾਲ ਏਅਰ ਇੰਡੀਆ ਜਹਾਜ਼ ਦੇ ਸੀਨੀਅਰ ਪਾਇਲਟ ਸਨ। ਉਨ੍ਹਾਂ ਕੋਲ 15,638 ਘੰਟੇ ਉਡਾਣ ਦਾ ਤਜਰਬਾ ਸੀ ਅਤੇ ਸਹਿ-ਪਾਇਲਟ ਕਲਾਈਵ ਕੁੰਦਰ ਕੋਲ 3,403 ਘੰਟੇ ਉਡਾਣ ਦਾ ਤਜਰਬਾ ਸੀ।
ਆਪਣੀ ਰਿਪੋਰਟ ਵਿਚ ਵਾਲ ਸਟਰੀਟ ਜਰਨਲ ਨੇ ਜਹਾਜ਼ ਹਾਦਸੇ ਦੀ ਜਾਂਚ ਕਰ ਰਹੇ ਅਮਰੀਕੀ ਅਧਿਕਾਰੀਆਂ ਦੀ ਸ਼ੁਰੂਆਤੀ ਜਾਂਚ ਤੋਂ ਜਾਣੂ ਲੋਕਾਂ ਦਾ ਹਵਾਲਾ ਦਿੱਤਾ ਹੈ। ਇਸ ਰਿਪੋਰਟ ‘ਤੇ ਭਾਰਤ ਦੇ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (IB), ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਏਵੀਏਸ਼ਨ (DGCA), ਸਿਵਲ ਏਵੀਏਸ਼ਨ ਮੰਤਰਾਲੇ, ਬੋਇੰਗ ਜਾਂ ਏਅਰ ਇੰਡੀਆ ਵੱਲੋਂ ਕੋਈ ਜਵਾਬ ਨਹੀਂ ਦਿੱਤਾ ਗਿਆ ਹੈ।
5 ਦਿਨ ਪਹਿਲਾਂ, ਭਾਰਤ ਨੇ ਵੀ ਪਾਇਲਟਾਂ ਦੀ ਗੱਲਬਾਤ ਨੂੰ ਜਨਤਕ ਕੀਤਾ ਸੀ
ਇਸ ਤੋਂ ਪਹਿਲਾਂ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (IB) ਨੇ 12 ਜੁਲਾਈ ਨੂੰ ਜਹਾਜ਼ ਹਾਦਸੇ ‘ਤੇ ਆਪਣੀ ਸ਼ੁਰੂਆਤੀ ਜਾਂਚ ਰਿਪੋਰਟ ਜਾਰੀ ਕੀਤੀ ਸੀ। ਇਸ ਵਿੱਚ ਕਿਹਾ ਗਿਆ ਸੀ ਕਿ ਫਿਊਲ ਸਵਿੱਚ ਅਚਾਨਕ ‘ਰਨ’ ਤੋਂ ‘ਕਟਆਫ’ ਸਥਿਤੀ ਵਿੱਚ ਚਲੇ ਗਏ, ਜਿਸ ਕਾਰਨ ਦੋਵੇਂ ਇੰਜਣ ਬੰਦ ਹੋ ਗਏ।
ਹਾਲਾਂਕਿ, ਰਿਪੋਰਟ ਵਿੱਚ ਇਹ ਨਹੀਂ ਦੱਸਿਆ ਗਿਆ ਕਿ ਫਿਊਲ ਸਵਿੱਚ ਕਿਵੇਂ ਬੰਦ ਕੀਤੇ ਗਏ। IB ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਕਾਕਪਿਟ ਵੌਇਸ ਰਿਕਾਰਡਰ ਉਤੇ ਇੱਕ ਪਾਇਲਟ ਨੂੰ ਦੂਜੇ ਤੋਂ ਪੁੱਛਦੇ ਹੋਏ ਸੁਣਿਆ ਗਿਆ ਕਿ ਉਸ ਨੇ ਫਿਊਲ ਕਿਉਂ ਬੰਦ ਕੀਤਾ। ਦੂਜੇ ਪਾਇਲਟ ਨੇ ਜਵਾਬ ਦਿੱਤਾ ਕਿ ਉਸ ਨੇ ਅਜਿਹਾ ਨਹੀਂ ਕੀਤਾ।
ਏਅਰ ਇੰਡੀਆ ਨੇ ਕਿਹਾ – ਬੋਇੰਗ-787 ਜਹਾਜ਼ ਦੇ ਫਿਊਲ ਸਵਿੱਚ ਵਿੱਚ ਕੋਈ ਨੁਕਸ ਨਹੀਂ ਸੀ
ਏਅਰ ਇੰਡੀਆ ਨੇ ਬੁੱਧਵਾਰ ਨੂੰ ਆਪਣੇ ਸਾਰੇ ਬੋਇੰਗ-787 ਸੀਰੀਜ਼ ਦੇ ਜਹਾਜ਼ਾਂ ਦੇ ਫਿਊਲ ਕੰਟਰੋਲ ਸਵਿੱਚ (FCS) ਦੇ ਲਾਕਿੰਗ ਫੀਚਰ ਦੀ ਜਾਂਚ ਪੂਰੀ ਹੋਣ ਬਾਰੇ ਜਾਣਕਾਰੀ ਦਿੱਤੀ। ਆਪਣੇ ਪਾਇਲਟਾਂ ਨੂੰ ਭੇਜੇ ਗਏ ਇੱਕ ਸੰਦੇਸ਼ ਵਿੱਚ, ਏਅਰਲਾਈਨ ਕੰਪਨੀ ਨੇ ਕਿਹਾ ਕਿ ਜਾਂਚ ਦੌਰਾਨ ਫਿਊਲ ਸਵਿੱਚ ਵਿੱਚ ਕੋਈ ਨੁਕਸ ਨਹੀਂ ਪਾਇਆ ਗਿਆ।
ਕੰਪਨੀ ਨੇ ਕਿਹਾ ਕਿ ਸਾਰੇ ਬੋਇੰਗ-787 ਜਹਾਜ਼ਾਂ ਵਿੱਚ ਥ੍ਰੋਟਲ ਕੰਟਰੋਲ ਮੋਡੀਊਲ (TCM) ਨੂੰ ਵੀ ਬਦਲ ਦਿੱਤਾ ਗਿਆ ਹੈ। ਫਿਊਲ ਕੰਟਰੋਲ ਸਵਿੱਚ TCM ਦਾ ਇੱਕ ਮਹੱਤਵਪੂਰਨ ਹਿੱਸਾ ਹੈ। 14 ਜੁਲਾਈ ਨੂੰ ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਏਵੀਏਸ਼ਨ (DGCA) ਨੇ ਸਾਰੀਆਂ ਏਅਰਲਾਈਨ ਕੰਪਨੀਆਂ ਨੂੰ 21 ਜੁਲਾਈ ਤੱਕ ਸਾਰੇ ਬੋਇੰਗ 737 ਅਤੇ 787 ਸੀਰੀਜ਼ ਦੇ ਜਹਾਜ਼ਾਂ ਵਿੱਚ ਫਿਊਲ ਸਵਿੱਚ ਦੀ ਜਾਂਚ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ।
ਏਅਰ ਇੰਡੀਆ ਕੋਲ ਕੁੱਲ 33 ਬੋਇੰਗ-787 ਡ੍ਰੀਮਲਾਈਨਰ ਜਹਾਜ਼ ਹਨ। ਇੰਡੀਗੋ ਕੋਲ ਸੱਤ B-737 ਮੈਕਸ 8 ਅਤੇ ਇੱਕ B-787-9 ਜਹਾਜ਼ ਹਨ। ਇਹ ਸਾਰੇ ਜਹਾਜ਼ ਲੀਜ਼, ਵੈੱਟ ਲੀਜ਼ ਜਾਂ ਡੈਂਪ ਲੀਜ਼ ‘ਤੇ ਹਨ। ਇਸ ਲਈ ਇਹ ਭਾਰਤ ਵਿੱਚ ਰਜਿਸਟਰਡ ਨਹੀਂ ਹਨ।
ਹਾਦਸੇ ਦੀ ਸ਼ੁਰੂਆਤੀ ਰਿਪੋਰਟ ਬਾਰੇ ਸਰਕਾਰ ਨੇ ਕਿਹਾ ਹੈ ਕਿ ਇਸ ‘ਤੇ ਅਧਿਐਨ ਕੀਤਾ ਜਾ ਰਿਹਾ ਹੈ। ਇਸ ‘ਤੇ ਅਜੇ ਕੋਈ ਸਿੱਟਾ ਨਹੀਂ ਕੱਢਿਆ ਜਾਣਾ ਚਾਹੀਦਾ।
ਪਾਇਲਟ ਸੰਗਠਨ ਨੇ ਕਿਹਾ – ਪਾਇਲਟਾਂ ਦੀ ਛਵੀ ਨੂੰ ਖਰਾਬ ਕਰਨ ਦੀ ਕੋਸ਼ਿਸ਼
ਪਾਇਲਟ ਸੰਗਠਨ ਫੈਡਰੇਸ਼ਨ ਆਫ ਇੰਡੀਅਨ ਪਾਇਲਟਸ (FIP) ਨੇ ਏਅਰ ਇੰਡੀਆ ਜਹਾਜ਼ ਹਾਦਸੇ ਦੀ ਸ਼ੁਰੂਆਤੀ ਜਾਂਚ ਰਿਪੋਰਟ ‘ਤੇ ਇਤਰਾਜ਼ ਜਤਾਇਆ ਹੈ। ਸੰਗਠਨ ਨੇ ਕਿਹਾ ਕਿ ਪੂਰੀ ਅਤੇ ਪਾਰਦਰਸ਼ੀ ਜਾਂਚ ਤੋਂ ਬਿਨਾਂ ਪਾਇਲਟਾਂ ਨੂੰ ਦੋਸ਼ੀ ਠਹਿਰਾਉਣਾ ਜਲਦਬਾਜ਼ੀ ਅਤੇ ਗੈਰ-ਜ਼ਿੰਮੇਵਾਰਾਨਾ ਹੈ।
