ਮੋਗਾ ਰੈਲੀ ਲਈ ਝੰਡੇ, ਸਾਊਂਡ ਸਿਸਟਮ, ਟੈਂਟ, ਕੁਰਸੀਆਂ ਤੇ ਏਸੀ ਦਿੱਲੀ ਤੋਂ ਲਿਆਂਦੇ ਗਏ : ਝਿੰਝਰ

ਕਿਹਾ, ਦਿੱਲੀ ਤੋਂ ਹੁਕਮਾਂ ‘ਤੇ ਸਿਆਸੀ ਦਿਖਾਵੇ ਦਾ ਭਾਰ ਪੰਜਾਬ ਦੀ ਜਨਤਾ ਕਿਉਂ ਝੱਲੇ?

ਚੰਡੀਗੜ੍ਹ, 16 ਫਰਵਰੀ (ਕਮਲਜੋਤ ਕਾਂਸਲ) : ਮੋਗਾ ਵਿੱਚ ਆਯੋਜਿਤ ਆਮ ਆਦਮੀ ਪਾਰਟੀ ਦੀ ‘ਯੁੱਧ ਨਸ਼ਿਆਂ ਵਿਰੁੱਧ’ ਰੈਲੀ ਨੂੰ ਲੈ ਕੇ ਸ਼੍ਰੋਮਣੀ ਅਕਾਲੀ ਦਲ ਯੂਥ ਦੇ ਪ੍ਰਧਾਨ ਸਰਬਜੀਤ ਸਿੰਘ ਝਿੰਝਰ ਨੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ। ਉਨ੍ਹਾਂ ਨੇ ਪੰਜਾਬ ਸਰਕਾਰ ਦੀ ਭੂਮਿਕਾ ਅਤੇ ਦਿੱਲੀ ਵੱਲੋਂ ਕਥਿਤ ਦਖਲਅੰਦਾਜ਼ੀ ‘ਤੇ ਗੰਭੀਰ ਸਵਾਲ ਖੜ੍ਹੇ ਕੀਤੇ ਹਨ। ਝਿੰਝਰ ਨੇ ਕਿਹਾ ਕਿ ਜੇਕਰ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵਾਕਈ ਬੀਮਾਰ ਸਨ ਅਤੇ ਮੋਹਾਲੀ ਦੇ ਫ਼ੋਰਟਿਸ ਹਸਪਤਾਲ ਵਿੱਚ ਚੈਕਅਪ ਲਈ ਦਾਖਲ ਹੋਏ ਸਨ ਤਾਂ ਅਚਾਨਕ ਐਸਾ ਕੀ ਬਦਲ ਗਿਆ ਕਿ ਉਹ ਰਾਜਨੀਤਿਕ ਰੈਲੀ ਵਿੱਚ ਸ਼ਾਮਲ ਹੋਣ ਲਈ ਤਿਆਰ ਹੋ ਗਏ? ਉਨ੍ਹਾਂ ਪੁੱਛਿਆ, “ਕੀ ਬੀਮਾਰੀ ਨੂੰ ਹਮਦਰਦੀ ਲਈ ਦਿਖਾਇਆ ਗਿਆ ਸੀ ਜਾਂ ਫਿਰ ਸਰਕਾਰ ਚਲਾਉਣ ਤੋਂ ਵੱਧ ਰਾਜਨੀਤਿਕ ਦਿਖਾਵਾ ਮਹੱਤਵਪੂਰਨ ਹੈ?” ਉਨ੍ਹਾਂ ਅੱਗੇ ਸਵਾਲ ਕੀਤਾ ਕਿ ਕੀ ਪੰਜਾਬ ਲੀਡਰਸ਼ਿਪ ਅਤੇ ਆਮ ਆਦਮੀ ਪਾਰਟੀ ਦੇ ਦਿੱਲੀ ਹਾਈਕਮਾਂਡ ਵਿਚਕਾਰ ਚੱਲ ਰਹੇ ਅੰਦਰੂਨੀ ਮਸਲੇ ਸੱਚਮੁੱਚ ਸੁਲਝ ਗਏ ਹਨ? “ਕੀ ਭਗਵੰਤ ਮਾਨ ਦਿੱਲੀ ਦੇ ਦਬਾਅ ਹੇਠ ਝੁਕ ਗਏ ਹਨ? ਕੀ ਪੰਜਾਬ ਨੂੰ ਦਿੱਲੀ ਤੋਂ ਚਲਾਇਆ ਜਾ ਰਿਹਾ ਹੈ?” ਉਨ੍ਹਾਂ ਟਿੱਪਣੀ ਕੀਤੀ। ਝਿੰਝਰ ਨੇ ਦੋਸ਼ ਲਾਇਆ ਕਿ ਰੈਲੀ ਦਾ ਪੂਰਾ ਪ੍ਰਬੰਧ—ਝੰਡੇ, ਸਾਊਂਡ ਸਿਸਟਮ, ਟੈਂਟ, ਕੁਰਸੀਆਂ ਅਤੇ ਏਸੀ—ਦਿੱਲੀ ਤੋਂ ਲਿਆਂਦੇ ਗਏ ਅਤੇ ਇਸਦਾ ਖਰਚਾ ਪੰਜਾਬ ਦੇ ਲੋਕਾਂ ਦੇ ਪੈਸੇ ਨਾਲ ਕੀਤਾ ਗਿਆ।“ ਦਿੱਲੀ ਤੋਂ ਹੁਕਮਾਂ ‘ਤੇ ਸਿਆਸੀ ਦਿਖਾਵੇ ਦਾ ਭਾਰ ਪੰਜਾਬ ਦੀ ਜਨਤਾ ਕਿਉਂ ਝੱਲੇ?” ਉਨ੍ਹਾਂ ਨੇ ਸਵਾਲ ਕੀਤਾ। ਕੇਜਰੀਵਾਲ ‘ਤੇ ਨਿਸ਼ਾਨਾ ਸਾਧਦੇ ਹੋਏ ਉਨ੍ਹਾਂ ਕਿਹਾ ਕਿ ਪਾਰਟੀ ਲੀਡਰਸ਼ਿਪ ਨੂੰ ਸਾਫ ਕਰਨਾ ਚਾਹੀਦਾ ਹੈ ਕਿ ਕੀ ਪੰਜਾਬ ਦੀ ਪ੍ਰਸ਼ਾਸਨਿਕ ਕਾਰਵਾਈ ਸੁਤੰਤਰ ਤੌਰ ‘ਤੇ ਚੱਲ ਰਹੀ ਹੈ ਜਾਂ ਰਿਮੋਟ ਕੰਟਰੋਲ ਨਾਲ। ਅੰਤ ਵਿੱਚ ਸਰਬਜੀਤ ਸਿੰਘ ਝਿੰਝਰ ਨੇ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਇਵੈਂਟ-ਆਧਾਰਿਤ ਰਾਜਨੀਤੀ ਨੂੰ ਬੇਨਕਾਬ ਕਰਦਾ ਰਹੇਗਾ ਅਤੇ ਨਸ਼ਿਆਂ, ਸੁਸ਼ਾਸਨ ਅਤੇ ਵਿੱਤੀ ਪਾਰਦਰਸ਼ਤਾ ਵਰਗੇ ਗੰਭੀਰ ਮਸਲਿਆਂ ‘ਤੇ ਸਰਕਾਰ ਨੂੰ ਜਵਾਬਦੇਹ ਬਣਾਉਂਦਾ ਰਹੇਗਾ।