ਸਿਹਤ ਮੰਤਰੀ ਦੇ ਜ਼ਿਲ੍ਹੇ ਵਿਚ ਡੇਂਗੂ ਦਾ ਕਹਿਰ, 290 ਮਰੀਜ਼ਾਂ ਦੀ ਪੁਸ਼ਟੀ

ਸੂਬੇ ਵਿਚ 1616 ਲੋਕਾਂ ਨੂੰ ਹੋਇਆ ਡੇਂਗੂ, ਸਿਹਤ ਵਿਭਾਗ ਨੂੰ ਹੱਥਾਂ-ਪੈਰਾਂ ਦੀ ਪਈ
(ਗੁਰਪ੍ਰਤਾਪ ਸਾਹੀ)
ਪਟਿਆਲਾ, 15 ਅਕਤੂਬਰ : ਪੰਜਾਬ ਵਿਚ ਡੇਂਗੂ ਦੇ ਵਧਦੇ ਪ੍ਰਕੋਪ ਨੇ ਲੋਕਾਂ ਦੀ ਨੀਂਦ ਉਡਾ ਦਿਤੀ ਹੈ। ਸੂਬੇ ਭਰ ਵਿਚ ਹੁਣ ਤਕ 1,616 ਲੋਕ ਪੀੜਤ ਹੋ ਚੁੱਕੇ ਹਨ, ਜਿਨ੍ਹਾਂ ਵਿਚੋਂ 290 ਮਰੀਜ਼ ਸਿਰਫ਼ ਪਟਿਆਲਾ ਜ਼ਿਲ੍ਹੇ ਹਨ ਜਿਸ ਨਾਲ ਪੰਜਾਬ ਦੇ ਸਿਹਤ ਮੰਤਰੀ ਸਬੰਧ ਰੱਖਦੇ ਹਨ। ਲੁਧਿਆਣਾ 178 ਕੇਸਾਂ ਨਾਲ ਦੂਜੇ ਸਥਾਨ ‘ਤੇ ਹੈ। ਸਿਹਤ ਵਿਭਾਗ ਦਾ ਕਹਿਣਾ ਹੈ ਕਿ ਇਸ ਵਾਰ ਜੁਲਾਈ ਤੋਂ ਨਵੰਬਰ ਤਕ ਮੱਛਰਾਂ ਦਾ ਪ੍ਰਜਨਨ ਸਮਾਂ ਹੋਰ ਵੀ ਖ਼ਤਰਨਾਕ ਬਣ ਗਿਆ ਹੈ। ਇਹ ਬਿਮਾਰੀ ਐਡੀਸ ਏਜਿਪਟੀ ਮੱਛਰਾਂ ਕਾਰਨ ਫੈਲਦੀ ਹੈ, ਜੋ ਇਸ ਸਮੇਂ ਕਾਫ਼ੀ ਸਰਗਰਮ ਹਨ।ਹੜ੍ਹਾਂ ਅਤੇ ਭਾਰੀ ਵਰਖਾ ਨੇ ਕਈ ਇਲਾਕਿਆਂ ਵਿੱਚ ਪਾਣੀ ਦੇ ਰੁਕਣ ਨੂੰ ਵਧਾ ਦਿੱਤਾ ਹੈ, ਜਿਸ ਨਾਲ ਮੱਛਰਾਂ ਦੀ ਗਿਣਤੀ ਵਿੱਚ ਵਾਧਾ ਹੋਇਆ। ਅਕਤੂਬਰ ਵਿੱਚ ਵੀ ਮੱਛਰਾਂ ਦੇ ਲਾਰਵੇ ਮਿਲ ਰਹੇ ਹਨ, ਜੋ ਆਉਣ ਵਾਲੇ ਹਫ਼ਤਿਆਂ ਵਿੱਚ ਕੇਸਾਂ ਵਿੱਚ ਵਾਧੇ ਦੇ ਸੰਕੇਤ ਦਿੰਦੇ ਹਨ। ਡੇਂਗੂ ਵਾਇਰਸ ਦੇ ਚਾਰ ਕਿਸਮਾਂ ਹੁੰਦੀਆਂ ਹਨ – ਡੀਈਐਨਵੀ-1, ਡੀਈਐਨਵੀ-2, ਡੀਈਐਨਵੀ-3 ਅਤੇ ਡੀਈਐਨਵੀ-4। ਇਸ ਸਮੇਂ ਸਭ ਤੋਂ ਜ਼ਿਆਦਾ ਡੀਈਐਨਵੀ-2 ਵੈਰੀਅੰਟ ਸਾਹਮਣੇ ਆ ਰਿਹਾ ਹੈ, ਜੋ ਤੇਜ਼ ਬੁਖਾਰ ਦੇ ਨਾਲ ਉਲਟੀ, ਪੇਟ ਦਰਦ, ਖੂਨ ਵਹਿਣ ਅਤੇ ਮਾਨਸਿਕ ਭ੍ਰਮ ਵਰਗੇ ਗੰਭੀਰ ਲੱਛਣ ਪੈਦਾ ਕਰਦਾ ਹੈ। ਦੇਰ ਨਾਲ ਇਲਾਜ ਹੋਣ ਤੇ ਇਹ ਡੇਂਗੂ ਹੈਮਰੇਜਿਕ ਸਿੰਡਰੋਮ ਅਤੇ ਡੇਂਗੂ ਸ਼ਾਕ ਸਿੰਡਰੋਮ ਵਰਗੀ ਜਾਨਲੇਵਾ ਸਥਿਤੀ ਦਾ ਕਾਰਨ ਬਣ ਸਕਦਾ ਹੈ। ਡੈਂਗੂ ਨਿਯੰਤਰਣ ਲਈ ਪੰਜਾਬ ਸਿਹਤ ਵਿਭਾਗ ਨੇ 40,000 ਤੋਂ ਵੱਧ ਟੈਸਟ ਕਰ ਲਏ ਹਨ। ਸੰਗਰੂਰ ਵਿੱਚ 24 ਡੈਂਗੂ ਅਤੇ 35 ਚਿਕਨਗੁਨੀਆ ਦੇ ਕੇਸ ਮਿਲੇ ਹਨ। ਸਿਹਤ ਵਿਭਾਗ ਦੀ ਅਪੀਲ ਹੈ ਕਿ ਲੋਕ ਆਪਣੇ ਘਰਾਂ ਅਤੇ ਆਲੇ-ਦੁਆਲੇ ਪਾਣੀ ਜਮਾਉਣ ਨਾ ਦੇਣ, ਹਰ ਹਫ਼ਤੇ ਕੂਲਰ, ਫੁੱਲਦਾਨ ਅਤੇ ਭਾਂਡੇ ਸਾਫ਼ ਕਰਨ ਅਤੇ ਮੱਛਰ-ਨਾਸ਼ਕ ਕ੍ਰੀਮ ਅਤੇ ਸਪਰੇ ਦਾ ਉਪਯੋਗ ਕਰਨ। ਸਰਕਾਰ ਨੇ 882 ਆਮ ਆਦਮੀ ਕਲੀਨਿਕ ਅਤੇ ਜ਼ਿਲ੍ਹਾ ਹਸਪਤਾਲਾਂ ਵਿੱਚ ELISA (NS1 IgM) ਟੈਸਟ ਮੁਫ਼ਤ ਕਰਵਾ ਰੱਖੇ ਹਨ। ਨਿੱਜੀ ਲੈਬਾਂ ਲਈ ਡੇਂਗੂ ਟੈਸਟ ਦੀ ਵੱਧਤਮ ਕੀਮਤ 600 ਰੁਪਏ ਨਿਰਧਾਰਿਤ ਕੀਤੀ ਗਈ ਹੈ, ਪਰ ਸ਼ਿਕਾਇਤਾਂ ਮਿਲ ਰਹੀਆਂ ਹਨ ਕਿ ਕਈ ਲੈਬਾਂ 700 ਤੋਂ 1,000 ਰੁਪਏ ਤੱਕ ਲੈ ਰਹੀਆਂ ਹਨ। ਵਿਭਾਗ ਨੇ ਇਹਨਾਂ ਨੂੰ ਚੇਤਾਵਨੀ ਦਿੱਤੀ ਹੈ। ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਸਿਰਫ ਸਰਕਾਰੀ ਜਾਂ ਅਧਿਕ੍ਰਿਤ ਲੈਬਾਂ ਵਿੱਚ ਹੀ ਟੈਸਟ ਕਰਵਾਏ।
ਲੋਕਾਂ ਲਈ ਸਿੱਧੀ ਅਪੀਲ
ਘਰ ਅਤੇ ਆਲੇ-ਦੁਆਲੇ ਪਾਣੀ ਖੜਾ ਨਾ ਹੋਣ ਦਿਉ
ਮੱਛਰ-ਰੋਧੀ ਕ੍ਰੀਮ, ਕਾਇਲ ਅਤੇ ਜਾਲ (ਨੈੱਟ) ਦਾ ਇਸਤਮਾਲ ਕਰੋ
ਤੇਜ਼ ਬੁਖ਼ਾਰ, ਸਰੀਰ ਦਰਦ ਜਾਂ ਉਲਟੀ ਹੋਣ ਦੀ ਸਥਿਤੀ ਵਿਚ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰੋ
ਡੇਂਗੂ ਟੈਸਟ ਲਈ ਸਰਕਾਰੀ ਕਲੀਨਿਕ ਅਤੇ ਹਸਪਤਾਲਾਂ ਵਿਚ ਜਾਉ