ਦੀਪਕ ਢਾਬੇ ਵਾਲਿਆਂ ਵਿਰੁਧ ਗੁਰੂ-ਘਰ ਦੀ ਜ਼ਮੀਨ ਹੜੱਪਣ ਦਾ ਲੱਗਾ ਦੋਸ਼ !
ਬਰਨਾਲਾ, 26 ਅਗਸਤ (ਨਿਊਜ਼ ਟਾਊਨ ਨੈਟਵਰਕ)
ਬਰਨਾਲਾ ਦੇ ਧਨੌਲਾ ਵਿਚ ਪੰਜਾਬ ਦੇ ਅਣਗਿਣਤ ਢਾਬਿਆਂ ਵਿਚੋਂ ਇਕ ਪ੍ਰਸਿੱਧ ਦੀਪਕ ਢਾਬਾ ਧਨੌਲਾ ਦੇ 2 ਲੋਕਾਂ ਸਮੇਤ 4 ਲੋਕਾਂ ਵਿਰੁਧ ਗੁਰੂ-ਘਰ ਦੀ ਜ਼ਮੀਨ ਨੂੰ ਜਾਅਲੀ ਦਸਤਖ਼ਤਾਂ ਨਾਲ ਰਜਿਸਟਰ ਕਰਵਾਉਣ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਗਿਆ ਹੈ। ਇਸ ਮੌਕੇ ਗੁਰਦੁਆਰਾ ਸ਼ਹੀਦ ਬਾਬਾ ਨੱਥਾ ਸਿੰਘ ਧਨੌਲਾ ਦੇ ਪ੍ਰਬੰਧਕਾਂ ਅਤੇ ਸ਼ਿਕਾਇਤਕਰਤਾ ਗੁਰਨਾਮ ਸਿੰਘ ਨੇ ਪ੍ਰਸਿੱਧ ਦੀਪਕ ਢਾਬਾ ਦੇ ਮਾਲਕਾਂ, ਇਕ ਔਰਤ ਅਤੇ ਇਕ ਆਦਮੀ ‘ਤੇ ਗੁਰੂ ਘਰ ਦੀ ਜ਼ਮੀਨ ਦੀ ਧੋਖਾਧੜੀ ਨਾਲ ਰਜਿਸਟਰੀ ਕਰਵਾਉਣ ਦੇ ਗੰਭੀਰ ਇਲਜ਼ਾਮ ਲਗਾਏ ਅਤੇ ਕਿਹਾ ਕਿ ਗੁਰੂ-ਘਰ ਦੀ ਕਰੋੜਾਂ ਰੁਪਏ ਦੀ ਜ਼ਮੀਨ ਧਨੌਲਾ-ਭੀਖੀ ਮੁੱਖ ਸੜਕ ‘ਤੇ ਸਥਿਤ ਹੈ। ਗੁਰੂ-ਘਰ ਦੇ ਪ੍ਰਬੰਧਕਾਂ ਵਿਚਕਾਰ ਪਰਿਵਾਰਕ ਝਗੜਾ ਚੱਲ ਰਿਹਾ ਸੀ। ਗੁਰੂ-ਘਰ ਕੋਲ ਧਨੌਲਾ-ਭੀਖੀ ਸੜਕ ‘ਤੇ ਕਰੋੜਾਂ ਰੁਪਏ ਦੀ 27 ਕਨਾਲ ਜ਼ਮੀਨ ਹੈ, ਜਿਸ ਵਿਚੋਂ ਪਾਲ ਕੌਰ ਅਤੇ ਅਜੈ ਨੌਨਿਹਾਲ ਸਿੰਘ ਨੇ ਕਰੋੜਾਂ ਰੁਪਏ ਦੀ 20 ਕਨਾਲ ਜ਼ਮੀਨ ਦੋ ਵੱਖ-ਵੱਖ ਰਜਿਸਟਰੀਆਂ ਤਹਿਤ ਲੱਖਾਂ ਰੁਪਏ ਵਿੱਚ ਵੇਚ ਦਿਤੀ। ਉਨ੍ਹਾਂ ਨੇ ਇਲਜ਼ਾਮ ਲਾਇਆ ਕਿ ਪ੍ਰਤੀ ਏਕੜ ਜ਼ਮੀਨ ਦੀ ਕੀਮਤ 3 ਤੋਂ 4 ਕਰੋੜ ਰੁਪਏ ਹੈ, ਪਰ ਇਹ ਸਿਰਫ਼ 87 ਲੱਖ ਰੁਪਏ ਵਿੱਚ ਹੀ ਵਿਕ ਗਈ।
ਉਨ੍ਹਾਂ ਇਸ ਸਬੰਧੀ ਦੀਪਕ ਢਾਬਾ ਨਾਲ ਪੰਚਾਇਤ ਵੀ ਕੀਤੀ, ਜਿਸ ਨੇ ਪੰਚਾਇਤ ਨੂੰ ਜ਼ਮੀਨ ਨਾ ਖਰੀਦਣ ਦਾ ਭਰੋਸਾ ਦਿੱਤਾ। ਪਰ ਤੀਜੇ ਦਿਨ ਹੀ ਢਾਬਾ ਪ੍ਰਬੰਧਕਾਂ ਨੇ ਧਨੌਲਾ ਦੇ ਕੌਂਸਲਰ ਕੇਵਲ ਸਿੰਘ ਨੂੰ ਗੁੰਮਰਾਹ ਕੀਤਾ ਅਤੇ ਪਹਿਲੀ ਰਜਿਸਟ੍ਰੇਸ਼ਨ ਦੌਰਾਨ ਪੰਜਾਬੀ ਵਿੱਚ ਉਨ੍ਹਾਂ ਦੇ ਦਸਤਖ਼ਤ ਕਰਵਾ ਲਏ। ਉਹ ਰਜਿਸਟ੍ਰੇਸ਼ਨ ਢਾਬੇ ‘ਤੇ ਹੀ ਕੀਤੀ ਗਈ ਸੀ। ਸ਼ਿਕਾਇਤਕਰਤਾ ਗੁਰਨਾਮ ਸਿੰਘ ਨੇ ਕਿਹਾ ਕਿ ਦੂਜੀ ਰਜਿਸਟ੍ਰੇਸ਼ਨ ਦੌਰਾਨ ਕੌਂਸਲਰ ਕੇਵਲ ਸਿੰਘ ਦੇ ਅੰਗਰੇਜ਼ੀ ਵਿਚ ਜਾਅਲੀ ਦਸਤਖ਼ਤ ਕਰਵਾ ਕੇ ਰਜਿਸਟ੍ਰੇਸ਼ਨ ਕਰਵਾਈ ਗਈ। ਕੌਂਸਲਰ ਕੇਵਲ ਸਿੰਘ ਨੇ ਸਿਰਫ਼ ਸਤਵੀਂ ਜਮਾਤ ਤਕ ਪੜ੍ਹਾਈ ਕੀਤੀ ਹੈ ਅਤੇ ਪੰਜਾਬੀ ਵਿਚ ਦਸਤਖ਼ਤ ਵੀ ਕਰਦੇ ਹਨ ਪਰ ਜ਼ਮੀਨ ਹੜੱਪਣ ਦੇ ਮਾਮਲੇ ਵਿਚ ਕੌਂਸਲਰ ਦੇ ਕੁਝ ਹੋਰ ਲੋਕਾਂ ਦੇ ਦਸਤਖ਼ਤ ਅੰਗਰੇਜ਼ੀ ਵਿਚ ਕੀਤੇ ਗਏ ਸਨ। ਇਸ ਮਾਮਲੇ ਸਬੰਧੀ ਉਨ੍ਹਾਂ ਬਰਨਾਲਾ ਜ਼ਿਲ੍ਹੇ ਦੇ ਐਸਐਸਪੀ ਬਰਨਾਲਾ ਨੂੰ ਸ਼ਿਕਾਇਤ ਦਿਤੀ ਸੀ। ਡੇਢ ਮਹੀਨੇ ਦੀ ਜਾਂਚ ਤੋਂ ਬਾਅਦ ਸੀਨੀਅਰ ਪੁਲਿਸ ਅਧਿਕਾਰੀਆਂ ਨੇ ਦੀਪਕ ਢਾਬਾ ਦੇ ਦੋ ਲੋਕਾਂ ਸਮੇਤ ਕੁੱਲ 4 ਲੋਕਾਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਹੈ। ਸ਼ਿਕਾਇਤਕਰਤਾ ਗੁਰਨਾਮ ਸਿੰਘ ਨੇ ਇਹ ਵੀ ਇਲਜ਼ਾਮ ਲਗਾਇਆ ਕਿ ਸਾਨੂੰ ਧਮਕੀਆਂ ਦਿਤੀਆਂ ਜਾ ਰਹੀਆਂ ਹਨ ਅਤੇ ਕੇਸ ਨੂੰ ਝੂਠਾ ਸਾਬਤ ਕਰਨ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਉਨ੍ਹਾਂ ਮੁਲਜ਼ਮਾਂ ਦੀ ਤੁਰੰਤ ਗ੍ਰਿਫ਼ਤਾਰੀ ਦੀ ਮੰਗ ਕੀਤੀ ਹੈ। ਰਜਿਸਟਰੀ ‘ਤੇ ਦਸਤਖ਼ਤ ਕਰਨ ਵਾਲੇ ਕੌਂਸਲਰ ਕੇਵਲ ਸਿੰਘ ਵੀ ਇਸ ਮਾਮਲੇ ਸਬੰਧੀ ਮੀਡੀਆ ਦੇ ਸਾਹਮਣੇ ਆਏ ਹਨ।
ਉਨ੍ਹਾਂ ਦੱਸਿਆ ਕਿ ਉਹ ਸਿਰਫ਼ ਸੱਤ ਜਮਾਤਾਂ ਪੜ੍ਹੇ ਹਨ ਅਤੇ ਉਹ ਪੰਜਾਬੀ ਵਿਚ ਦਸਤਖ਼ਤ ਕਰਨਾ ਜਾਣਦੇ ਹਨ ਪਰ ਅੰਗਰੇਜ਼ੀ ਵਿਚ ਨਹੀਂ। ਉਨ੍ਹਾਂ ਸਪੱਸ਼ਟ ਤੌਰ ‘ਤੇ ਕਿਹਾ ਕਿ ਢਾਬਾ ਮਾਲਕਾਂ ਨੇ ਉਨ੍ਹਾਂ ਨਾਲ ਧੋਖਾ ਕੀਤਾ ਅਤੇ ਪਹਿਲੀ ਜਾਅਲੀ ਰਜਿਸਟਰੀ ਢਾਬੇ ਵਿਚ ਹੀ ਕਰਵਾ ਲਈ। ਇਸ ਤੋਂ ਬਾਅਦ, ਦੂਜੀ ਰਜਿਸਟਰੀ ਵਿਚ, ਕਿਸੇ ਹੋਰ ਵਿਅਕਤੀ ਨੇ ਅੰਗਰੇਜ਼ੀ ਵਿਚ ਜਾਅਲੀ ਦਸਤਖਤ ਕਰਕੇ ਰਜਿਸਟਰੀ ਕਰਵਾਈ, ਕਿਉਂਕਿ ਉਨ੍ਹਾਂ ਨੇ ਅੱਜ ਤਕ ਅੰਗਰੇਜ਼ੀ ਵਿਚ ਦਸਤਖਤ ਨਹੀਂ ਕੀਤੇ ਹਨ। ਧਨੌਲਾ ਥਾਣੇ ਦੇ ਐਸ.ਐਚ.ਓ. ਲਖਬੀਰ ਸਿੰਘ ਨੇ ਦੱਸਿਆ ਕਿ ਸ਼ਿਕਾਇਤਕਰਤਾ ਸਤਨਾਮ ਸਿੰਘ ਅਤੇ ਗੁਰਨਾਮ ਸਿੰਘ ਤੋਂ ਸ਼ਿਕਾਇਤ ਮਿਲੀ ਹੈ ਜਿਸ ਤਹਿਤ ਦੀਪਕ ਦੁੱਗਲ, ਸੰਦੀਪ ਦੁੱਗਲ, ਅਜੈ ਨੌਨਿਹਾਲ ਸਿੰਘ ਅਤੇ ਪਾਲ ਕੌਰ ਵਿਰੁਧ ਧਾਰਾ 319 (2), 318 (4) ਬੀ.ਐਨ.ਐਸ 117 ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ ਅਤੇ ਗ੍ਰਿਫ਼ਤਾਰੀ ਦੀ ਪ੍ਰਕਿਰਿਆ ਜਾਰੀ ਹੈ। ਉਧਰ, ਜਦ ਇਸ ਮਾਮਲੇ ਸਬੰਧੀ ਧਨੌਲਾ ਦੀਪਕ ਢਾਬਾ ਦੇ ਪ੍ਰਬੰਧਕਾਂ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਮੀਡੀਆ ਕੋਲ ਆਏ ਬਿਨਾਂ ਹੀ ਜਵਾਬ ਦੇ ਦਿਤਾ।
