ਚੰਡੀਗੜ੍ਹ ਅਦਾਲਤ ਨੇ ਸਪਾਈਸਜੈਟ ਨੂੰ ਲਗਾਇਆ 10 ਹਜ਼ਾਰ ਦਾ ਜੁਰਮਾਨਾ
ਯਾਤਰੀ ਦਾ ਸਾਮਾਨ ਅਹਿਮਦਾਬਾਦ ਦੀ ਬਜਾਏ ਭੇਜਿਆ ਬੰਗਲੁਰੂ
ਚੰਡੀਗੜ੍ਹ, 14 ਜੁਲਾਈ (ਨਿਊਜ਼ ਟਾਊਨ ਨੈਟਵਰਕ) : ਚੰਡੀਗੜ੍ਹ ਦੀ ਖਪਤਕਾਰ ਅਦਾਲਤ ਨੇ ਸਪਾਈਸਜੈੱਟ ਏਅਰਲਾਈਨਜ਼ ਨੂੰ ਦਿੱਲੀ ਤੋਂ ਅਹਿਮਦਾਬਾਦ ਜਾ ਰਹੇ ਇਕ ਯਾਤਰੀ ਦੇ ਸਾਮਾਨ ਨੂੰ ਗਲਤ ਜਗ੍ਹਾ ਭੇਜਣ ਲਈ ਸੇਵਾ ਵਿਚ ਲਾਪਰਵਾਹੀ ਦਾ ਦੋਸ਼ੀ ਠਹਿਰਾਇਆ ਹੈ। ਅਦਾਲਤ ਨੇ ਏਅਰਲਾਈਨਜ਼ ਨੂੰ 10,000 ਰੁਪਏ ਦਾ ਮੁਆਵਜ਼ਾ ਦੇਣ ਦਾ ਹੁਕਮ ਦਿਤਾ ਹੈ।
ਸੈਕਟਰ-47ਸੀ ਚੰਡੀਗੜ੍ਹ ਵਾਸੀ ਸ਼ਿਕਾਇਤਕਰਤਾ ਸਾਹਿਬ ਪਾਇਲ ਨੇ ਕਿਹਾ ਕਿ ਉਹ ਗੁਜਰਾਤ ਫਲਾਇੰਗ ਸਕੂਲ, ਵਡੋਦਰਾ ਵਿਚ ਪ੍ਰੀਖਿਆ ਦੇਣ ਜਾ ਰਿਹਾ ਸੀ। ਇਸ ਲਈ ਉਸਨੇ ਸਪਾਈਸਜੈੱਟ ਨਾਲ ਦਿੱਲੀ ਤੋਂ ਅਹਿਮਦਾਬਾਦ ਦੀ ਟਿਕਟ ਬੁੱਕ ਕਰਵਾਈ ਸੀ। ਪਰ ਯਾਤਰਾ ਦੌਰਾਨ ਉਸਦਾ ਸਾਮਾਨ ਕਿਸੇ ਹੋਰ ਜਗ੍ਹਾ ਭੇਜ ਦਿਤਾ ਗਿਆ, ਜਿਸ ਕਾਰਨ ਉਸਨੂੰ ਬਹੁਤ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ।
ਕੇਸ ਦੀ ਸੁਣਵਾਈ ਤੋਂ ਬਾਅਦ ਅਦਾਲਤ ਨੇ ਸਵੀਕਾਰ ਕੀਤਾ ਕਿ ਸ਼ਿਕਾਇਤਕਰਤਾ ਦੀ ਸੇਵਾ ਏਅਰਲਾਈਨਜ਼ ਦੀ ਲਾਪਰਵਾਹੀ ਕਾਰਨ ਵਿਘਨ ਪਈ ਹੈ ਅਤੇ ਸਪਾਈਸਜੈੱਟ ਨੂੰ ਇਸਦਾ ਮੁਆਵਜ਼ਾ ਦੇਣਾ ਪਵੇਗਾ।
ਸ਼ਿਕਾਇਤਕਰਤਾ ਦੇ ਅਨੁਸਾਰ ਉਸਨੇ ਦਿੱਲੀ ਤੋਂ ਅਹਿਮਦਾਬਾਦ ਦੀ ਨਿਰਧਾਰਤ ਮਿਤੀ ‘ਤੇ ਯਾਤਰਾ ਕੀਤੀ, ਪਰ ਜਦੋਂ ਉਹ ਅਹਿਮਦਾਬਾਦ ਪਹੁੰਚਿਆ ਤਾਂ ਉਸਨੇ ਦੇਖਿਆ ਕਿ ਉਸਦਾ ਸਾਮਾਨ ਗਾਇਬ ਸੀ। ਜਦੋਂ ਉਸਨੇ ਤੁਰੰਤ ਏਅਰਲਾਈਨਜ਼ ਸਟਾਫ ਨੂੰ ਸੂਚਿਤ ਕੀਤਾ, ਤਾਂ ਉਸਨੂੰ ਇਕ ਅਨਿਯਮਿਤਤਾ ਰਿਪੋਰਟ (ਆਈਆਰ) ਦਰਜ ਕਰਨ ਲਈ ਕਿਹਾ ਗਿਆ।
ਪਾਇਲ ਨੇ ਕਿਹਾ ਕਿ ਉਸਨੂੰ ਤੁਰੰਤ ਵਡੋਦਰਾ ਲਈ ਰਵਾਨਾ ਹੋਣਾ ਪਿਆ, ਪਰ ਸਾਮਾਨ ਨਾ ਮਿਲਣ ਕਾਰਨ ਉਸਨੂੰ ਟੈਕਸੀ ਰਾਹੀਂ ਬਿਨਾਂ ਸਾਮਾਨ ਦੇ ਵਡੋਦਰਾ ਹਵਾਈ ਅੱਡੇ ਲਈ ਰਵਾਨਾ ਹੋਣਾ ਪਿਆ। ਅਗਲੇ ਦਿਨ ਉਸਨੂੰ ਦੱਸਿਆ ਗਿਆ ਕਿ ਸਾਮਾਨ ਗਲਤੀ ਨਾਲ ਬੰਗਲੌਰ ਭੇਜ ਦਿਤਾ ਗਿਆ ਸੀ ਅਤੇ 2 ਦਿਨਾਂ ਵਿਚ ਵਾਪਸ ਕਰ ਦਿਤਾ ਜਾਵੇਗਾ।
ਸਪਾਈਸਜੈੱਟ ਏਅਰਲਾਈਨਜ਼ ਨੇ ਜਵਾਬ ਦਿਤਾ ਕਿ ਉਹ ਯਾਤਰੀਆਂ ਜਾਂ ਸਾਮਾਨ ਦੀ ਡਿਲੀਵਰੀ ਵਿਚ ਦੇਰੀ ਲਈ ਜ਼ਿੰਮੇਵਾਰ ਨਹੀਂ ਹੈ। ਏਅਰਲਾਈਨਜ਼ ਨੇ ਹਵਾਈ ਆਵਾਜਾਈ ਐਕਟ, 2012 ਦੇ ਨਿਯਮ 13 (3) ਦਾ ਹਵਾਲਾ ਦਿਤਾ ਅਤੇ ਕਿਹਾ ਕਿ ਜੇਕਰ ਸਾਮਾਨ 7 ਦਿਨਾਂ ਦੇ ਅੰਦਰ ਵਾਪਸ ਕਰ ਦਿਤਾ ਜਾਂਦਾ ਹੈ ਤਾਂ ਸੇਵਾ ਵਿਚ ਕਮੀ ਨਹੀਂ ਮੰਨੀ ਜਾ ਸਕਦੀ। ਉਸਨੇ ਦਾਅਵਾ ਕੀਤਾ ਕਿ ਸਾਮਾਨ ਸ਼ਿਕਾਇਤਕਰਤਾ ਨੂੰ ਦੋ ਦਿਨਾਂ ਦੇ ਅੰਦਰ ਵਾਪਸ ਕਰ ਦਿਤਾ ਗਿਆ ਸੀ, ਇਸ ਲਈ ਉਹ ਮੁਆਵਜ਼ੇ ਦਾ ਹੱਕਦਾਰ ਨਹੀਂ ਹੈ।
ਹਾਲਾਂਕਿ ਖਪਤਕਾਰ ਅਦਾਲਤ ਨੇ ਏਅਰਲਾਈਨਜ਼ ਦੀਆਂ ਦਲੀਲਾਂ ਨੂੰ ਰੱਦ ਕਰ ਦਿਤਾ ਤੇ ਕਿਹਾ ਕਿ ਯਾਤਰੀ ਨੂੰ ਬਿਨਾਂ ਸਾਮਾਨ ਦੇ ਵਡੋਦਰਾ ਜਾਣਾ ਪਿਆ, ਜਿਸ ਨਾਲ ਉਸਨੂੰ ਬਹੁਤ ਅਸੁਵਿਧਾ ਹੋਈ। ਅਦਾਲਤ ਨੇ ਕਿਹਾ ਕਿ ਇਹ ਸੇਵਾ ਵਿਚ ਲਾਪਰਵਾਹੀ ਦਾ ਮਾਮਲਾ ਹੈ ਅਤੇ ਇਸ ਕਾਰਨ ਪੀੜਤ ਨੂੰ ਮਾਨਸਿਕ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ।
