ਮੱਧ ਵਰਗ ਲੋਕਾਂ ਨੂੰ ਵੱਡੀ ਰਾਹਤ, ਜੀਐਸਟੀ ਦੀਆਂ ਹੁਣ ਸਿਰਫ 2 ਸਲੈਬ: 5% ਤੇ 18%
ਨਰਾਤਿਆਂ ਦੇ ਪਹਿਲੇ ਦਿਨ 22 ਸਤੰਬਰ ਤੋਂ ਲਾਗੂ ਹੋਣਗੀਆਂ ਦੋਵੇਂ ਸਲੈਬ
ਰੋਟੀ-ਪੀਜ਼ਾ ਜੀਐਸਟੀ ਮੁਕਤ, ਸਿਹਤ-ਜੀਵਨ ਬੀਮੇ ‘ਤੇ ਵੀ ਟੈਕਸ ਮੁਕਤ: ਵਿੱਤ ਮੰਤਰੀ
ਜੀਐਸਟੀ ’ਚ ਬਦਲਾਅ ਨਾਗਰਿਕਾਂ ਦੇ ਜੀਵਨ ਨੂੰ ਬਿਹਤਰ ਬਣਾਉਣਗੇ: ਪ੍ਰਧਾਨ ਮੰਤਰੀ ਮੋਦੀ
ਨਵੀਂ ਦਿੱਲੀ, 4 ਸਤੰਬਰ (ਨਿਊਜ਼ ਟਾਊਨ ਨੈਟਵਰਕ) : ਹੁਣ 4 ਦੀ ਬਜਾਏ ਜੀਐਸਟੀ ਵਿਚ ਸਿਰਫ਼ ਦੋ ਸਲੈਬ ਹੋਣਗੇ 5% ਅਤੇ 18%। ਇਸ ਨਾਲ ਸਾਬਣ, ਸ਼ੈਂਪੂ, ਏਸੀ, ਕਾਰ ਵਰਗੀਆਂ ਆਮ ਜ਼ਰੂਰਤਾਂ ਸਸਤੀਆਂ ਹੋ ਜਾਣਗੀਆਂ। ਇਹ ਫੈਸਲਾ ਜੀਐਸਟੀ ਕੌਂਸਲ ਦੀ 56ਵੀਂ ਮੀਟਿੰਗ ਵਿਚ ਲਿਆ ਗਿਆ। ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਕਿਹਾ ਕਿ ਦੁੱਧ, ਰੋਟੀ, ਪੀਜ਼ਾ ਬ੍ਰੈੱਡ, ਛੀਨਾ ਸਮੇਤ ਕਈ ਖਾਣ-ਪੀਣ ਦੀਆਂ ਚੀਜ਼ਾਂ ਜੀਐਸਟੀ ਮੁਕਤ ਹੋਣਗੀਆਂ। ਵਿਅਕਤੀਗਤ ਸਿਹਤ ਅਤੇ ਜੀਵਨ ਬੀਮੇ ‘ਤੇ ਵੀ ਕੋਈ ਟੈਕਸ ਨਹੀਂ ਹੋਵੇਗਾ। ਲਗਜ਼ਰੀ ਵਸਤੂਆਂ ਅਤੇ ਤੰਬਾਕੂ ਉਤਪਾਦਾਂ ‘ਤੇ 40% ਜੀਐਸਟੀ ਲਗਾਇਆ ਜਾਵੇਗਾ। ਇਹ ਸਲੈਬ ਨਵਰਾਤਰੀ ਦੇ ਪਹਿਲੇ ਦਿਨ ਯਾਨੀ 22 ਸਤੰਬਰ ਤੋਂ ਲਾਗੂ ਕੀਤੇ ਜਾਣਗੇ। ਇਨ੍ਹਾਂ ਤਬਦੀਲੀਆਂ ਦਾ ਉਦੇਸ਼ ਆਮ ਆਦਮੀ ਨੂੰ ਲੋੜੀਂਦੀਆਂ ਚੀਜ਼ਾਂ ਨੂੰ ਸਸਤਾ ਬਣਾਉਣਾ, ਸਿਹਤ ਨਾਲ ਸਬੰਧਤ ਵਸਤੂਆਂ ‘ਤੇ ਟੈਕਸ ਘਟਾਉਣਾ ਅਤੇ ਤੰਬਾਕੂ ਵਰਗੇ ਨੁਕਸਾਨਦੇਹ ਉਤਪਾਦਾਂ ਦੀ ਵਰਤੋਂ ਨੂੰ ਨਿਰਾਸ਼ ਕਰਨਾ ਹੈ। ਪੀਐਮ ਮੋਦੀ ਨੇ ਐਕਸ ‘ਤੇ ਲਿਖਿਆ, ‘ਸੁਤੰਤਰਤਾ ਦਿਵਸ ‘ਤੇ ਆਪਣੇ ਭਾਸ਼ਣ ਵਿਚ ਮੈਂ ਕਿਹਾ ਸੀ ਕਿ ਅਸੀਂ ਜੀਐਸਟੀ ਵਿਚ ਅਗਲੀ ਪੀੜ੍ਹੀ ਦੇ ਸੁਧਾਰ ਲਿਆਉਣ ਦਾ ਇਰਾਦਾ ਰੱਖਦੇ ਹਾਂ। ਕੇਂਦਰ ਸਰਕਾਰ ਨੇ ਜੀਐਸਟੀ ਦੀਆਂ ਦਰਾਂ ਨੂੰ ਬਦਲਣ ਅਤੇ ਪ੍ਰਕਿਰਿਆਵਾਂ ਨੂੰ ਸਰਲ ਬਣਾਉਣ ਲਈ ਇਕ ਵਿਸਤ੍ਰਿਤ ਪ੍ਰਸਤਾਵ ਤਿਆਰ ਕੀਤਾ ਸੀ। ਇਸਦਾ ਉਦੇਸ਼ ਆਮ ਆਦਮੀ ਦੀ ਜ਼ਿੰਦਗੀ ਨੂੰ ਆਸਾਨ ਬਣਾਉਣਾ ਅਤੇ ਦੇਸ਼ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨਾ ਹੈ। ਮੈਨੂੰ ਖੁਸ਼ੀ ਹੈ ਕਿ ਜੀਐਸਟੀ ਕੌਂਸਲ (ਜਿਸ ਵਿਚ ਕੇਂਦਰ ਅਤੇ ਸਾਰੇ ਰਾਜ ਸ਼ਾਮਲ ਹਨ) ਨੇ ਕੇਂਦਰ ਸਰਕਾਰ ਦੇ ਇਸ ਪ੍ਰਸਤਾਵ ਨੂੰ ਮਨਜ਼ੂਰੀ ਦੇ ਦਿਤੀ ਹੈ। ਇਸ ਵਿਚ ਜੀਐਸਟੀ ਦਰਾਂ ਵਿਚ ਕਮੀ ਅਤੇ ਕਈ ਸੁਧਾਰ ਸ਼ਾਮਲ ਹਨ। ਜਿਸ ਨਾਲ ਆਮ ਜਨਤਾ, ਕਿਸਾਨ, ਐਮਐਸਐਮਈ, ਮੱਧ ਵਰਗ, ਔਰਤਾਂ ਅਤੇ ਨੌਜਵਾਨਾਂ ਨੂੰ ਲਾਭ ਹੋਵੇਗਾ। ਇਹ ਵੱਡੇ ਬਦਲਾਅ ਸਾਡੇ ਨਾਗਰਿਕਾਂ ਦੇ ਜੀਵਨ ਵਿਚ ਸੁਧਾਰ ਕਰਨਗੇ ਅਤੇ ਕਾਰੋਬਾਰ ਨੂੰ ਆਸਾਨ ਬਣਾਉਣਗੇ। ਖਾਸ ਕਰਕੇ ਛੋਟੇ ਵਪਾਰੀਆਂ ਅਤੇ ਕਾਰੋਬਾਰਾਂ ਦੀ ਮਦਦ ਕੀਤੀ ਜਾਵੇਗੀ।’
