“ਰੀਲਾਂ ਬਣਾਉਣ ਤੋਂ ਰੋਕਣ ਦਾ ਵਿਰੋਧ ਬਣਿਆ ਖਤਰਨਾਕ, ਘਰ ’ਚ ਦਾਖਲ ਹੋਈ ਟੋਲੀ ਨੇ ਮਚਾਈ ਤਬਾਹੀ…
ਪੀਰ ਕੇ ਖਾਨਗੜ੍ਹ , 20 ਅਗਸਤ 2025 (ਨਿਊਜ਼ ਟਾਊਨ ਨੈਟਵਰਕ) :
ਰੀਲਾਂ ਬਣਾਉਣ ਵਰਗੀਆਂ ਆਧੁਨਿਕ ਤਕਨੀਕੀ ਗਤੀਵਿਧੀਆਂ ਨੇ ਪਿੰਡਾਂ ਵਿਚ ਸਮਾਜਿਕ ਤਣਾਅ ਪੈਦਾ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਅਜਿਹਾ ਹੀ ਇਕ ਤਾਜ਼ਾ ਮਾਮਲਾ ਥਾਣਾ ਲੱਖੋਕੇ ਬਹਿਰਾਮ ਅਧੀਨ ਪੈਂਦੇ ਪਿੰਡ ਪੀਰ ਕੇ ਖਾਨਗੜ੍ਹ ਵਿਖੇ ਸਾਹਮਣੇ ਆਇਆ ਹੈ। ਇੱਥੇ ਇਕ ਪਰਿਵਾਰ ਨੂੰ ਰੀਲਾਂ ਬਣਾਉਣ ਤੋਂ ਰੋਕਣ ਦੀ ਕੀਮਤ ਆਪਣੀ ਸੁਰੱਖਿਆ ਅਤੇ ਜਾਇਦਾਦ ਨੂੰ ਗੁਆ ਕੇ ਚੁਕਾਉਣੀ ਪਈ।
ਸ਼ਿਕਾਇਤਕਰਤਾ ਵਰਿਆਮ ਸਿੰਘ ਪੁੱਤਰ ਬਸੀਰ ਸਿੰਘ ਜੋ ਕਿ ਇਸੇ ਪਿੰਡ ਦਾ ਵਸਨੀਕ ਹੈ ਨੇ ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਦੱਸਿਆ ਕਿ 16 ਅਗਸਤ, 2025 ਦੀ ਸ਼ਾਮ ਕਰੀਬ 7.30 ਵਜੇ ਜਦੋਂ ਉਹ ਆਪਣੇ ਘਰ ਵਿਚ ਸੀ, ਤਾਂ ਅਚਾਨਕ ਕੁਝ ਲੋਕਾਂ ਨੇ ਉਨ੍ਹਾਂ ਦੇ ਘਰ ਵਿਚ ਜ਼ਬਰਦਸਤੀ ਦਾਖਲ ਹੋ ਕੇ ਹਮਲਾ ਕਰ ਦਿੱਤਾ। ਵਰਿਆਮ ਸਿੰਘ ਨੇ ਦੱਸਿਆ ਇਸ ਹਮਲੇ ਵਿਚ ਮੁੱਖ ਤੌਰ ’ਤੇ ਬੂਟਾ ਸਿੰਘ, ਉਸਦਾ ਪੁੱਤਰ ਮਿਰਜ਼ਾ, ਕਰਨ, ਜੱਸਾ, ਰਾਜਪਾਲ, ਪੋਲਿਸ, ਅਤੇ ਨਾਲ ਹੀ ਕੁਝ ਔਰਤਾਂ ਸ਼ੱਬੂ, ਕਾਜਲ ਅਤੇ ਰਾਣੋ ਸ਼ਾਮਲ ਸਨ।
ਹਮਲਾਵਰਾਂ ਨੇ ਉਨ੍ਹਾਂ ਦੇ ਘਰ ਦੀ ਭੰਨ-ਤੋੜ ਕਰਨੀ ਸ਼ੁਰੂ ਕਰ ਦਿੱਤੀ ਅਤੇ ਬੂਟਾ ਸਿੰਘ ਨੇ ਲਲਕਾਰਾ ਮਾਰ ਕੇ ਵਰਿਆਮ ਸਿੰਘ ਨੂੰ ਫੜਨ ਲਈ ਕਿਹਾ। ਉਨ੍ਹਾਂ ਨੇ ਦੱਸਿਆ ਕਿ ਹਮਲੇ ਦਾ ਕਾਰਨ ਇਹ ਸੀ ਕਿ ਵਰਿਆਮ ਸਿੰਘ ਨੇ ਉਸਦੇ ਪੁੱਤਰ ਮਿਰਜ਼ਾ ਨੂੰ ਰੀਲਾਂ ਬਣਾਉਣ ਤੋਂ ਰੋਕਿਆ ਸੀ। ਹਮਲਾਵਰਾਂ ਨੇ ਵਰਿਆਮ ਸਿੰਘ ਨਾਲ ਕੁੱਟਮਾਰ ਵੀ ਕੀਤੀ। ਜਦੋਂ ਵਰਿਆਮ ਸਿੰਘ ਨੇ ਰੌਲਾ ਪਾਇਆ ਤਾਂ ਹਮਲਾਵਰ ਮੌਕੇ ਤੋਂ ਭੱਜ ਗਏ। ਜਾਂਦੇ ਸਮੇਂ ਉਹ ਵਰਿਆਮ ਸਿੰਘ ਦੀ ਨੂੰਹ ਕੌਸ਼ਲ ਦੇ ਗਹਿਣੇ, ਜਿਨ੍ਹਾਂ ਵਿਚ ਚਾਂਦੀ ਦੀ ਚੈਨ, ਸੋਨੇ ਦੀਆਂ ਵਾਲੀਆਂ ਅਤੇ ਇਕ ਸੋਨੇ ਦੀ ਮੁੰਦਰੀ ਸ਼ਾਮਲ ਸੀ, ਚੋਰੀ ਕਰਕੇ ਲੈ ਗਏ।
ਇਸ ਤੋਂ ਇਲਾਵਾ ਅਲਮਾਰੀ ਵਿੱਚੋਂ 35,000 ਰੁਪਏ ਨਕਦ, ਜੋ ਕਿ ਉਸ ਨੇ ਗਾਂ ਵੇਚ ਕੇ ਰੱਖੇ ਸਨ, ਵੀ ਚੋਰੀ ਹੋ ਗਏ। ਹਮਲਾਵਰਾਂ ਨੇ ਘਰ ਵਿੱਚ ਪਏ ਸਮਾਨ ਜਿਵੇਂ ਫਰਿੱਜ, ਕੂਲਰ, ਮੰਜੇ, ਕੁਰਸੀਆਂ ਅਤੇ ਪਾਣੀ ਵਾਲੀ ਟੈਂਕੀ ਦੀ ਵੀ ਭੰਨਤੋੜ ਕੀਤੀ। ਇਸ ਘਟਨਾ ਦੀ ਜਾਣਕਾਰੀ ਮਿਲਣ ’ਤੇ ਥਾਣਾ ਲੱਖੋਕੇ ਬਹਿਰਾਮ ਦੇ ਸਹਾਇਕ ਥਾਣੇਦਾਰ ਦਰਸ਼ਨ ਸਿੰਘ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੇ ਵਰਿਆਮ ਸਿੰਘ ਦੇ ਬਿਆਨਾਂ ਦੇ ਆਧਾਰ ’ਤੇ ਉਕਤ ਦੋਸ਼ੀਅਨ ਖ਼ਿਲਾਫ਼ 333, 303 (2), 115 (2), 191 (3), ਅਤੇ 190 ਬੀਐੱਨਐੱਸ ਤਹਿਤ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
