ਪੰਜਾਬ ਬਿਜਲੀ ਬੋਰਡ ਦੇ ਡਾਇਰੈਕਟਰ ਨੇ ਦਿਤਾ ਅਸਤੀਫ਼ਾ
ਹਾਲੇ 5 ਮਹੀਨੇ ਪਹਿਲਾਂ ਹੀ ਸੰਭਾਲਿਆ ਅਹੁੱਦਾ
(ਦੁਰਗੇਸ਼ ਗਾਜਰੀ)
ਚੰਡੀਗੜ੍ਹ, 13 ਅਸਗਤ : ਪੰਜਾਬ ‘ਚ ਇਕ ਪਾਸੇ ਜਿਥੇ ਹੱਕੀ ਮੰਗਾਂ ਨੂੰ ਲੈ ਕੇ ਬਿਜਲੀ ਮੁਲਾਜ਼ਮ ਹੜਤਾਲ ‘ਤੇ ਚੱਲ ਰਹੇ ਹਨ ਅਤੇ ਕੰਮ ਪੂਰੀ ਤਰ੍ਹਾਂ ਠੱਪ ਕੀਤਾ ਹੋਇਆ ਹੈ, ਉਥੇ ਹੀ ਇਸ ਵਿਚਾਲੇ ਇਕ ਖ਼ਬਰ ਸਾਹਮਣੇ ਆ ਰਹੀ ਹੈ ਕਿ ਹੀਰਾ ਲਾਲ ਗੋਇਲ ਡਾਇਰੈਕਟਰ ਕਮਰਸ਼ੀਅਲ, ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (PSPCL) ਨੇ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿਤਾ ਹੈ। ਜ਼ਿਕਰਯੋਗ ਹੈ ਕਿ ਅਜੇ ਉਨ੍ਹਾਂ ਨੇ ਮਾਰਚ 2025 ਵਿਚ ਹੀ ਅਹੁਦਾ ਸੰਭਾਲਿਆ ਸੀ। ਜਾਣਕਾਰੀ ਅਨੁਸਾਰ ਉਨ੍ਹਾਂ ਨੇ 7 ਅਗਸਤ, 2025 ਨੂੰ ਸਿਹਤ ਦੇ ਆਧਾਰ ‘ਤੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿਤਾ ਹੈ। ਅੱਜ ਤਕ ਨਿਯੁਕਤੀ ਅਧਿਕਾਰੀਆਂ ਦੁਆਰਾ ਉਨ੍ਹਾਂ ਦਾ ਅਸਤੀਫ਼ਾ ਸਵੀਕਾਰ ਨਹੀਂ ਕੀਤਾ ਗਿਆ ਹੈ। ਗੋਇਲ ਨੇ ਕਿਹਾ, “ਡਾਕਟਰ ਨੇ ਮੈਨੂੰ ਕੁਝ ਸਿਹਤ ਸਬੰਧੀ ਸਾਵਧਾਨੀਆਂ ਅਤੇ ਆਰਾਮ ਦੀ ਸਲਾਹ ਦਿਤੀ ਹੈ। ਸਲਾਹ-ਮਸ਼ਵਰੇ ਤੋਂ ਬਾਅਦ, ਮੈਂ ਆਪਣੇ ਕਾਗ਼ਜ਼ਾਤ ਪੇਸ਼ ਕਰਨ ਦਾ ਫ਼ੈਸਲਾ ਕੀਤਾ ਹੈ।” ਉਨ੍ਹਾਂ ਨੂੰ ਦੋ ਸਾਲਾਂ ਲਈ ਡਾਇਰੈਕਟਰ ਕਮਰਸ਼ੀਅਲ ਵਜੋਂ ਨਿਯੁਕਤ ਕੀਤਾ ਗਿਆ ਸੀ। 5 ਜੂਨ, 1966 ਨੂੰ ਜਨਮੇ, ਇੰਜੀਨੀਅਰ ਹੀਰਾ ਲਾਲ ਗੋਇਲ 2 ਨਵੰਬਰ, 1989 ਨੂੰ ਬਿਜਲੀ ਬੋਰਡ ਵਿਚ ਸ਼ਾਮਲ ਹੋਏ ਅਤੇ ਉਦੋਂ ਤੋਂ ਉਨ੍ਹਾਂ ਨੇ ਵੰਡ, ਗਰਿੱਡ O&M, ਸਟੋਰ, ਯੋਜਨਾਬੰਦੀ, ਥਰਮਲ, ਹਾਈਡਲ, ਇਨਫੋਰਸਮੈਂਟ, ਤਕਨੀਕੀ ਆਡਿਟ, ਪੀ.ਐਸ.ਟੀ.ਸੀ.ਐਲ ਵਿਖੇ ਐਚ.ਆਰ ਵਿਖੇ ਯੋਜਨਾਬੰਦੀ ਸਮੇਤ ਕਈ ਖੇਤਰਾਂ ਵਿਚ 35 ਸਾਲਾਂ ਦਾ ਤਜਰਬਾ ਇਕੱਠਾ ਕੀਤਾ ਹੈ।
